Pengerana 2:1-26
2 Kenca si e rukur aku, “Kucubaken nggeluh ersenang-senang janah kunen kai hasilna.” Tapi e pe sia-sia.
2 Ningku, “Tawa e bodoh!”
Janah ningku ka, “Kai gunana ersenang-senang?”
3 Enggo kuukuri kai hasilna adi kupuasi minem anggur+ janah tetap kupake kepentarenku. Kulakoken ka kai si bodoh gelah kuteh kai si mehulina si ilakoken manusia segedang geluhna, geluhna si ntisik i teruh langit.
4 Kulakoken pendahin-pendahin si hebat.+ Kubangun melala rumahku,+ kuban melala kebun anggurku.+
5 Kuban kebun-kebunku ras taman-tamanku janah kusuani i je kerina jenis batang kayu si buahna banci ipan.
6 Kuban kolam-kolamku gelah maler launa ku batang-batang kayu si lit i kerangen.
7 Kudat pelayan-pelayan si dilaki ras si diberu+ janah lit ka pelayanku si lahir i rumah tanggaku. Kudat ka melala asuh-asuhen eme lembu, kambing, ras biri-biri.+ Si e kerina buen asangken jang kalak si pernah tading i Jerusalem.
8 Kupepulung pirak ras emas man bangku,+ bage pe erta arah raja-raja ras arah propinsi-propinsi.+ Kupepulung penyanyi-penyanyi si dilaki ras si diberu man bangku, bage pe kerina si erban meriah ukur manusia, eme melala diberu.*
9 Emaka reh dekahna reh hebatna aku, lebihen asangken kalak si pernah tading i Jerusalem.+ Janah tetap aku pentar.
10 Kai pe aku merhat, kulakoken.+ Labo kutahan-tahan kai pe si erban meriah ukurku. Meriah ukurku perban kerina kerja kerasku, janah e kap hasil arah kerina kerja kerasku.+
11 Tapi sanga kuukuri kerina pendahin si kulakoken bage pe kerina kerja keras si enggo latih kuakap ndahikenca,+ kerina e sia-sia, bagi ngayaki angin.+ Kerina si lit i teruh matawari la lit ertina.+
12 Kenca si e kuukuri kerna kepentaren, kerna si la masuk akal, ras kebodohen.+ Kai nge si banci ilakoken kalak si reh kenca aku? Si enggo pernah ilakoken ngenca.
13 Kuidah maka ulin pentar asangken bodoh,+ bagi terang ulin asangken gelap.
14 Kalak pentar idahna dalan si dalanina,+ tapi kalak bodoh erdalan ia bas kegelapen.+ Kuteh ka maka kedungen kalak e kerina seri.+
15 Emaka rukur aku, “Kai si terjadi man kalak bodoh, terjadi ka pagi man bangku.”+ Jadi kai gunana adi pentar kel gia aku? Jenari rukur aku, “Enda pe sia-sia.”
16 Kalak pentar ras kalak bodoh labo pagi lalap iinget.+ Kerina nge pagi ilupaken. Uga kin permate kalak pentar? Bali ras kalak bodoh.+
17 Dungna segat ateku kegeluhen,+ sebap kerina si ilakoken i teruh matawari erban latih ukurku, kerina sia-sia+ bagi ngayaki angin.+
18 Segat ateku kerina kerja kerasku si kulakoken i teruh matawari.+ Sebap arus kutadingken si e kerina man kalak si reh kenca aku.+
19 Ise si metehsa ia pentar ntah bodoh?+ Amin pe bage, ia pagi si nguasai kerina si kudat alu kerja kerasku ras kepentarenku i teruh matawari. Enda pe sia-sia.
20 Emaka putus asa aku ngukuri kerja kerasku ras pendahin si kulakoken i teruh matawari.
21 Banci saja lit kalak si kerja keras alu kepentaren, alu keahlin, ras pemeteh, tapi arus berekenna kerina e man kalak si la erusaha ndatkenca.+ Enda pe sia-sia ras masalah si mberat.
22 Kai kin si banci dat manusia arah kerina kerja kerasna ras semangatna, si erban ia terus kerja keras i teruh matawari?+
23 Segedang geluhna, dahinna erban ia rate mesui janah susah.+ Sanga berngi pe, la tenang ukurna.+ Enda pe sia-sia.
24 Si mehulina man manusia eme man, minem, ras ngenanami kerja kerasna.+ Kuteh maka enda pe rehna arah Dibata si benar.+
25 Ise kin si ulin panganna ras inemenna asangken jangku?+
26 Man kalak si erban meriah ukur Dibata si benar, berekenNa kepentaren, pemeteh, ras keriahen ukur.+ Tapi man kalak perdosa berekenNa pendahin guna mpegun-gun ras mpepulung kai si ibereken man kalak si erban meriah ukurNa.+ Enda pe sia-sia, bagi ngayaki angin.
Cataten i teruh
^ Ntah “singuda-nguda.”
