Pengerana 6:1-12
6 Lit ka masalah si deban si seh kel beratna i teruh matawari, si rusur adapi manusia:
2 Dibata si benar mereken kebayaken, erta, ras kemulian man manusia, gelah seh kerina sura-surana, tapi la bereNa kesempaten ngenanamisa. Si ngenanamisa eme kalak asing. Enda pe sia-sia janah seh kel sedihna.
3 Adi sekalak jelma lit seratus anakna janah ndekah ia nggeluh, cawir ka ia metua, tapi la nanamina si mehuli ope lenga ia mate, banci kukataken maka sedihen keadanna asangken bayi si mate sanga lahir.+
4 Sia-sia saja anak e lahir. Anak e lawes ku bas kegelapen janah gelarna pe itutupi kegelapen.
5 Amin pe anak e la pernah ngidah matawari janah la tehna kai pe, ulin anak e asangken kalak ndai.+
6 Man kai nggeluh dua ribu tahun dekahna adi labo pernah ngenanami si mehuli? La kin kerina nge jelma lawes ku ingan si seri?+
7 Manusia kerja keras guna ngisi beltekna,+ tapi la pernah ia puas.
8 Kai untungna jadi kalak pentar ibandingken kalak motu?+ Kai kin gunana iteh kalak mesera carana ndalani kegeluhen?
9 Ulin ngenanami kai si idahndu asangken merhat kam kai si la lit bas kam. Enda pe sia-sia, bagi ngayaki angin.
10 Kai pe si lit, enggo pernah iban gelarna. Bage ka pe manusia, enggo iteh uga kin ia. Manusia la ngasup ngelawan kalak si gegehen asangken ia.
11 Reh buena ngerana, reh sia-siana. Kai gunana e man manusia?
12 Manusia gendek umurna janah sia-sia, bali bagi bayangen si lewat. Ise si metehsa kai si mehulina si arus ilakoken manusia?+ Ise si banci ngataken man bana kai pagi si terjadi i teruh matawari kenca ia mate?
