Perbahanen Rasul-Rasul 11:1-30
11 Enggo begi rasul-rasul ras turang senina si lit i Judea maka kalak arah bangsa si deban pe enggo ngaloken kata Dibata.
2 Emaka sanga reh Petrus ku Jerusalem, kalak si ndukung sunat+ mulai mandangi ia,
3 nina, “Masuk kam ku rumah kalak si la isunat, man ka kam ras kalak e.”
4 Emaka jelasken Petrus kerna si e man kalak e, nina,
5 “Sanga aku ertoto i Jope, kudat sada pengenehenen.* Lit bagi uis si galang nusur langit nari. Empatna suki uis e tempa-tempa ijemak. Uis e nusur i lebe-lebeku.+
6 Kuperdiateken kel ku bas uis e, lit binatang-binatang si empat nahena, binatang-binatang si meliar, si njoler,* ras perik-perik i langit.
7 Kubegi sada sora ngerana man bangku, ‘O Petrus, tedisken, gelehlah e, jenari pan!’
8 Tapi ningku, ‘Lang Tuan, lang! La pernah kupan kai pe si najis ras si la bersih.’
9 Ngerana ka sora i langit nari pedua kaliken, ‘Ula nai katakenndu najis kai si enggo kataken Dibata bersih.’
10 Enda terjadi telu kali. Kenca si e, terangkat kerina mulihken ku langit.
11 Sanga si e ka, telu dilaki si isuruh ndahi aku i Kesarea nari, enggo seh i rumah ingan kami erberngi.+
12 Jenari ipebetehken man bangku arah kesah si badia gelah ula aku sangsi lawes ras kalak e. Enemna murid-murid e pe ikut ras aku jenari masuk kami ku rumah dilaki e.
13 “Ceritaken Kornelius man kami uga malekat tedis i rumahna janah nina malekat e, ‘Suruhlah kalak ku Jope ngelegi Simon si igelari Petrus,+
14 katakenna kari man bandu uga carana kam ras kerina keluargandu banci selamat.’
15 Tapi sanga mulai aku ngerana, nusur kesah si badia man kalak e bagi si enggo sialoken tangtangna mbarenda.+
16 Ngidah si e, kuinget kai si rusur kataken Tuan, ‘Johanes mperidiken alu lau,+ tapi kena iperidiken pagi alu kesah si badia.’+
17 Emaka, adi seri nge pemere Dibata man kalak e ras man banta si tek man Tuan Jesus Kristus, ise kin aku maka banci kuhalangi Dibata?”+
18 Megi si e, lanai kalak e keberaten janah muliakenna Dibata, nina, “Enggo bere Dibata kesempaten man bangsa-bangsa si deban gelah ertobat guna ndatken kegeluhen.”+
19 Kenca Stepanus ibunuh,+ murid-murid ngadapi kiniseran si erban kalak e merap seh ku Punike, Kiprus, bage pe Antiokia. Tapi man kalak Jahudi saja ngenca kalak e terus erberita.+
20 Amin pe bage, lit piga-piga murid arah Kiprus ras Kireni reh ku Antiokia janah mulai beritakenna berita si meriah kerna Tuan Jesus man kalak si make bahasa Junani.
21 Tan Jahwe* nampati kalak e, emaka reh buena kalak si tek man Tuan ras jadi murid-muridna.+
22 Sanga runggun i Jerusalem megi berita kerna kalak e, isuruh me Barnabas+ lawes ku Antiokia.
23 Kenca ia seh i je janah idahna kiniulin Dibata si luar biasa, meriah ukurna janah mulai pegegehina kerina kalak e gelah tetap setia man Tuan alu bulat ukur,+
24 sebap Barnabas mehuli janah dem alu kesah si badia ras erkiniteken. Emaka reh teremna kalak jadi murid-murid Tuan.+
25 Jenari lawes ia ku Tarsus, daramina Saul seh ngasa dat.+
26 Kenca jumpa ras Saul, babana ia ku Antiokia. Setahun dekahna pulung kalak e ras-ras bas runggun si lit i je janah ajarina enterem jelma. Alu petunjuk Dibata, i Antiokia me tangtangna murid-murid igelari Kristen.+
27 Sanga si e, reh nabi-nabi+ i Jerusalem nari ku Antiokia.
28 Salah sada gelarna Agabus.+ Alu penampat kesah si badia, nubuatkenna maka nandangi terjadi kelihen si mekelek i belang-belang doni.+ Enda tuhu-tuhu terjadi bas jaman Klaudius.
29 Emaka, ersada arih murid-murid ngirim penampat+ man turang senina si tading i Judea. Penampat si ibereken e menurut kengasupenna sekalak-sekalak,+
30 janah ikirimken arah Barnabas ras Saul+ man pertua-pertua si lit i je.
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah “merayap.”