Perbahanen Rasul-Rasul 13:1-52
13 Bas runggun i Antiokia, lit piga-piga nabi ras guru.+ Gelarna eme Barnabas, Saul, Simeon si igelari Si Mbiring,* Lusius arah Kireni nari, bage pe Manaen si sada sekolah ras Herodes penguasa daerah e.
2 Sanga kalak e ngelayani* Jahwe* ras puasa, ikataken man kalak e arah kesah si badia, “Peserap Barnabas ras Saul+ guna ndahiken dahin si enggo Kutetapken man ia duana.”+
3 Kenca puasa ras ertoto, tamaken kalak e tanna ku datas Barnabas ras Saul, jenari utusna kalak e.
4 Arah kesah si badia, iutus me kalak e lawes ku Selukia, jenari erlayar ku Kiprus.
5 Kenca seh i Salamis, beritaken kalak e kata Dibata bas ingan-ingan pulung kalak Jahudi.* Johanes pe ikut nampati kalak e.+
6 Kenca dahina kerina pulau e, seh kalak e i Papos. I je jumpa kalak e ras kalak Jahudi gelarna Baryesus. Ia tukang sihir ras nabi palsu.
7 Ia sierdahin Gubernur* Sergius Paulus. Gubernur e kalak si pentar. Dilo gubernur e Barnabas ras Saul, perban merhat kel ia megiken kata Dibata.
8 Tapi tukang sihir e si igelari ka Elimas (enda penggelaren man tukang sihir bas bahasa Junani) nentang kalak e. Usahakenna gelah gubernur e la erkiniteken.
9 Saul si igelari Paulus dem alu kesah si badia, tatapna tukang sihir e,
10 nina, “O kam si terus ngelakoken erbage-bage kejahaten ras tipun, kam kap anak Iblis+ ras musuh kerina si benar, engkai maka terus ubahndu dalan Jahwe* si benar?
11 Nenlah! Tan Jahwe* nge si ngelawan kam. Pentang me kam, janah piga-piga waktu dekahna la kam ngidah terang.” Rempet lanai ia erpengidah janah gelap akapna. Emaka mutar-mutar ia ndarami kalak gelah lit si negu ia.
12 Ngidah kejadin e, takjup gubernur e man ajaren Jahwe,* emaka jadi kalak si tek ia.
13 Paulus ras teman-temanna erlayar nadingken Papos janah seh kalak e i Perge si lit i Pampilia. Tapi tadingken Johanes+ kalak e janah mulih ia ku Jerusalem.+
14 Amin pe bage, terusken kalak e perdalanenna arah Perge nari ku Antiokia i Pisidi. Bas wari Sabat, lawes kalak e ku ingan pulung kalak Jahudi,+ kundul kalak e i je.
15 Kenca dung Undang-Undang Musa+ ras Ajaren Nabi-Nabi ibacaken i lebe-lebe jelma si enterem, kepala* ingan pulung kalak Jahudi nuruh kalak si deban mpeseh kata man kalak e, “O turang senina, adi lit rananndu si banci mpegegehi si pulung, katakenlah.”
16 Emaka tedis Paulus, janah banna tanda alu tanna, nina,
“O kalak Israel bage pe kena kerina si mbiar man Dibata, begikenlah.
17 Dibata kalak Israel enggo milih nini bulangta, banNa kalak e jadi bangsa si mbelin sanga kalak e jadi kalak asing bas taneh Mesir. BabaNa kalak e ndarat je nari alu tanNa si megegeh.+
18 Bas taneh mesawang,* sabar Ia man kalak e kira-kira 40 tahun dekahna.+
19 Kenca kernepkenNa pitu bangsa bas negri Kanaan, berekenNa taneh e jadi warisen man nini bulangta.+
20 Kerina enda terjadi kira-kira 450 tahun dekahna.
“Jenari berekenNa piga-piga hakim man kalak e seh ku jaman Nabi Samuel.+
21 Tapi kenca si e, pindo kalak e sekalak raja.+ Emaka bereken Dibata me Saul anak Kis arah suku Benyamin nari.+ Ia merentah 40 tahun dekahna.
22 Kenca pengadiNa Saul, lantikNa Daud jadi raja.+ Kerna Daud, ersaksi Dibata, nina, ‘Enggo Kudat kalak si erban meriah ukurKu+ eme Daud anak Isai.+ Ia pagi si ngelakoken kerina sura-suraKu.’
23 Bagi si enggo janjikenNa, arah keturunen dilaki enda me bereken Dibata sekalak juru selamat man kalak Israel eme Jesus.+
24 Sope Jesus reh, enggo beritaken Johanes man kerina kalak Israel kerna peridin si jadi tanda pertobaten.+
25 Tapi sanga nandangi dung dahin Johanes, nina, ‘Ise kin akap kena aku? Aku labo ia. Tapi nenlah! Ia reh kenca aku, mbuka selopna pe la aku cocok.’*+
26 “O turang senina, keturunen Abraham bage pe kalak si deban si mbiar man Dibata, berita keselamaten enda enggo ipeseh man banta.+
27 La tandai penduduk Jerusalem ras penguasa-penguasana ia. Tapi sanga hakimi kalak e ia, terjadi me kai si enggo itulis bas Ajaren Nabi-Nabi,+ si ibaca alu sora megang tiap Sabat.
28 Amin pe la lit dat kalak e kesalahen si erban ia patut ihukum mate,+ pindo kalak e man Pilatus gelah ia ihukum mate.+
29 Kenca lakoken kalak e kerina kai si tertulis kerna ia, penusurna ia arah tiang* nari janah kuburkenna.+
30 Tapi pekeke Dibata ia arah si mate nari.+
31 Lit piga-piga wari dekahna, cidahkenna bana man kalak si mbarenda ngikutken ia arah Galilea nari ku Jerusalem. Gundari, kalak e me si mereken kesaksin kerna ia man jelma si enterem.+
32 “Emaka, gundari peseh kami man kena berita si meriah kerna janji si ban Dibata man nini bulangta.
33 Alu mpekeke Jesus,+ janji e tuhu-tuhu enggo tepati Dibata man banta eme anak-anakna. Bagi si enggo itulis bas masmur si peduaken, ‘Kam kap anakKu, gundari Aku jadi Bapakndu.’+
34 Enggo pekeke Dibata ia arah si mate nari janah lanai lit bas ia daging si banci macik. Nina Dibata, ‘Kubereken pagi pasu-pasu man kena bagi janjiKu man Daud perban kekelengenKu si setia man bana, janah janjiKu e terteki.’+
35 Bas masmur si deban ikataken ka, ‘Labo pagi pediatNdu macik daging kalak si setia man baNdu.’+
36 Selain si e, Daud ngelayani* Dibata segedang geluhna. Kenca ia medem bas kematen, ikuburken ia ras nini bulangna janah dagingna pe macik.+
37 Tapi ia si enggo pekeke Dibata arah si mate nari, la macik dagingna.+
38 “Emaka, kukataken man kena turang senina, arah ia ngenca dosa banci iampuni.+
39 Arah ia, kerina kalak si tek banci ikataken la ersalah, tapi Undang-Undang Musa+ la banci erban kena ikataken la ersalah.+
40 Emaka, hati-hatilah kena gelah kai si itulisken bas Ajaren Nabi-Nabi la terjadi man kena, nina,
41 ‘Perdiatekenlah, o tukang hina. Senggetlah janah kerneplah, sebap Aku sangana ndahiken dahin bas jaman kena, pendahin si la iteki kena amin pe ijelasken alu jelas man kena.’”+
42 Sanga ndarat Paulus ras Barnabas je nari, pindoken kalak e kel gelah bahasna kerna si e mulihi bas wari Sabat si reh.
43 Emaka kenca dung perpulungen bas ingan pulung kalak Jahudi e, enterem kalak Jahudi ras kalak si ngikutken agama Jahudi si nembah Dibata, ngikutken Paulus ras Barnabas. Mindo kel Paulus ras Barnabas gelah tetap kalak e bas kiniulin Dibata si luar biasa.+
44 Bas wari Sabat berikutna, hampir kerina kalak bas kota e pulung guna megiken kata Jahwe.*
45 Sanga idah kalak Jahudi jelma si enterem e, cian atena janah mulai hinana kai si kataken Paulus.+
46 Tapi ngaloi Paulus ras Barnabas alu pang, nina, “Tuhu, kata Dibata arus lebe ipeseh man kena.+ Tapi perban tulak kena janah cidahken kena maka la kena cocok* ngaloken kegeluhen si rasa lalap, lawes kami ku bangsa-bangsa.+
47 Sebap enggo perentahken Jahwe* man kami alu kata-kata enda, ‘Enggo Kupilih kam jadi terang man bangsa-bangsa, gelah kam si maba keselamaten ku ujung-ujung doni.’”+
48 Megi si enda, meriah ukur kalak arah bangsa-bangsa si deban janah muliakenna kata Jahwe.* Kerina kalak si pusuh ras perbahanenna ngaloken kebenaren guna kegeluhen si rasa lalap jadi kalak si tek.
49 Kata Jahwe* terus iberitaken ku belang-belang negri e.
50 Tapi pengaruhi kalak Jahudi dilaki-dilaki si terpandang ras diberu-diberu si ihamati si mbiar man Dibata gelah Paulus ras Barnabas isiksa+ janah ipedarat arah kota e nari.
51 Emaka agui Paulus ras Barnabas abu si lit bas nahena guna jadi tanda persinget man kalak e, jenari lawes kalak e ku Ikoni.+
52 Murid-murid terus dem alu keriahen ukur+ ras kesah si badia.
Cataten i teruh
^ As. “igelari Niger.”
^ Ntah “ngelayani jelma si enterem guna.”
^ Ntah “lit piga-piga kepala.”
^ Taneh si mbelang si jarang iingani.
^ Ntah “metunggung.”
^ Ntah “kayu.”
^ Ntah “ngelakoken sura-sura.”
^ Ntah “metunggung.”
