Perbahanen Rasul-Rasul 14:1-28
14 Bas Ikoni, masuk rasul-rasul ku ingan pulung kalak Jahudi,* ngajar kalak e i je. Perban beluh kalak e ngajar, enterem kalak Jahudi ras kalak Junani jadi kalak si erkiniteken.
2 Tapi kalak Jahudi si la tek, pengaruhina kalak arah bangsa si deban ngelawan Paulus ras Barnabas.+
3 Perban si e, gunaken kalak e melala waktu i je guna mberitaken kerna kiniulin Dibata si luar biasa. Perban bereken Jahwe* kuasa man kalak e, la kalak e mbiar ngerana janah banci ban kalak e mukjizat ras tanda-tanda si luar biasa.+
4 Tapi penduduk kota e jadi terbagi. Lit si mihak kalak Jahudi, lit ka si mihak rasul-rasul.
5 Kalak arah bangsa si deban, kalak Jahudi, ras penguasa-penguasana ersada arihna guna nyiksa ras mbenteri kalak e alu batu.+
6 Kenca ipeseh kerna si e man rasul-rasul, kiam kalak e ku kota Likaoni, Listera, Derbe, ras daerah si lit i sekelilingna.+
7 I je pe lalap beritaken kalak e berita si meriah.
8 I Listera, lit sekalak dilaki sangana kundul. Ia cacat mulai lahirna nari janah la pernah erdalan.
9 Begikenna Paulus ngerana. Tatap Paulus ia janah perdiatekenna lit kiniteken dilaki e guna ipepalem.+
10 Emaka megang ia ngerana, nina, “Tedisken!” Mis ia tedis janah erdalan.+
11 Sanga idah jelma si enterem kai si lakoken Paulus, ersurak kalak e bas bahasa Likaoni, “Dewa-dewa enggo nusur ku tengah-tengahta bagi rupa manusia!”+
12 Kataken kalak e Barnabas Dewa Zeus janah Paulus e Dewa Hermes sebap ia si rusurna ngerana.
13 Emaka reh imam Dewa Zeus si rumah pertotonna lit i gerbang kota e. Babana lembu jantan ras bunga* ku gerbang. Radu atena ras jelma si enterem erban korban persembahen man Paulus ras Barnabas.
14 Tapi, sanga begi Rasul Barnabas ras Rasul Paulus kerna si e, rigatkenna bajuna, mis dahina jelma si enterem e janah megang ia ngerana,
15 “Engkai maka bage ban kena? Kami pe manusia nge, lit kang kelemahen kami bagi kena.+ Kami sangana mberitaken berita si meriah man kena, gelah tadingken kena kerina si sia-sia enda, jenari sembah kena Dibata si nggeluh si erban langit, doni, laut, ras kerina isina.+
16 Bas jaman si nai, pediat Dibata kerina bangsa rate-ate.+
17 Tapi tetap cidahkenNa diriNa+ arah perbahanenNa si mehuli. BereNa kena udan, musim rani,+ puaskenNa kena alu pangan, janah meriah banNa ukur kena.”+
18 Amin pe bage nina, mesera denga akap rasul-rasul e ngelarang jelma si enterem e gelah ula mere persembahen man kalak e.
19 Tapi jelma si enterem e dungna ipengaruhi kalak Jahudi arah Antiokia ras Ikoni nari.+ Perban si e, benteri kalak e Paulus alu batu. Sarenna ia ku darat kota perban akapna enggo mate.+
20 Tapi sanga pulung murid-murid i sekelilingna, tedis ia janah masuk ia ku kota. Paginna, lawes ia ras Barnabas ku Derbe.+
21 Kenca mberitaken berita si meriah bas kota e janah nampati enterem kalak jadi murid, mulih kalak e ku Listera, Ikoni, ras ku Antiokia.
22 I je, pegegehi kalak e murid-murid+ gelah tetap erkiniteken, nina, “Gelah banci kita masuk ku Kerajan Dibata, arus siadapi lebe melala kiniseran.”+
23 Selain si e, pilih kalak e piga-piga pertua bas tiap runggun.+ Ertoto kalak e ras erpuasa,+ janah pediat kalak e Jahwe* eme Dibata si itekina, si mperdiateken pertua-pertua e.
24 Kenca si e, lewati kalak e Pisidi janah seh i Pampilia.+
25 Kenca mberitaken kata Dibata i Perge, lawes kalak e ku Atalia.
26 Jenari erlayar kalak e ku Antiokia. Bas kota e me mbarenda kalak e itotoken gelah dat kiniulin Dibata si luar biasa alu bage banci lakokenna dahin si gundari enggo dungina.+
27 Kenca seh i je, pulung kalak e ras runggun si lit i je, ceritaken kalak e mbue kel si enggo lakoken Dibata arah kalak e. Ceritaken kalak e ka kerna uga Dibata mbuka dalan gelah bangsa si deban erkiniteken.+
28 Emaka ndekah kalak e tading ras murid-murid e.
Cataten i teruh
^ Ntah “hiasen takal.”
