Perbahanen Rasul-Rasul 18:1-28
18 Kenca si e, tadingken Paulus kota Aten janah lawes ia ku Korinti.
2 I je jumpa ia ras sekalak Jahudi gelarna Akuila,+ asalna Pontus nari. Ia mbaru denga reh arah Italia radu ras diberuna Persila, perban perentahken Kaisar Klaudius gelah kerina kalak Jahudi nadingken Roma. Emaka dahi Paulus kalak e,
3 tading ia i rumahna janah radu ras ia erdahin perban seri pendahinna,+ eme erban kemah.
4 Tiap wari Sabat,+ ngerana* Paulus bas ingan pulung kalak Jahudi*+ janah petetapna ukur kalak Jahudi ras Junani gelah tek kalak e man berita si pesehna.
5 Sanga reh Silas+ ras Timotius+ arah Makedoni nari, Paulus mulai sibuk mberitaken kata Dibata, ngerana ia man kalak Jahudi guna mbuktiken maka Jesus kap Kristus.+
6 Tapi perban lalap lawan kalak e ras hina kalak e ia, kisamkenna uisna+ janah nina, “Kena si ertanggung jawap man dareh kena.+ Aku bersih.+ Mulai gundari nari lawes aku ku bangsa-bangsa si deban.”+
7 Emaka lawes ia arah ingan e,* masuk ia ku rumah Titus Justus, sekalak dilaki si nembah Dibata. Rumahna i samping ingan pulung kalak Jahudi.
8 Tapi Krispus,+ kepala ingan pulung kalak Jahudi ras kerina kalak si lit bas rumahna jadi kalak si tek man Tuan. Enterem ka kalak Korinti si megi berita si meriah dungna jadi tek ras iperidiken.
9 Bas sada berngi, ngerana Tuan man Paulus bas sada pengenehenen,* nina, “Ula kam mbiar, teruslah kam ngerana, ula kam sinik,
10 sebap aku kap ras kam.+ Labo ise pe banci nyerang ras ncilakai kam, sebap enterem kalak bas kota enda tek kari man bangku.”
11 Emaka tading Paulus i je sada setengah tahun dekahna. Ajarkenna kata Dibata man kalak e.
12 Kenca Galio jadi gubernur* i Akaya, ersada arih kalak Jahudi ngelawan Paulus ras maba ia ku pengadilen,
13 nina, “Pengaruhi dilaki e kalak si deban nembah Dibata alu cara si la cocok ras undang-undang.”
14 Tapi sanga ngerana ate Paulus, nina Galio man kalak Jahudi, “O kalak Jahudi, adi lit kin kesalahen ntah pe kejahaten si lakoken dilaki enda, sabar nge aku megiken kena.
15 Tapi adi enda perubaten kerna kata-kata, gelar, ras undang-undang kena,+ kena saja si ndungisa. Aku la nggit jadi hakim bas persoalen si bage.”
16 Jenari pelawes Galio kalak e arah pengadilen nari.
17 Emaka kerina kalak e nangkap Sostenes,+ kepala ingan pulung kalak Jahudi, janah pekpeki kalak e ia i lebe-lebe pengadilen. Tapi sitik pe la diate Galio kerna si e.
18 Kenca piga-piga wari Paulus tading i je, sanga muat lawes ku Siria, ngata ia man turang senina. Erlayar ia ras Persila bage pe Akuila. I Kenkerea,+ gendek potong Paulus bukna tandana ia enggo erjanji man Dibata.
19 Kenca seh kalak e i Epesus, tadingkenna Persila ras Akuila i je. Tapi ia masuk ku ingan pulung kalak Jahudi janah ercakap-cakap ras kalak Jahudi.*+
20 Lalap pindo kalak e gelah Paulus tading terdekahen i je, tapi la ia nggit.
21 Ngata lawes Paulus janah nina, “Reh nge pagi aku mulihi ndahi kena, adi bage kin ate Jahwe.”* Erlayar ia nadingken Epesus
22 janah seh ia i Kesarea. Lawes ia* janah singgah ia ku runggun si lit i je. Kenca si e, berkat ia ku Antiokia.+
23 Kenca tading ia ntisik i je, lawes ia ndahi kota-kota si lit i Galati ras Perigia+ guna mpegegehi kerina murid-murid.+
24 Sanga si e, lit sekalak Jahudi reh ku Epesus. Gelarna Apolos,+ asalna Aleksandria nari. Ia beluh ngerana janah melala pemetehna kerna Kitap si Badia.
25 Dalan Jahwe* enggo iajarken man bana. Alu kesah si badia, semangat kel ia ngerana ras ngajar kerna Jesus alu tepat, tapi peridin Johanes ngenca tehna.
26 Pang kel ia ngerana bas ingan pulung kalak Jahudi. Kenca begi Persila ras Akuila+ ia ngerana, baba kalak e ia janah jelasken kalak e dalan Dibata alu lebih tepat man bana.
27 Kenca bage, perban lawes ate Apolos ku Akaya, ban senina-senina surat man murid-murid si lit i je gelah alo-alo kalak e Apolos. Emaka seh kenca ia i je, melala kel sampatina kalak si enggo tek arah kiniulin Dibata si luar biasa.
28 Semangat ia mbuktiken alu jelas i lebe-lebe jelma si enterem maka ajaren kalak Jahudi e salah. Tuduhkenna man kalak e arah Kitap si Badia maka Jesus kap Kristus.+
Cataten i teruh
^ Ntah “sampati Paulus si megi gelah ngukuri kai si ipeseh.”
^ Maksudna, ingan pulung kalak Jahudi.
^ Eme kerna kai pe si cidahken Dibata ku bas pikiren sekalak jelma.
^ Ntah “janah sampatina kalak Jahudi ngangkai Kitap si Badia.”
^ Mungkin ku Jerusalem.
