Perbahanen Rasul-Rasul 19:1-41
19 Sanga Apolos+ bas Korinti, lawes Paulus ngelewati daerah pelosok janah seh ia i Epesus.+ I je, jumpa ia ras piga-piga murid
2 sungkunna kalak e, “Aloken kena nge kesah si badia sanga kena jadi kalak si tek?”+ Ngaloi kalak e, “Lang. Lenga pernah begi kami kerna kesah si badia.”
3 Sungkun Paulus ka, “Adi bage, peridin si apai si aloken kena?” Nina kalak e, “Peridin Johanes.”+
4 Nina Paulus, “Peridin Johanes jadi tanda maka kalak enggo ertobat,+ janah katakenna gelah tek kalak e man kalak si reh kenca ia,+ eme Jesus.”
5 Megi si e, kalak e iperidiken bas gelar Tuan Jesus.
6 Kenca tama Paulus tanna ku datas takal kalak e, nusur kesah si badia man kalak e,+ mulai kalak e ngerana bas erbage-bage bahasa ras ernubuat.+
7 Kalak e lit kira-kira 12 dilaki.
8 Telu bulan dekahna, lalap Paulus masuk ku ingan pulung kalak Jahudi.*+ Ngerana ia alu pang, erkhotbah ia janah usahakenna gelah tek kalak kerna Kerajan Dibata.+
9 Tapi lit piga-piga kalak si keras kepala janah la nggit tek, cikurakina ka Dalan Tuan+ i lebe-lebe jelma si enterem, emaka tadingken Paulus kalak e+ janah pisahkenna murid-murid arah kalak e nari. Tiap wari ia erkhotbah i gedung sekolah Tiranus.
10 Dua tahun dekahna lakokenna si enda. Emaka kerina kalak i Propinsi Asia, termasuk kalak Jahudi ras Junani megi kata Tuhan.
11 Terus lakoken Dibata perbahanen-perbahanen si luar biasa ras si dem kuasa arah tan Paulus.+
12 Emaka, adi itamaken sapu tangan ras baju si pernah pake Paulus ku kalak sakit,+ malem penakitna e janah malekat jahat si lit bas kalak e pe ndarat.+
13 Tapi lit piga-piga kalak Jahudi si erdalan-dalan guna mpelawes malekat jahat, cubakenna mpelawes malekat jahat make gelar Tuan Jesus. Nina, “Bas gelar Jesus si beritaken Paulus, kuperentahken kena ndarat arah ia nari.”+
14 Lit pitu anak Sekewa, imam kepala Jahudi. Kalak e pe ikut ngelakoken si bage.
15 Tapi nina malekat jahat e man kalak e, “Kutandai nge Jesus,+ janah kuteh ise Paulus.+ Tapi kena ise?”
16 Jenari lompat si kerasuken ndai ku kalak e, lawanna ras talukenna kalak e kerina. Emaka kiam kalak e kerina arah rumah e alu la ruis janah luka-luka.
17 Kerina kalak Jahudi ras Junani si tading bas Epesus meteh kejadin e. Mbiar kalak e kerina janah reh muliana me gelar Tuan Jesus.
18 Enterem kalak si enggo jadi pengikut Jesus reh guna ngakui ras nceritaken kerina perbahanen kalak e si jahat alu terus terang.
19 Enterem arah kalak e si mbarenda lit ilmu sihirna pe mpepulung buku-bukuna janah tutungna i lebe-lebe jelma si enterem.+ Kira kalak e kerina erga buku e, lit 50.000 logam pirak.
20 Emaka kata Jahwe* terus terberita alu cara si luar biasa janah erkuasa.+
21 Kenca kejadin e, rencanaken Paulus lawes ku Makedoni+ ras Akaya, jenari lawes ku Jerusalem.+ Nina, “Jerusalem nari, arus ka aku lawes ku Roma.”+
22 Emaka suruhna dua kalak si nampati ia ku Makedoni, eme Timotius+ ras Erastus.+ Tapi Paulus tading i Propinsi Asia piga-piga waktu dekahna.
23 Sanga si e, guntar Epesus+ perban Dalan Tuan.+
24 Lit sekalak dilaki gelarna Demetrius. Ia si erban patung-patung pirak rumah pertoton Artemis, si mereken melala keuntungen man tukang pirak temanna erdahin.+
25 Pepulungna teman-temanna e ras tukang-tukang si deban janah nina, “O teman-teman, pasti teh kena maka makmur kita perban bisnista enda.
26 Enggo idah kena ras begi kena maka enggo berhasil pengaruhi Paulus enterem kalak i Epesus+ ras menam kerina kalak i Propinsi Asia, gelah tek kalak e maka dibata-dibata si iban alu tan labo dibata si benar.+
27 Enda bahaya, sebap labo ngenca bisnista si pandangi kalak, tapi rumah pertoton Dewi Artemis pe lanai pagi ergai kalak. Dewi si isembah i belang-belang Propinsi Asia ras i belang-belang doni pe lanai pagi ipehaga.”
28 Megi si e, merawa kel kalak e janah nina alu sora megang, “Terpujilah Artemis, dewi kalak Epesus!”
29 Emaka guntar kota e. Kerina kalak si ngguntari e, nyerbu ku stadion janah sarenna ku je Gayus ras Aristarkus,+ kalak Makedoni si nemani Paulus bas perdalanenna.
30 Situhuna, dahi Paulus atena ku tengah-tengah jelma si enterem e, tapi la pediat murid-murid.
31 Piga-piga pengurus perayan ras pertandingen, si erteman ras Paulus, ngirim pesan man bana. Pindona gelah ula bahayaken Paulus bana alu masuk ku bas stadion e.
32 Kacau kel keadanna bas stadion e. Lit si serko bagenda, lit ka si serko bagah. Enterem ka kalak la tehna engkai maka ia pulung i je.
33 Emaka dorong kalak Jahudi Aleksander ku lebe-lebe jelma si enterem. Jenari ban Aleksander tanda alu tanna guna mbela diri.
34 Tapi kenca teh kalak e ia kalak Jahudi, serko kalak e kerina dua jam dekahna, “Terpujilah Artemis, dewi kalak Epesus!”
35 Dungna, petenang wali kota jelma si enterem e, jenari nina, “O kalak Epesus, ise kin si la metehsa maka kota kalak Epesus eme penjaga rumah pertoton Dewi Artemis ras patungna si ndabuh arah langit nari?
36 La lit si la ngakuisa. Emaka tenanglah kena, ukuri lebe kai si ate kena ban kena.
37 Kalak si baba kena enda labo rampokna rumah pertotonta janah labo hinana dewita.
38 Emaka, adi Demetrius+ ras teman-temanna sada dahin ngaduken sekalak jelma atena, lit kap gubernur-gubernur* bas wari-wari pengadilen, ku je sajalah kalak e siadun.
39 Tapi, adi lit tuntuten kena si deban, e arus icakapken bas sidang si resmi.
40 Sebap kejadin enda banci erban kita bahaya, banci kita ituduh erban pemberontaken. La lit alasenta engkai maka lit gerombolen si ngguntari enda.”
41 Kenca bage nina, suruhna mulih jelma si enterem e.
