Perbahanen Rasul-Rasul 21:1-40
21 Amin pe mberat akap kami sirang, terpaksa kami lawes nadingken kalak e. Jenari erlayar kami terus ku Kos. Paginna lawes kami ku Rodus janah i je nari berkat kami ku Patara.
2 I Patara lit sada kapal nandangi berkat ku Punike. Nangkihi kami kapal e, jenari erlayar kami.
3 Kenca teridah Pulau Kiprus i sebelah kiri kami, terusken kami erlayar ku Siria. Singgah kami i Tirus sebap muaten kapal e ibongkar i je.
4 Darami kami murid-murid i je. Kenca jumpa, tading kami ras kalak e pitu wari dekahna. Tapi, alu penegu-negu kesah si badia mulih-ulih kataken murid-murid man Paulus gelah ula ia lawes ku Jerusalem.+
5 Kenca seh waktuna kami lawes, terusken kami perdalanen kami. Kerina kalak e naruhken kami seh ku darat kota, termasuk diberu ras anak-anak. I pantai, sujud janah ertoto kami,
6 jenari ngata lawes kami, kalak e pe bage. Kenca si e, nangkihi kami kapal. Kalak e pe mulih ku rumahna.
7 Kenca erlayar kami arah Tirus, seh kami i Ptolomais. Dahi kami turang senina si lit i je janah tading kami sada wari ras kalak e.
8 Paginna, berkat ka kami janah seh i Kesarea. I je masuk kami ku rumah Pilipus janah tading ras ia. Ia sekalak perberita janah salah sada arah pitu dilaki si ipilih rasul-rasul i Jerusalem.+
9 Lit empat anakna singuda-nguda si banci ernubuat.+
10 Kenca piga-piga waktu kami tading i je, reh sekalak nabi arah Judea nari si gelarna Agabus.+
11 Dahi Agabus kami. Buatna ikat pinggang Paulus jenari iket Agabus nahena ras tanna sendiri, janah nina, “Enda me si ikataken arah kesah si badia, ‘Kalak si mpuna ikat pinggang enda, iiket kalak Jahudi i Jerusalem+ pagi alu cara si bagenda. Serahken kalak e ka pagi ia ku tan kalak arah bangsa si deban nari.’”+
12 Megi si e, kami ras kalak si lit i je mindo gelah Paulus ula lawes ku Jerusalem.
13 Tapi nina Paulus, “Engkai maka kena tangis? Engkai maka ban kena ate kena lemah semangatku?* Teklah kena, ula kenca iiket, mate i Jerusalem pe enggom aku siap guna gelar Tuan Jesus.”+
14 Perban la begikenna kami, lanai paksa kami ia,* janah ning kami, “Mbera-mbera peraten Jahwe* si terjadi.”
15 Kenca piga-piga waktu kami i je, sikapken kami kai si perlu bas perdalanen janah lawes kami ku Jerusalem.
16 Lit piga-piga murid arah Kesarea si ikut ras kami. Taruhkenna kami ku ingan kami erberngi eme rumah Menason arah Kiprus. Enggo ndekah ia jadi murid Jesus.
17 Kenca seh kami i Jerusalem, meriah ukur turang senina ngalo-ngalo kami.
18 Paginna, lawes kami ras Paulus njumpai Jakup,+ janah kerina pertua pe lit i je.
19 Kenca kataken Paulus mejuah-juah man kalak e, jelaskenna kerna kai si lakoken Dibata i tengah-tengah bangsa-bangsa arah pelayanenna.
20 Megi si e, muliaken kalak e Dibata, nina, “O Senina, bagi si idahndu, enggo ribun kalak Jahudi jadi kalak si tek janah semangat kel kalak e ndalanken Undang-Undang Musa.+
21 Tapi begi kalak e berita kerna kam, ajarindu kerina kalak Jahudi si tading bas bangsa si deban guna nadingken* Undang-Undang Musa. Suruhndu ka gelah ula sunat kalak e anak-anakna janah ula ngikutken adat kalak Jahudi.+
22 Gundari, kai si arus siban? Ugapa pe enggo tehna kam seh i jenda.
23 Lakokenlah kai si kataken kami enda: I jenda lit empat dilaki si enggo erjanji man Dibata.
24 Babalah kalak e janah ras-ras kena ngelakoken acara pembersihen diri. Galarilah kerina uang keluarna gelah banci pangkas kalak e bukna. Alu bage, kerina kalak meteh maka berita si begina kerna kam labo tuhu, perban mehuli perbahanenndu janah patuhindu Undang-Undang Musa.+
25 Man kalak si tek arah bangsa si deban nari, enggo kirim kami surat kerna keputusen kami, eme gelah pedauh kalak e dirina arah kai pe si enggo ipersembahken man berhala,+ arah dareh,+ arah binatang si mate icekak,*+ bage pe arah perbahanen seks si salah.”*+
26 Paginna baba Paulus empatna dilaki e janah ras-ras kalak e ndalanken acara pembersihen diri.+ Jenari masuk ia ku rumah pertoton guna ngataken ndigan warina acara pembersihen e dung, gelah bas wari e banci persembahken imam korban guna kalak e sekalak-sekalak.
27 Kenca nandangi dung acara pembersihen si pitu wari e, idah kalak Jahudi si i Propinsi Asia nari Paulus i rumah pertoton. Pengaruhi kalak e jelma si enterem janah tangkapna Paulus.
28 Serko kalak e, nina, “O kalak Israel, sampati kami! Dilaki enda si ngajari kerina kalak i japa pe guna ngelawan bangsata, Undang-Undangta, bage pe ingan enda. Babana ka kalak Junani ku rumah pertoton janah banna najis ingan si badia enda.”+
29 Perban enggo pernah idah kalak e Tropimus+ kalak Epesus radu ras Paulus i kota, emaka akap kalak e Paulus si maba Tropimus ku rumah pertoton.
30 Guntar kota e. Ayaki kalak e Paulus guna nangkapsa janah saren kalak e ia ndarat arah rumah pertoton. Jenari mis tutupna pintu-pintu rumah pertoton e.
31 Sanga bunuh kalak e atena Paulus, begi sekalak komandan pasuken tentera berita maka kerina kota Jerusalem enggo gejek.
32 Emaka mis babana prajurit-prajurit ras perwira-perwira, janah meter kalak e kiam ku tengah jelma si enterem e. Sanga idah jelma si enterem e komandan tentera ras prajurit-prajuritna, ngadi kalak e mekpeki Paulus.
33 Kenca si e, deheri komandan e Paulus. Suruhna prajurit-prajurit nangkap ia ras ngiket tanna alu dua rante.+ Jenari sungkuni komandan e jelma si enterem e kerna ise ia ras kai si enggo lakokenna.
34 Kerina jelma si enterem e ngaloi alu sora si megang, lit si ngataken bagenda lit ka si ngataken bagah. Perban gejekna, lanai teh komandan e kai situhuna si terjadi, emaka suruhna Paulus ibaba ku markas prajurit.
35 Kenca seh i tangga, terpaksa angkat prajurit-prajurit e Paulus perban enggo ngamuk kel jelma si enterem e.
36 Terus asak jelma si enterem e janahna serko, “Bunuh ia!”
37 Sanga nandangi baba prajurit-prajurit e Paulus ku markas, sungkun Paulus komandan e, “Banci aku ngerana man bandu?” Nina, “Tehndu bahasa Junani?
38 La kin kam kalak Mesir si mbaru-mbaru enda erban pemberontaken janah minpin 4.000 kalak si ersenjata* ndarat ku taneh mesawang?”*
39 Nina Paulus, “Situhuna aku kalak Jahudi,+ aku rakyat kota si penting eme Tarsus+ i Kiliki. Emaka mindo aku man bandu, pediat min aku ngerana man jelma si enterem e.”
40 Kenca pediat komandan e Paulus ngerana, tedis Paulus i tangga. Banna tanda alu tanna gelah sinik jelma si enterem e. Kenca sinik kalak e, ngerana ia bas bahasa Heber,+ nina,
Cataten i teruh
^ Ntah “tekadku.”
^ As. “sinik kami.”
^ Ntah “murtad arah.”
^ Ntah “si ibunuh tapi la icurcurken darehna.”
^ Ntah “maba rawit.”
^ Taneh si mbelang si jarang iingani.
