Perbahanen Rasul-Rasul 22:1-30
22 “Mejuah-juah, senina-senina ras bapak-bapak, begikenlah pembelanku.”+
2 Sanga begi kalak e Paulus ngerana bas bahasa Heber, reh sinikna kalak e kerina. Terusken Paulus ngerana,
3 “Aku kalak Jahudi,+ lahir bas Tarsus i Kiliki.+ Aku pernah sekolah bas kota enda, aku bekas murid Gamaliel.+ Ajarina aku gelah matuhi Undang-Undang nini bulangta.+ Bagi si lakoken kena gundari enda, aku pe semangat ngelayani Dibata.+
4 Mbarenda kusiksa seh ngasa mate kalak si ngikutken Dalan Tuan. Kuiket janah kupenjaraken kalak e, dilaki bage pe diberu.+
5 Imam si mbelin ras kerina peminpin banci mere kesaksin kerna si enda. Arah kalak e me kudat surat-surat guna ibereken man senina-senina si lit bas Damaskus. Aku sangana bas perdalanen ku jah guna ngiket kalak si ngikutken Dalan Tuan, jenari kubaba ku Jerusalem guna ihukum.
6 “Tapi bas perdalanen, sanga nandangi seh i Damaskus, kira-kira bas ciger wari, rempet lit terang langit nari ersinar ku sekelilingku.+
7 Jenari ndabuh aku ku taneh. Kubegi sora si ngataken, ‘Saul, Saul, engkai maka siksandu aku?’
8 Kujawap, ‘Ise kin kam, Tuan?’ Nina, ‘Aku kap Jesus, kalak Nasaret, si siksandu.’
9 Kalak si ras aku pe ngidah terang e, tapi la begina sora si ngerana man bangku.
10 Kenca si e, nungkun aku, ‘Kai si arus kulakoken, Tuan?’ Nina Tuan, ‘Tedislah, laweslah kam ku Damaskus, i je kari ikataken kerina si arus lakokenndu.’+
11 Perban terangna sinar e, pentang aku. Emaka seh aku i Damaskus perban itegu-tegu kalak si ras aku.
12 “I je lit sekalak dilaki si gelarna Ananias. Ia patuh man Undang-Undang Musa janah kerina kalak Jahudi ngataken maka ia kalak si mehuli.
13 Dahina aku janah nina, ‘O Saul, seninaku, erpengidahlah kam mulihi!’ Emaka mis aku erpengidah janah kuidah ia.+
14 Nina, ‘Dibata nini bulangta enggo milih kam guna meteh sura-suraNa janah guna ngidah ras megi sora kalak si ngelakoken kai si benar,+
15 sebap kam pagi jadi saksina man kerina kalak kerna kai si enggo idahndu ras begindu.+
16 Emaka kai nari si man timanndu? Iperidikenlah kam, bersihkenlah dirindu arah dosa-dosandu nari+ alu erlebuh man gelarna.’+
17 “Sanga aku enggo mulih ku Jerusalem+ janah sanga ertoto i rumah pertoton, kudat sada pengenehenen,*
18 nina Tuan Jesus man bangku, ‘Mislah kam ndarat arah Jerusalem nari, perban labo aloken kalak e kesaksinndu kerna aku.’+
19 Jenari ningku, ‘O Tuan, teh kalak e kap aku nge mbarenda si masuk ku ingan pulung kalak Jahudi,* guna menjaraken ras mekpeki kalak si tek man bandu.+
20 Sanga saksindu Stepanus ibunuh, aku pe setuju janah tedis aku i je guna njagai uis si arah darat kalak si munuh ia.’+
21 Tapi nina Tuan man bangku, ‘To laweslah, sebap kam kap si kusuruh ndahi bangsa-bangsa bas ingan si ndauh.’”+
22 Ngayak je ngenca begiken jelma si enterem e Paulus. Jenari serko kalak e, “Bunuh ia! Labo ia patut nggeluh bas doni enda!”
23 Perban serko kalak e, janah benterkenna uisna si arah darat, ras ambekkenna abu ku datas,+
24 suruh komandan e gelah Paulus ibaba ku markas prajurit. Suruhna ka gelah sanga ia icambuk, isungkuni ia gelah teh komandan e engkai maka serko jelma si enterem e ngelawan ia.
25 Tapi kenca iket kalak e Paulus guna icambuk, ngerana Paulus man perwira si tedis i je, “Banci kin cambuk kena warga negara Roma sope iadili?”*+
26 Megi si e, laporken perwira e man komandan, nina, “Dilaki enda warga negara Roma kap. Kai atendu si lakokenndu man bana?”
27 Deheri komandan e ia, janah nina, “Tuhu kin kam warga negara Roma?” Nina Paulus, “Tuhu.”
28 Nina komandan e, “Merga kel kugalari gelah aku jadi warga negara Roma.” Nina Paulus, “Tapi aku, mulai lahirku nari pe enggo jadi warga negara Roma.”+
29 Emaka sanga si e pe, prajurit-prajurit si isuruh nungkuni Paulus lawes nadingken ia. Komandan e pe mbiar kenca tehna maka Paulus si enggo iketna alu rante kepeken warga negara Roma.+
30 Paginna, perban merhat kel ia meteh alasen engkai maka kalak Jahudi nuduh Paulus, lepaskenna rante si ngiket Paulus. Jenari suruhna imam-imam kepala pulung ras kerina anggota Pengadilen Agama Jahudi.* Kenca si e, babana Paulus ku lebe-lebe kalak e.+
Cataten i teruh
^ Eme kerna kai pe si cidahken Dibata ku bas pikiren sekalak jelma.
^ Ntah “sope ikataken ersalah?”
^ As. “anggota Sanhedrin.”
