Perbahanen Rasul-Rasul 26:1-32
26 Nina Agripa+ man Paulus, “Gundari banci kam ngerana guna mbela dirindu.” Jenari angkat Paulus tanna janah belana dirina alu ngataken,
2 “O Raja Agripa, meriah ukurku banci ngerana i lebe-lebendu wari enda guna mbela diriku kerna kerina tuduhen kalak Jahudi.+
3 Terlebih ka perban tehndu kerina kebiasan ras persoalen kalak Jahudi. Emaka, mindo aku bandu gelah sabar kam megiken aku.
4 “Situhuna, kerna geluhku kitik-kitik nari sanga aku tading i tengah-tengah bangsaku bage pe i Jerusalem, teh kerina kalak Jahudi+
5 si enggo ndekah nandai aku. Adi nggit kalak e, banci ceritakenna kerna uga kin aku mbarenda selaku kalak Parisi,+ eme sekte si kerasna bas agama kami.+
6 Tapi gundari aku iadili perban erpengarapen aku man janji Dibata si ibereken man nini bulang kami.+
7 Janji enda seri ras janji si sangana arapken 12 suku bangsa kami. Enda me si erban tutus kel ate kalak e ngelakoken pelayanen si badia suari ras berngi. O Raja, e me sebapna maka aku ituduh kalak Jahudi.+
8 “Engkai maka la kena tek banci pegeluh Dibata mulihi kalak si enggo mate?
9 Mbarenda, aku pe tek maka arus kulakoken kai pe guna ngelawan gelar Jesus kalak Nasaret e.
10 E me si kulakoken i Jerusalem. Perban enggo kudat ijin arah imam-imam kepala,+ emaka enterem kalak si badia kupenjaraken.+ Aku pe setuju man hukumen mate si ibereken man kalak e.
11 Rusur kuhukum kalak e bas kerina ingan pulung kalak Jahudi.* Kupaksa kalak e gelah tadingkenna kinitekenna. Perban segatna ateku, kuayaki kalak e seh ku kota-kota si deban guna nyiksa kalak e.
12 “Guna si e, pernah aku lawes ku Damaskus alu kuasa ras perentah arah imam-imam kepala.
13 Tapi, o Raja, bas perdalanen, sanga ciger, kuidah terang arah langit nari si terangen asangken matawari. Terangina ku sekelilingku bage pe ku sekeliling kalak si radu ras aku.+
14 Kerina kami ndabuh ku taneh. Kubegi sora erlebuh man bangku bas bahasa Heber, ‘Saul, Saul, engkai maka siksandu aku? Adi terus lawanndu aku, sakitindu kap bandu.’*
15 Kujawap, ‘Ise kin kam, Tuan?’ Ngaloi Tuan, ‘Aku kap Jesus si siksandu.
16 Tedislah! Kucidahken diriku man bandu perban kupilih ateku kam jadi budak ras saksiku, gelah beritakenndu kerna kai si enggo idahndu ras kai si kutuduhken ateku man bandu.+
17 Kuselamatken pagi kam arah bangsa enda, bage pe arah bangsa si deban. Kusuruh kam ndahi kalak e+ gelah
18 bukandu matana,+ babandu ndarat arah kegelapen+ ku terang,+ bage pe arah kuasa Setan+ ku kuasa Dibata. Adi erkiniteken kalak e man bangku, iampuni pagi dosa-dosana+ janah alokenna warisen jadi umat si badia.’
19 “Bage me, o Raja Agripa, kupatuhi kai si kataken Jesus bas pengenehenen* e.
20 Emaka tangtangna aku erberita man kalak si lit i Damaskus,+ jenari man kalak si lit i Jerusalem,+ bage pe ku kerina daerah Judea. Kenca si e, ku bangsa si deban. Kuberitaken maka kerina kalak e arus ertobat ras mulih ku Dibata alu perbahanen si mbuktiken pertobatenna.+
21 E me sebapna tangkap kalak Jahudi aku bas rumah pertoton janah usahakenna munuh aku.+
22 Tapi kugejapken kel penampat Dibata, emaka seh wari enda pe terus aku erberita man kalak biasa ras kalak si terpandang. Si kupeseh kerna kai si nandangi terjadi menurut Ajaren Nabi-Nabi ras Tulisen Musa ngenca,+
23 eme adapi Kristus pagi kiniseran,+ janah ia pagi si pertama ipekeke arah si mate nari,+ beritakenna ka terang man bangsa enda ras man bangsa si deban.”+
24 Sanga ngerana denga Paulus, nina Pestus alu sora megang, “Enggo adon kam e, Paulus! Mbuesa pemeteh enggo erban kam adon!”
25 Ijawap Paulus, “Pestus si kuhamati, aku labo adon. Kai si kukataken e tuhu janah kuukuri nge lebe.
26 Situhuna, terus terang aku ngerana man Raja sebap tehna nge enda kerina. Tek aku la lit si la tehna, perban teridah nge kerina kai si terjadi.+
27 O Raja Agripa, tek nge kam man Ajaren Nabi-Nabi? Kuteh nge maka kam tek.”
28 Nina Agripa man Paulus, “Ntisik nari enggo banndu aku jadi kalak Kristen.”
29 Ngaloi Paulus, “Kutotoken man Dibata gelah la soal ntisik ntah pe ndekah, labo kam saja Raja, tapi kerina kalak si megiken aku wari enda banci bagi aku, tapi labo irante bagenda.”
30 Jenari, tedis raja, gubernur, Bernike, bage pe kerina kalak si kundul ras kalak e.
31 Muatna ndarat, ngerana kalak e sada ras si debanna, nina, “Labo lit kai pe si lakoken dilaki enda si erban ia patut ihukum mate ntah pe ipenjaraken.”+
32 Kenca si e, nina Agripa man Pestus, “Situhuna, banci ia ibebasken adi la pindona Kaisar si ngadili ia.”+
Cataten i teruh
^ As. “Adi terus lawanndu aku, kam bagi nukuli tongkat si iban arah logam.”
^ Eme kerna kai pe si cidahken Dibata ku bas pikiren sekalak jelma.
