Perbahanen Rasul-Rasul 27:1-44
27 Kenca enggo iputusken maka kami arus erlayar ku Italia,+ Paulus ras tahanen si deban iserahken man Julius, sekalak perwira arah pasuken Agustus.
2 Nangkihi kami kapal si reh i Adramiti nari. Kapal e erlayar ku pelabuhen-pelabuhen i Propinsi Asia. Aristarkus,+ kalak Makedoni si rehna arah Tesalonika nari pe ikut ras kami.
3 Paginna seh kami i Sidon. Mehuli perbahanen Julius man Paulus. Pediatna ia ndahi teman-temanna guna ngaloken penampat kalak e.
4 Perban erlawanen angin ras kapal kami, erlayar kami i deher Kiprus gelah terlindung kapal kami.
5 Jenari, lewati kami laut si mbelang i gedang-gedang Kiliki ras Pampilia. Kenca si e, seh kami i Mira si lit bas Likia.
6 I je, jumpa perwira e ras kapal si rehna i Aleksandria nari. Kapal e muatna berkat ku Italia. Emaka, suruh perwira e kami nangkih ku kapal e.
7 Piga-piga wari, erlayar kami alu manjar-anjar. Mesera kel akap kami, tapi dungna seh kami i Kenidos. Perban erlawanen angin ras kapal kami e, erlayar kami i deher Pulau Kreta si lit bas Salmone, gelah terlindung kapal kami.
8 Kenca pala-palai kami erlayar i tepi pulau, seh kami bas sada ingan si igelari Pelabuhen si Mejile, i deher kota Lesea.
9 Enggo melala keri waktu kami, janah waktu puasa guna Wari Pendamen+ pe enggo lewat. Adi terusken kami pe erlayar, bahaya nge. Emaka nina Paulus
10 man kalak e, “O teman-teman, kuakap bahaya nge adi terus kita erlayar. Labo kapal ras isina ngenca kari si bene, kita pe banci mate.”
11 Tapi la begiken perwira e Paulus, padin kapna megiken kata kapten ras si mpuna kapal e.
12 Perban pelabuhen e labo ingan si sikap sanga musim mbergeh, teremen kalak e erlayar atena gelah sanga musim mbergeh enggo bas pelabuhen Peniks kalak e, Peniks e sada pelabuhen i Pulau Kreta si pengalana ku timur laut ras tenggara.
13 Sanga rembus angin selatan alu manjar-anjar, akap kalak e nandangi seh i Peniks. Emaka angkat kalak e jangkar janah mulai erlayar ku pantai Pulau Kreta.
14 Tapi la ndekah kenca si e, rembus angin badai ngentam kapal e. Angin e igelari angin timur laut.*
15 Entamken angin badai e kapal kami, janah lanai kami banci terus erlayar ngelawan angin. Emaka, pediat kami babaken angin e kapal kami.
16 Gelah terlindung, erlayar kami i deher pulau si kitik, si igelari Kauda. Amin pe bage, arus denga pala-palai kami nelamatken sekoci* si lit bas pudi kapal e.
17 Kenca penangkihna sekoci ku kapal, gelah paguh kapal e, iket kalak e bagin kapal si arah teruh. Perban mbiar kalak e kandas kapal e i Sirtis,* longgarkenna nali layar kapal janah pediatna kapal e ibaba angin.
18 Perban terus entamken angin badai kapal e, paginna ambekken kalak e muaten kapal e gelah menahang kapal e.
19 Bas wari peteluken, ambekken kalak e piga-piga alat-alat kapal.
20 Piga-piga wari dekahna, matawari ras bintang la teridah, angin badai pe terus ngentam kami, dungna lanai kami ngarap banci nggeluh.
21 Kenca enggo ndekah kalak e la man, tedis Paulus i tengah-tengah kalak e janah nina, “O teman-teman, adi begiken kena min ndai kataku gelah la padah erlayar arah Kreta nari, labo min ndai perlu siadapi kiniseran ras kerugin si bagenda.+
22 Amin gia bage, kupindoken man kena, ula kena mbiar, sebap labo kari sekalak pe arah kena si mate. Kapal enda ngenca kari si hancur.
23 Berngi ndai, reh malekat+ ndahi aku janah tedis ia i deherku. Malekat e isuruh Dibata si kulayani alu pelayanen si badia,
24 nina malekat e, ‘Ula kam mbiar, Paulus! Kam arus ngadap man Kaisar,+ kerina kalak si erlayar ras kam pasti selamatken Dibata perban perkuah ateNa man bandu.’
25 Emaka ula kena mbiar, sebap tek aku pasti lakoken Dibata bagi si kataken malekat e man bangku.
26 Tapi, pasti babaken angin kapal enda ku sada pulau.”+
27 Kenca 14 berngi kapal kami bombang-bombang i Laut Adria, bas tengah berngi akap pegawai-pegawai kapal maka kami enggo ndeher ku daraten.
28 Ukur kalak e asa bagesna laut e. Bages laut e lit kira-kira 36 meter.* Teruskenna ka terleben sitik, kenca si e ukur kalak e ka, bagesna lit kira-kira 27 meter.*
29 Perban mbiar kalak e kandas i batu karang, dabuhkenna empat jangkar arah pudi kapal e, janah arapken kalak e meter min terang.
30 Tapi kiam ate pegawai-pegawai kapal e. Emaka penusurna sekoci arah kapal e nari, banna tempa-tempa jangkar nge si idabuhken arah lebe kapal e.
31 Perban si e, nina Paulus man perwira ras piga-piga prajurit, “Adi tadingken kalak e kin kapal enda, labo kena banci selamat.”+
32 Emaka potong prajurit-prajurit e nali-nali sekoci e, janah pediatna sekoci e ndabuhen.
33 Sanga nandangi terang, iahken Paulus kerina kalak e man, nina, “Enggo 14 wari dekahna kena tertima-tima, mbiar, janah kai pe la pan kena.
34 Emaka manlah kena lebe, enda guna kena ka nge, sebap labo sada lambar buk pe pagi bene arah takal kena.”
35 Kenca si e, buat Paulus roti, ertoto ia ngata bujur man Dibata i lebe-lebe kalak e kerina. Jenari cepik-cepikkenna, janah panna.
36 Emaka semangat kalak e janah man ia kerina.
37 Kami lit 276 kalak teremna bas kapal e.
38 Kenca enggo besur kerina, ambekken pegawai me gandum ku laut, gelah reh nahangna kapal e.+
39 Kenca terang wari, idah kalak e sada teluk.* Tapi la tehna i ja ingan e.+ Emaka usahakenna gelah seh i pantai e.
40 Potong kalak e nali jangkar-jangkar janah pediatna ndabuh ku laut. Longgarkenna nali si ngiket kemudi kapal. Jenari penangkihna layar si arah lebe kapal gelah baba angin kapal e ku pantai.
41 Tapi entam kapal e kersik si ergun-gun bas laut. Dungna kandas kapal e janah lanai banci erdalan. Bagin kapal si arah lebe enggo leket i je, bagin si arah pudi enggo pecah entam gelombang.+
42 Emaka, arih-arih prajurit-prajurit guna munuh kerina tahanen gelah ula lit si erlangi jenari kiam.
43 Tapi perban la ate perwira e Paulus ibunuh, larangna prajurit-prajurit munuh tahanen. Suruhna kalak si beluh erlangi leben lompat ku lau janah erlangi ku daraten.
44 Jenari kalak si la beluh erlangi suruhna make papan-papan ntah pe pecahen-pecahen kapal. Emaka selamat kalak e kerina ku daraten.+
Cataten i teruh
^ As. “igelari Euroakuilo.”
^ Ntah “kapal si kitik.”
^ As. “lit 15 depa.”
^ Ntah “pantai si lit kersikna.”
