Perbahanen Rasul-Rasul 5:1-42
5 Lit sekalak dilaki gelarna Ananias, gelar diberuna Sapira. Dayaken kalak e tanehna.
2 Tapi buniken Ananias deba hasil tukur taneh e janah sisana berekenna man rasul-rasul.+ Diberuna pe tehna kerna si e.
3 Sungkun Petrus ia, “O Ananias, engkai maka pediatndu pengaruhi Setan kam, si erban kam pang erbual+ man kesah si badia,+ janah bunikenndu deba hasil tukur taneh e?
4 La kin tanehndu nge e? Kenca dayakenndu, me ate-atendu nge senna? Engkai maka seh naring kel ukurndu erban bagenda? Labo manusia si bualindu, tapi Dibata nge si enggo bualindu.”
5 Megi si e, mbulak Ananias janah mate. Emaka mbiar kel kerina kalak si megi kejadin e.
6 Jenari tedis piga-piga anak perana si i je, balutina mayat e, babana ndarat, janah kuburkenna.
7 Kira-kira telu jam kenca si e, reh diberu Ananias. Tapi la tehna kai si enggo terjadi.
8 Sungkun Petrus ia, “Tuhu nge asenda sen taneh kena ndai?” Nina, “Ue, tuhu.”
9 Emaka nina Petrus, “Engkai maka sada arih kena ncubai kesah Jahwe?* Nenlah, kalak si nguburken dilakindu enggo i pintu, kam pe babana me ku darat.”
10 Mis ia mbulak i deher nahe Petrus janah mate. Sanga masuk anak perana e, dapetina ia enggo mate. Jenari babana ia ndarat janah kuburkenna i deher dilakina.
11 Emaka mbiar kel kerina perpulungen ras kerina kalak si megi kejadin e.
12 Terus lakoken rasul-rasul melala tanda ras mukjizat i tengah-tengah jelma si enterem.+ Kerina kalak e rusur pulung i Serambi Salomo.+
13 Kalak e ipujiken jelma si enterem, amin pe lit si la pang ikut ras kalak e.
14 Reh teremna kalak si tek man Tuan, lit dilaki ras diberu.+
15 Kalak sakit pe ibaba ku pasar, iamparken i datas ingan medem ras amak, gelah sanga lewat Petrus, banci kalak e kena bayangennalah gia.+
16 Enterem kalak arah kota-kota i sekeliling Jerusalem pe reh maba kalak sakit ras kalak si rasuki malekat-malekat jahat. Kerina kalak e ipepalem.
17 Tapi cian kel ate imam si mbelin ras kerina pengikutna arah sekte Saduki nari. Emaka tedis kalak e,
18 tangkapna rasul-rasul e janah masukkenna ku penjara.+
19 Tapi berngina, talangi malekat Jahwe* pintu penjara e,+ babana kalak e ndarat, nina,
20 “Laweslah, tedislah bas rumah pertoton. Teruslah ceritaken man jelma si enterem berita kerna kegeluhen enda.”
21 Kenca megi si e, pepagina masuk kalak e ku rumah pertoton janah mulai ngajar i je.
Kenca seh imam si mbelin ras pengikutna, pepulungna kerina anggota Pengadilen Agama Jahudi* ras kerina peminpin bangsa Israel. Suruhna petugas penjara maba rasul-rasul ku lebe-lebe kalak e.
22 Tapi sanga seh petugas-petugas e i penjara, lanai dapetina rasul-rasul i je. Emaka mulih ia janah laporkenna,
23 nina, “Dapeti kami penjara e ikunci janah kerina si erjaga lit i lebe pintu. Tapi sanga talangi kami, ise pe la lit bas.”
24 Megi si e, kemamangen kepala penjaga rumah pertoton ras imam-imam kepala, sebap la tehna kai si nandangi terjadi.
25 Tapi reh sekalak maba berita, “Kalak si imasukken kena ku penjara sangana bas rumah pertoton, tedis kalak e i je janah ajari kalak e jelma si enterem.”
26 Emaka, lawes kepala penjaga ras petugas-petugasna. Jenari babana rasul-rasul e tapi labo alu cara ipaksa sebap mbiar ia benteri jelma si enterem.+
27 Emaka babana rasul-rasul e janah suruhna tedis i lebe-lebe Pengadilen Agama Jahudi. Jenari sungkun imam si mbelin kalak e,
28 nina, “Enggo jelas-jelas larang kami kena ngajar bas gelar dilaki e,+ tapi enggo dem ban kena Jerusalem enda alu pengajaren kena, janah tuduh kena kami si erban dilaki e mate.”+
29 Ngaloi Petrus ras rasul-rasul si deban, “Arus kami patuhen man Dibata selaku penguasa asangken man manusia.+
30 Dibata nini bulangta enggo mpekeke Jesus si bunuh kena alu makuken ia bas tiang.*+
31 Angkat Dibata ia ku sebelah kananNa.+ Ia jadi Kalak si Ipilih guna mere kegeluhen+ ras jadi Juru Selamat,+ gelah ertobat kalak Israel janah dosa-dosana pe iampuni.+
32 Kami kap si jadi saksi bas kerina e,+ bage pe jadi saksi kerna kesah si badia+ si enggo bereken Dibata man kalak si patuh man baNa selaku penguasa.”
33 Megi si e, merawa kel kalak e, bunuhna atena rasul-rasul.
34 Tapi tedis sekalak anggota Pengadilen Agama Jahudi, eme kalak Parisi si gelarna Gamaliel.+ Ia guru Undang-Undang Musa si hamati kerina kalak. Perentahkenna gelah rasul-rasul e ibaba ku darat ntisik.
35 Jenari nina, “O kalak Israel, ukurilah manjar-anjar kai si ate kena iban kena man kalak e.
36 Mbarenda lit sekalak dilaki si gelarna Tudas. Katakenna ia kalak si penting janah lit kira-kira 400 kalak pengikutna. Tapi ia ibunuh, dungna kerina pengikutna merap janah lanai lit.
37 Kenca ia, sanga pendaftaren penduduk, reh ka Judas, ia kalak Galilea, janah lit ka pengikutna. Dungna ia pe kernep janah kerina pengikutna merap.
38 Emaka bas keadan si gundari enda, kukataken man bandu, ula campuri urusen kalak e janah pediat sajalah. Sebap adi rencana ras pendahinna e arah manusia nari, kernep nge pagi.
39 Tapi adi arah Dibata nari, labo banci kernepken kena.+ Sebalikna, ula kari Dibata nge si lawan kena.”+
40 Ikutken kalak e kata-kata Gamaliel. Emaka, dilona rasul-rasul e, cambukna,*+ janah larangna ngerana bas gelar Jesus, jenari bebaskenna.
41 Emaka lawes rasul-rasul e arah Pengadilen Agama Jahudi nari. Meriah ukur kalak e+ perban enggo metunggung* ia akap Dibata ihina bas gelar Jesus.
42 Tiap wari kalak e terus ngajar ras mberitaken berita si meriah kerna Kristus eme Jesus,+ bas rumah pertoton bage pe arah rumah ku rumah.+
