Perbahanen Rasul-Rasul 6:1-15
6 Bas sada wari, sanga reh teremna murid-murid, jungut-jungut kalak Jahudi si make bahasa Junani man kalak Jahudi si make bahasa Heber, sebap janda-janda si make bahasa Junani la datna baginna tiap wari.+
2 Emaka pepulung 12 rasul-rasul e kerina murid-murid, janah nina, “La cocok* adi tadingken kami dahin mberitaken kata Dibata perban mbagiken pangan.+
3 Emaka, o senina-senina, pilihlah pitu dilaki arah kena nari, si itandai kena ia selaku kalak mehuli+ si dem alu kesah si badia ras pentar.+ Lantik kami kari ia guna ngaturken dahin si penting e.+
4 Alu bage, banci gunaken kami kerina waktu ras gegeh kami guna ertoto ras ngajarken kata Dibata.”
5 Meriah akap kerina murid-murid megi kata-kata e. Emaka pilihna Stepanus, kalak si paguh kinitekenna janah dem alu kesah si badia, bage pe Pilipus,+ Prokorus, Nikanor, Timon, Parmenas, ras Nikolaus si enggo ngikutken agama Jahudi arah Antiokia nari.
6 Ibaba me kalak enda ku rasul-rasul, janah kenca ertoto, tama rasul-rasul tanna ku datas kalak e.+
7 Hasilna, kata Dibata terus tersebar,+ janah seh kel buena murid-murid si tambah+ i Jerusalem. Imam-imam pe enterem si mulai ngaloken kiniteken e.+
8 Stepanus si dem alu kuasa ras kiniulin Dibata, erban melala mukjizat ras tanda si luar biasa i tengah-tengah jelma si enterem.
9 Tapi, kalak Kireni, Aleksandria, Kiliki, Asia, ras piga-piga dilaki arah kalak Jahudi si igelari Ingan Pulung Kalak Jahudi* si Ibebasken, reh ndahi Stepanus guna sijawapen.
10 Tapi la ngasup kalak e ngelawansa perban ia dem alu kepentaren ras ngerana alu penampat kesah si badia.+
11 Emaka alu erbuni-buni, pengaruhi kalak e kalak si deban guna ngataken, “Begi kami hinana Musa ras Dibata.”
12 Pengaruhi kalak e jelma si enterem, peminpin-peminpin, ras ahli-ahli Undang-Undang Musa. Mis dahi kalak e Stepanus, tangkapna alu paksa, janah babana ku Pengadilen Agama Jahudi.*
13 Kenca si e, babana saksi-saksi palsu si ngataken, “La erngadi-ngadi hina dilaki e ingan si badia enda ras Undang-Undang Musa.
14 Contohna, pernah begi kami katakenna maka sontarken Jesus kalak Nasaret pagi ingan enda janah gantina kebiasan si enggo bereken Musa man banta.”
15 Kerina kalak si kundul bas Pengadilen Agama Jahudi natap Stepanus, janah idah kalak e ayo Stepanus bagi ayo malekat.
