Perbahanen Rasul-Rasul 7:1-60
7 Sungkun imam si mbelin ia, “Tuhu nge kerina e?”
2 Nina Stepanus, “Bapak-bapak ras senina-senina, begiken aku. Ope lenga nini bulangta Abraham tading i Haran,+ cidahken Dibata si mulia diriNa man bana sanga ia i Mesopotami.
3 Nina Dibata man bana, ‘Laweslah kam arah negrindu nari, arah keluargandu, jenari laweslah kam ku negri si Kutuduhken pagi man bandu.’+
4 Emaka tadingkenna negri kalak Kaldea janah tading ia i Haran. Jenari kenca mate bapakna,+ suruh Dibata ia pindah ku negri enda, ingan kena tading gundari.+
5 La lit sitik pe bereken Dibata taneh e man bana jadi warisen, sada tapak nahe pe lang. Tapi erjanji Dibata maka berekenNa pagi taneh e jadi jangna ras keturunenna,+ amin pe sanga si e la lit anakna.
6 Kataken Dibata ka maka keturunenna jadi kalak asing pagi i negri si deban, iperbudak ras itindas kalak 400 tahun dekahna.+
7 Nina Dibata ka, ‘Kuhakimi pagi bangsa si erban kalak e jadi budak.+ Kenca si e, ndarat pagi kalak e janah lakoken kalak e pelayanen si badia man bangKu i jenda.’+
8 “Ban Dibata ka perjanjin sunat ras Abraham.+ Emaka sunat Abraham anakna Isak+ bas wari si pewaluhken kenca ia lahir.+ Isak kap bapak Jakup* ras Jakup bapak 12 nini bulangta.*
9 Cian ate kalak e man Jusup+ emaka dayakenna ia ku Mesir.+ Tapi Dibata ras ia,+
10 bebaskenNa ia arah kerina kiniseranna. I lebe-lebe raja Mesir,* ban Dibata gelah ngena ate raja man bana janah bereken Dibata kepentaren man ia. Emaka lantik raja Mesir ia jadi si erkuasa bas Mesir bage pe istanana.+
11 Bas pudi wari terjadi kelihen ras kiniseran si mbelin i belang-belang Mesir ras Kanaan janah la banci dat nini bulangta pangan.*+
12 Kenca begi Jakup maka lit persedian pangan i Mesir, suruhna nini bulangta e lawes ku je.+
13 Sanga pedua kaliken kalak e ku Mesir, kataken Jusup kerna ia man senina-seninana, dungna tandai raja Mesir keluarga Jusup.+
14 Emaka kirim Jusup pesan gelah reh bapakna eme Jakup ras kerina keluargana ku Mesir,+ teremna lit 75 kalak.+
15 Berkat me Jakup ku Mesir+ janah bas pudi wari mate ia i je,+ bage ka pe nini bulangta.+
16 Tulan-tulan kalak e ibaba ku Sihem, itamaken ku bas kuburen si tukur Abraham alu piga-piga sen pirak arah anak-anak Hamor i Sihem.+
17 “Kenca enggo ndeher waktuna janji Dibata man Abraham terjadi, bangsa e reh teremna janah ertambah-tambah i Mesir,
18 seh ngasa lit raja si deban merentah i Mesir, si la nandai Jusup.+
19 Tipu raja e bangsata, siksana, janah ipaksana nini bulangta ngambekken anakna si mbaru lahir gelah mate.+
20 Sanga lahir Musa, merupa kel* ia. Telu bulan dekahna, ia ipebelin i rumah bapakna.+
21 Tapi sanga terpaksa ibuangken orang tuana ia,+ buat putri raja Mesir ia janah pebelinna bagi anakna.+
22 Emaka iajarken man Musa kerna kerina kepentaren kalak Mesir. Kata-katana erkuasa ras perbahanenna luar biasa.+
23 “Sanga umurna 40 tahun, turah ukurna ndahi senina-seninana eme kalak Israel.+
24 Sanga idahna lit kalak Mesir si la adil perbahanenna man seninana, belana seninana e, janah bunuhna kalak Mesir ndai.
25 Akap Musa angka senina-seninana e maka selamatken Dibata pagi kalak e alu tan Musa, tapi la angkai kalak e.
26 Pepagina idahna kalak Israel sangana rubati janah dahina. Cubakenna ndamekensa, nina, ‘Kena ersenina. Engkai maka kena rubat?’
27 Tapi sekalak si mekpek temanna e, sorongkenna Musa, nina, ‘Ise si milih kam jadi peminpin ras hakim kami?
28 Me labo atendu munuh aku bagi si lakokenndu man kalak Mesir nderbih?’
29 Megi si e, kiam Musa janah jadi kalak asing i taneh Midian. I je lahir dua anakna dilaki.+
30 “Kenca 40 tahun, dahi sada malekat me Musa i taneh mesawang* i deher Gunung Sinai. Malekat e teridah bagi gara api si nutung peren si erduri.+
31 Mamang kel ate Musa ngidah si e. Sanga deherina guna mereksasa, begina sora Jahwe,* si ngataken,
32 ‘Aku kap Dibata nini bulangndu, Dibata Abraham, Isak, ras Jakup.’+ Nggirgir Musa janah lanai ia pang mereksasa terdauhen.
33 Nina Jahwe* man bana, ‘Lepasken selopndu, sebap kam sangana tedis bas taneh si badia.
34 Enggo Kuidah uga umatKu itindas i Mesir, janah enggo Kubegi kalak e nderkuh,+ emaka nusur Aku nelamatken kalak e. Gundari, Kusuruh kam ku Mesir.’
35 Musa enda me si tulak kalak e, alu ngataken, ‘Ise si milih kam jadi peminpin ras hakim?’+ Ia me si suruh Dibata+ arah malekat si teridah man bana i rambah duri si gara guna jadi kalak si nelamatken ras peminpin.
36 Babana kalak e ndarat,+ banna melala mukjizat ras tanda-tanda i Mesir,+ i Laut Merah,+ bage pe i taneh mesawang* 40 tahun dekahna.+
37 “Musa enda me si ngataken man kalak Israel, ‘Lantik Dibata pagi man kena sekalak nabi arah bangsata si bagi aku guna kena.’+
38 Ia me si lit i tengah-tengah kalak Israel i taneh mesawang,* radu ras nini bulangta, bage pe malekat+ si ngerana man bana+ i Gunung Sinai. Alokenna kata-kata si badia si rasa lalap guna ipeseh man banta.+
39 Tapi la patuhi nini bulangta ia janah tulakna.+ Bas pusuh kalak e lit denga sura-surana mulih ku Mesir.+
40 Emaka nina man Harun, ‘Banlah dibata-dibata guna minpin kami. Sebap la teh kami kai si terjadi man Musa, si minpin kami ndarat arah Mesir nari.’+
41 Ban kalak e sada patung anak lembu, jenari persembahkenna korban man berhala e. Erpesta kalak e guna ngerayaken kai si enggo ibanna.+
42 Emaka tadingken Dibata kalak e, pediatNa kalak e nembah matawari, bulan, ras bintang-bintang i langit,+ bagi si tertulis bas Ajaren Nabi-Nabi, ‘O kalak Israel, 40 tahun dekahna kena i taneh mesawang,* la bereken kena man bangKu persembahen ras korban.
43 Tapi si baba kena eme kemah Moloh+ ras bintang Dewa Repan, eme patung-patung si ban kena guna isembah. Perban si e, Kuban kena itaban ku ingan si dauhen asangken Babilon.’+
44 “Sanga nini bulangta i taneh mesawang,* lit kap kemah kesaksinna. Kemah e suruh Dibata iban Musa menurut contoh si enggo idahna.+
45 Aloken nini bulangta kemah e jadi jangna, janah radu kalak e mabasa ras Josua ku taneh bangsa si deban,+ si pelawes Dibata i lebe-lebe nini bulangta nari.+ Kemah e tetap lit i je seh ngasa jaman Daud.
46 Meriah ukur Dibata iban Daud janah pindona kehamaten guna mbangun rumah man Dibata Jakup.+
47 Tapi si mbangun rumah man Dibata eme Salomo.+
48 Amin pe bage, Dibata Si Meganjangna labo tading bas rumah si ban manusia,+ bagi si tulisken sekalak nabi,
49 ‘Surga kap tahtaKu,+ janah doni kap ingan naheKu.+ Rumah si uga kin ate kena bangun kena man bangKu? nina Jahwe.* I ja kin inganKu tading?
50 La kin tanKu nge si erban si e kerina?’+
51 “O kena kalak si keras kepala, si pusuh ras cupingna tertutup.* Lalap lawan kena kesah si badia bagi si enggo lakoken nini bulang kena.+
52 Nabi si apai kin si la siksa nini bulang kena?+ Bunuh kalak e kalak si mberitaken kerna kerehen kalak si benar,+ eme kalak si hianati kena ras bunuh kena.+
53 Aloken kena Undang-Undang Musa si ipeseh arah malekat-malekat,+ tapi la dalanken kena.”
54 Megi si e, melas kel pusuh kalak e janah erderep ipenna natap Stepanus.
55 Tapi Stepanus si dem alu kesah si badia natap ku langit, idahna kemulian Dibata. Idahna ka Jesus tedis i sebelah kanan Dibata.+
56 Nina Stepanus, “Kuidah langit talang, tedis Anak manusia+ i sebelah kanan Dibata.”+
57 Megi si e, serko kalak e asa gegehna janahna nutup cupingna. Jenari ras-ras kalak e nyerang Stepanus.
58 Kenca sarenna ia ku darat kota, benterina alu batu.+ Tamaken saksi-saksi palsu e+ uisna si arah darat i deher nahe sekalak anak perana si gelarna Saul.+
59 Sanga benteri kalak e Stepanus alu batu, ertoto ia, “O Tuan Jesus, alokenlah kesahku.”
60 Jenari, sujud ia janah nina alu sora megang, “O Jahwe,* ula min hukum kalak e perban dosana e.”+ Kenca katakenna bage, medem ia bas kematen.
Cataten i teruh
^ Ntah banci saja “Bage ka si lakoken Isak man Jakup.”
^ Ntah “12 kepala keluarga.”
^ As. “Paro; Firaun.” Penggelaren man raja Mesir.
^ Ntah “gandum.”
^ Ntah “mejile kel akap Dibata.”
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ Taneh si mbelang si jarang iingani.
^ As. “la isunat.”
