Perbahanen Rasul-Rasul 8:1-40
8 Saul setuju kerna pembunuhen Stepanus.+
Sanga si e, mekelek kel penindasen si adapi runggun si lit i Jerusalem. Kerina murid-murid selain rasul-rasul, merap ku belang-belang Judea ras Samaria.+
2 Tapi, kalak si erkiniteken maba Stepanus guna ikuburken janah tangis kel kalak e kerina.
3 Sanga si e, itindas Saul runggun. Masukina tiap rumah janah sarenna dilaki bage pe diberu ku darat, jenari masukkenna ku penjara.+
4 Amin pe bage, kalak si merap ndai mberitaken berita si meriah kerna kata Dibata ku belang-belang negri e.+
5 Contohna Pilipus. Lawes ia ku kota* Samaria+ janah mulai beritakenna kerna Kristus i je.
6 Tutus kel ate jelma si enterem megiken Pilipus ras mperdiateken mukjizat-mukjizat si ibanna.
7 Sanga si e, malekat-malekat jahat serko janah ndarat arah enterem kalak si rasukina.+ Enterem ka kalak si lumpuh ras si pincang ipepalem.
8 Emaka, meriah kel akap kalak bas kota e.
9 Bas kota e lit sekalak dilaki si gelarna Simon. Mbarenda nari enggo takjup banna kalak Samaria alu ilmu sihirna. Katakenna ka ia kalak si hebat.
10 Kerina kalak, mulai si kitik nari seh ku si galang megiken ia, janah nina, “Dilaki enda kap Kuasa Dibata, si igelari Hebat.”
11 Emaka lalap begiken kalak e ia perban enggo mbarenda nari takjup kalak e banna alu ilmu sihirna.
12 Tapi sanga beritaken Pilipus berita si meriah kerna Kerajan Dibata+ ras kerna gelar Jesus Kristus, enterem dilaki bage pe diberu dungna tek man bana janah iperidiken.+
13 Simon pe jadi kalak si tek. Kenca iperidiken, terus ikutkenna Pilipus.+ Takjup ia ngidah melala mukjizat ras perbahanen si dem kuasa si ban Pilipus.
14 Sanga begi rasul-rasul i Jerusalem maka kalak bas Samaria enggo ngaloken kata Dibata,+ suruhna Petrus ras Johanes ndahi kalak e.
15 Emaka lawes duana rasul e janah totokenna gelah kalak si lit i je ngaloken kesah si badia,+
16 sebap lenga lit sada pe arah kalak e si ngaloken kesah si badia. Kalak e iperidiken bas gelar Tuan Jesus saja ngenca.+
17 Emaka tama dua rasul e tanna ku datas kalak e,+ jenari aloken kalak e kesah si badia.
18 Idah Simon aloken kalak e kesah si badia sanga tama rasul-rasul tanna ku datas kalak e, janjikenna mere sen man rasul-rasul e,
19 nina, “Bere ka min man bangku kuasa si bage, gelah man ise pe kutamaken tanku banci alokenna kesah si badia.”
20 Tapi nina Petrus man bana, “Kerneplah kam ras senndu ena, sebap akapndu banci tukurndu pemere Dibata alu sen.+
21 La lit baginndu bas si enda, sebap idah Dibata la mehuli ukurndu.
22 Emaka ertobatlah kam arah kesalahenndu e nari. Pindolah man Jahwe,* mbera-mbera ampuniNa perukurenndu si jahat e,
23 sebap kuidah kam dem alu cian ate* janah lalap atendu ngelakoken kai si salah.”
24 Ngaloi Simon, “Totokenlah aku, pindolah man Jahwe* gelah kai pe si kataken kena e la terjadi man bangku.”
25 Kenca ersaksi ras mpeseh kata Jahwe* i belang-belang daerah e, mulih kalak e ku Jerusalem janahna mberitaken berita si meriah ku kuta-kuta kalak Samaria.+
26 Tapi ngerana malekat Jahwe*+ man Pilipus, nina, “Laweslah kam ku selatan, ku dalan si turun-turunen Jerusalem nari ku Gasa.” (Dalan enda bas gurun pasir.)
27 Emaka lawes Pilipus janah jumpa ia ras sekalak dilaki arah Etiopia nari bas dalan. Dilaki e pejabat bas pemerentahen Kandake, ratu Etiopia, ia si ngurus kerina erta ratu. Lawes ia ku Jerusalem guna nembah Dibata,+
28 janah gundari ia bas perdalanen mulih. Kundul ia bas gereta kudana janahna mbaca kitap Nabi Jesaya alu ersora.
29 Emaka, arah kesah si badia ikataken man Pilipus, “To deheri gereta ah.”
30 Kiam Pilipus i samping gereta e janah begina dilaki e mbaca kitap Nabi Jesaya. Sungkun Pilipus ia, “O Pak, angkandu nge kai si bacandu e?”
31 Nina, “Ja nge banci kuangka, adi la lit si ngajari aku?” Jenari pindokenna gelah nangkih Pilipus ku geretana janah kundul ras ia.
32 Ayat si sangana bacana eme: “Bagi sada biri-biri, ibaba ia guna igeleh, ras bagi anak biri-biri si la ersora sanga ipangkas mbuluna, sitik pe la ia ngerana.+
33 Sanga ia ihina, ia ihakimi alu la adil.+ La lit si banci njelasken kerna asal usulna perban geluhna ibuat pagi arah doni enda nari.”+
34 Nina pejabat e man Pilipus, “Tolong kataken man bangku, ise nge maksud nabi e? Kalak si deban nge ntah ia?”
35 Emaka mulai Pilipus ngerana, arah ayat e nari pesehna berita si meriah kerna Jesus.
36 Bas dalan, seh kalak e bas ingan si mbue launa, nina pejabat e, “Nenlah, lit i je lau! Engkai maka la iperidiken saja aku?”
37 * ——
38 Emaka suruh pejabat e gelah geretana ipengadi, kenca si e nusur Pilipus ras pejabat e ku lau, jenari peridiken Pilipus ia.
39 Kenca ndarat kalak e arah lau nari, mis baba kesah si badia Jahwe* Pilipus lawes, jenari lanai idah pejabat e ia. Kenca si e, terusken pejabat e perdalanenna alu meriah ukur.
40 Pilipus enggo seh i Asdot. Siarina kerina daerah e janah terus beritakenna berita si meriah ku kerina kota ngasa seh ia i Kesarea.+
