Perngandungen 3:1-66
א [Alep]
3 Aku kap si ngidah kesusahen perban hukum Dibata kita alu rawaNa si gara.
2 PelawesNa aku janah banNa aku erdalan bas gelap labo bas terang.+
3 Payo, gedang-gedang wari lalap aku entamNa.+
ב [Bet]
4 BanNa keri dagingku ras kulitku.
PenggelkenNa tulan-tulanku.
5 KepungNa aku, tamakenNa sinuan-sinuan si lit racunna+ bage pe kesusahen i sekelilingku.
6 PaksaNa aku tading bas ingan-ingan si gelap, bagi kalak si enggo ndekah mate.
ג [Gimel]
7 Tempa-tempa kurungNa aku alu tembok, emaka la banci aku kiam.
IketNa naheku alu rante tembaga si mberat.+
8 Sanga serko aku mindo penampat, la begikenNa totoku.+
9 AmbatiNa dalanku alu batu-batu si ipotong.
BanNa dalanku belok-belok.+
ד [Dalet]
10 TimaiNa aku guna nyergap aku bagi beruang, bagi singa si ersikap guna nyerang.+
11 PaksaNa aku nilah arah dalan janah hancurkenNa aku.*
BanNa aku itadingken.+
12 BengkokkenNa busur panahNa janah banNa aku jadi sasaren anak panahNa.
ה [He]
13 PanahNa ginjalku alu anak panah si lit bas inganna.
14 Aku jadi pertawa-tawan kerina kalak. Rende kalak e nokohi aku gedang-gedang wari.
15 BanNa aku besur alu kai si pagit. BanNa aku lalap nginem kai si pagit.+
ו [Waw]
16 BanNa penggel ipenku perban batu kerikil.
BanNa aku mungkuk ku taneh.+
17 BuatNdu kedamen arah aku nari. Enggo lupa aku nanamna ermeriah ukur.
18 Ningku, “Kemulianku enggo bene, arapenku man Jahwe pe enggo bene.”
ז [Zayin]
19 Inget min uga kesusahenku janah la lit inganku tading,+ inget min maka enggo kupan sinuan-sinuan si pagit ras si lit racunna.+
20 Pasti pagi ingetNdu janah mungkuk Kam nampati aku.+
21 Lalap kuinget kerna si e bas pusuhku. E me sebapna sabar aku nimai Kam.+
ח [Het]
22 Perban kekelengen Jahwe si setia, la kita kernep.+
Perkuah ateNa la pernah keri.+
23 Si e kerina lalap mbaru tiap erpagi-pagi,+ kesetianNdu seh kel buena.+
24 Ningku, “Jahwe kap baginku,+ e me sebapna sabar aku nimai Ia.”+
ט [Tet]
25 Jahwe mehuli man kalak si erpengarapen man baNa,+ man kalak si terus ndarami Ia.+
26 Mehuli kel adi sekalak jelma sabar nimai+ keselamaten arah Jahwe nari.+
27 Mehuli kel adi sekalak jelma maba baban si mberat* sanga ia nguda denga.+
י [Yod]
28 Sisadalah ia kundul janah tetap ia sinik sanga tamaNa baban e man bana.+
29 Sujudlah ia ngasa seh ayona ku taneh.+ Banci saja lit denga arapen.+
30 Pediatnalah ayona ipekpek kalak. Pediatnalah ia tuhu-tuhu ihina.
כ [Kap]
31 Sebap labo pagi rasa lalap kita itulak Jahwe.+
32 Amin gia enggo banNa kita sedih, pasti pagi mekuah ateNa, perban kekelengenNa si setia seh kel buena.+
33 Labo meriah ukurNa erban manusia susah ntah pe sedih.+
ל [Lamed]
34 Kalak si merjaki kerina tahanen bas negri enda,+
35 Kalak si ngerebut keadilen arah lebe-lebe Dibata Si Meganjangna,+
36 Kalak si putarbalikkenna keadilen bas pengadilen,La ngena ate Jahwe perbahanen si bage.
מ [Mem]
37 Adi labo Jahwe si merentahkenca, ise kin si ngasup merentahkenca gelah banci lit si terjadi?
38 Dibata Si MeganjangnaLabo ngataken kai si la mehuli radu ras si mehuli.
39 Adi sekalak jelma ngenanami akibat dosana, arus kin ia mengeluh?+
נ [Nun]
40 Mari sipereksa ras siselidiki lagu langkahta,+ janah mari kita mulih ku Jahwe.+
41 Mari sipindo alu bulat ukur man Dibata si lit i surga janah siangkat tanta guna ertoto,+
42 “Kami enggo erdosa ras mberontak+ janah la ampuniNdu kami.+
ס [Samek]
43 Merawa Kam janah la begikenNdu toto kami.+
AyakiNdu kami jenari bunuhNdu janah la ateNdu mekuah.+
44 HalangiNdu dalan ku Kam alu embun, emaka toto kami la banci seh.+
45 BanNdu kami jadi sampah ras kotoren i tengah bangsa-bangsa.”
פ [Pe]
46 Kerina musuh-musuh kami ngerana* guna nokohi kami.+
47 Lalap kami mbiar ras terjebak.+ Lanai kami iperdiateken janah hancur kami.+
48 Lalap mambur iluhku perban bangsaku enggo hancur.+
ע [Ayin]
49 Lalap maler iluhku, la erngadi-ngadi,+
50 Seh ngasa tatap Jahwe ku teruh ras nenNa surga nari.+
51 Ceda ukurku sanga kuidah si terjadi i sekeliling kotaku.+
צ [Tsade]
52 Ayak-ayak musuhku aku bagi ngayaki perik, amin pe la lit sebapna.
53 Cubaken kalak e munuh aku alu ngambekken aku ku sumur. Lalap benteri kalak e aku alu batu.
54 Takalku enggo nandangi gedap bas lau janah ningku, “Mate me aku!”
ק [Qop]
55 Kulebuh gelarNdu o Jahwe, arah sumur si mbages e.+
56 Begiken min soraku. Ula tutup cupingNdu sanga serko aku mindo penampat.
57 Sanga kulebuh Kam, deheriNdu aku janah nindu, “Ula mbiar.”
ר [Res]
58 O Jahwe, enggo belaNdu perkaraku. Enggo tebusNdu geluhku.+
59 O Jahwe, enggo idahNdu la adil kalak man bangku. Bereken min keadilen man bangku.+
60 Enggo idahNdu pembalasen kalak e, kerina rencana kalak e man bangku.
ש [Sin] ntah [Syin]
61 O Jahwe, enggo begiNdu uga kalak e nokohi aku, enggo begiNdu rencana jahat kalak e man bangku.+
62 Enggo begiNdu kata-kata musuhku, bage pe kusik-kusik kalak e kerna aku segedang wari.
63 Nenlah kalak e. Sanga kundul ras tedis, tokohi kalak e aku bas lagu-laguna!
ת [Taw]
64 O Jahwe, balasNdu pagi kalak e menurut perbahanenna.
65 PediatNdu pagi kalak e mekeng. E me caraNdu numpahi kalak e.
66 O Jahwe, ayak-ayakNdu kalak e alu rawaNdu janah kernepkenNdu kalak e i teruh langitNdu.
Cataten i teruh
^ Ntah banci saja “janah banNa aku la erguna.”
^ Ntah “maba pasangen.” Pasangen eme alat si biasa itama ku kuduk manusia ntah pe binatang guna maba baban.
^ As. “mbuka babahna.”
