Pilemon 1:1-25
1 Arah Paulus nari, si ipenjaraken+ perban Kristus Jesus bage pe arah Timotius nari,+ seninata. Surat enda man Pilemon, teman sada dahin si kelengi kami,
2 bage pe man Apia turangta, Arkipus temanta seperjuangen,+ ras man runggun si pulung bas rumahndu:+
3 Mbera-mbera aloken kena kiniulin Dibata si luar biasa ras kedamen arah Ia eme Bapakta ras arah Tuan Jesus Kristus.
4 O Seninaku Pilemon, rusur kukataken bujur man Dibataku sanga kuinget kam bas totoku,+
5 sebap rusur kubegi kerna kinitekenndu ras kerna kekelengenndu man Tuan Jesus bage pe man kerina kalak si badia.
6 Ertoto aku gelah kinitekenndu bage pe kiniteken turang seninandu ngiahken kam gelah sadar maka enggo sialoken kerina si mehuli arah Kristus nari.
7 O Seninaku, mbelin kel keriahen ukur si kugejapken janah terapul kel aku sanga kubegi kerna kekelengenndu perban enggo pegegehindu kalak si badia.
8 Emaka, aku selaku rasul Kristus, pang merentahken kam guna ngelakoken kai si arus lakokenndu.
9 Tapi ulin kuakap mindo man bandu perban kekelengen. Si enda kuban perban aku, Paulus, enggo metua, janah sangana ipenjaraken perban Kristus Jesus.
10 Mindo kel aku guna anakku, Onesimus,+ perban aku enggo bagi bapakna+ sanga aku bas penjara.
11 Mbarenda la ia erguna man bandu, tapi gundari ia enggo erguna man bandu bage pe man bangku.
12 Kusuruh ia, si keleng kel ateku, ndahi kam mulihi.
13 Situhuna, i jenda min ateku ia ras aku gelah banci gantikenna kam guna ngelayani aku sedekah aku ipenjaraken perban berita si meriah.+
14 Tapi, la teku kulakoken kai pe adi la setujuindu. Ateku min perbahanenndu si mehuli e lakokenndu alu meriah ukur, labo perban terpaksa.+
15 Banci saja enda sebapna maka tadingkenna kam ntisik, gelah banci datndu ia mulihi seh rasa lalap,
16 lanai selaku budak,+ tapi lebihen asangken budak, eme selaku senina si ikelengi.+ Keleng kel teku ia, tapi pasti reh kelengna kari tendu ia selaku budakndu bage pe selaku pengikut Tuan.
17 Emaka, adi temanndu kin kapndu aku, alokenlah ia alu mehuli bagi kam ngaloken aku.
18 Selain si e, adi lit kin salahna ntah pe utangna bandu, aku saja si nanggungsa.
19 Aku, Paulus, aku si nulissa surat enda: Kugalari pagi kerina mulihi man bandu. La perlu kam kuingetken maka kam pe rutang kegeluhen man bangku.
20 O Seninaku, sampatindu min aku bas si enda guna Tuanta, gelah meriah ukurku sebap kita radu ras pengikut Kristus.
21 Tek aku maka lakokenndu pemindonku man bandu, emaka kutulis surat enda man bandu sebap tek aku maka lebihen asa si kupindo e pe nggit nge kam ngelakokenca.
22 Selain si e, sikapkenlah inganku tading, sebap ngarap kel aku perban pertotonndu banci aku bebas janah banci kudahi kam.+
23 Epapras+ si ipenjaraken ras aku perban Kristus Jesus, kirim salam man bandu,
24 bage pe temanku sada dahin eme Markus, Aristarkus,+ Demas,+ ras Lukas.+
25 Mbera-mbera kiniulin si luar biasa arah Tuan Jesus Kristus nemani perbahanen si mehuli si lakoken kena.
