Pilipi 4:1-23
4 Emaka o turang senina si kukelengi ras si tedeh ateku, kena kap keriahen ukurku bage pe mahkotaku,+ tetaplah paguh+ bas ngelayani Tuhan* bagi si enggo kukataken man kena.
2 Kupindoken man Eiodia ras Sintike gelah seperukuren kena bas ngelayani Tuhan.*+
3 Man kena, o temanku si radu ras aku erdahin alu bulat ukur, sampatilah diberu enda duana. Sebap enggo ikut ia duana ras aku erjuang bas mberitaken berita si meriah e, bage pe ras Klemen ras kerina temanku si deban, si kerina gelarna lit tertulis bas buku kegeluhen.+
4 Teruslah ermeriah ukur perban Tuhan.* Sekali nari kukataken: Ermeriah ukurlah!+
5 Buktikenlah perukuren kena masuk akal+ man kerina kalak. Tuhan* ndeher kap.
6 Ula kena kuatir kerna kai pe,+ tapi bas kerinana pesehlah pemindon kena man Dibata bas toto janah pindolah alu ngataken bujur.+
7 Alu bage kedamen+ bas Dibata nari si banci naluken perukuren kai pe, njagai pusuh+ ras perukuren kena arah Kristus Jesus.
8 Emaka, o turang senina, lalaplah ukuri kai pe si benar, kai pe si penting, kai pe si ngena ate Dibata,* kai pe si bersih, kai pe si erban turah ate keleng, kai pe si mehamat, kai pe si mehuli, ras kai pe si patut ipuji.+
9 Teruslah lakoken kerina si pelajari kena, si aloken kena, si begi kena, ras si idah kena.+ Alu bage, Dibata kedamen tetap ras kena.
10 Meriah kel ukurku janah kukataken bujur man Tuhan* perban ukuri kena ka aku.+ Mbarenda, amin pe ukuri kena aku, la lit kesempaten kena guna ncidahkenca.
11 Kukataken bage labo perban lit si kurang bas aku, sebap enggo erlajar aku gelah puas bas keadan si ugapa pe.+
12 Kuteh nge uga nggeluh bas kekurangen+ bage pe uga nggeluh bas kelebihen. Bas kerina keadan, la soal aku besur ntah pe melihe, kekurangen ntah pe erlebih, kuteh rahasiana gelah banci puas.
13 Ngasup aku ngadapi kai pe perban gegeh si kualoken arah Dibata nari.+
14 Amin pe bage, mehuli kel perbahanen kena bas nampati aku sanga ngenanami kiniseran.
15 O kalak Pilipi, kenca tangtangna nari begi kena kerna berita si meriah, sanga berkat aku arah Makedoni nari, la lit runggun si nampati aku bage pe si ngaloken aku, selain kena.+
16 Sanga aku bas Tesalonika, kirim kena penampat man bangku, labo sekali ngenca, tapi dua kali.
17 Labo pemere kena si kuarapken, tapi ateku gelah perbahanen kena si mehuli e nambahi keuntungen man kena.
18 Kerina si kuperluken enggo lit bas aku janah lebih pe. Kerina bias kenca kualoken kirimen kena arah Epaproditus,+ kirimen kena e bagi korban si merim+ janah ngena ate Dibata.
19 Emaka alu kebayakenNa si mulia, sikapken Dibataku pagi kerina keperlun kena+ arah Kristus Jesus.
20 Muliakenlah Bapakta eme Dibata, seh rasa lalap. Amin.
21 Peseh salamku man kerina kalak si badia si ersada ras Kristus Jesus. Turang senina si lit ras aku pe kirim salam man kena.
22 Kerina kalak si badia, terlebih-lebih si lit bas istana Kaisar+ kirim salam man kena.
23 Mbera-mbera kiniulin si luar biasa arah Tuan Jesus Kristus terus nemani kena perban bas kena lit perukuren ras perbahanen si benar.
Cataten i teruh
^ Ntah “kai pe si adil.”
