Roma 1:1-32
1 Surat arah Paulus, sekalak budak Kristus Jesus. Aku ilebuh guna jadi rasul janah ipilih guna mberitaken berita si meriah arah Dibata.+
2 Mbarenda nari enggo erjanji Dibata bas Kitap si Badia arah nabi-nabiNa.
3 Berita e kerna AnakNa si rehna arah keturunen Daud.+
4 Alu kesah si badia, ia terbukti Anak Dibata+ sanga ipegeluh ia mulihi arah si mate nari.+ Ia kap Jesus Kristus Tuanta.
5 Arah ia, cidahken Dibata* kiniulin si luar biasa. Pilih Jesus aku jadi rasul+ guna nampati kalak arah kerina bangsa+ gelah erkiniteken man bana ras patuh, janah gelah muliaken kalak e gelarna.
6 Kena pe rehna arah bangsa-bangsa si enggo iundang jadi pengikut Jesus Kristus.
7 Surat enda ibereken man kerina kalak si ikelengi Dibata si lit i Roma, si ipilih jadi kalak si badia:
Mbera-mbera aloken kena kiniulin si luar biasa ras kedamen arah Dibata nari, eme Bapakta, bage pe arah Tuan Jesus Kristus.
8 Si pertama, bujur kukataken man Dibata arah Jesus Kristus perban kena kerina, perban kiniteken kena enggo icakapken i belang-belang doni.
9 Kulayani Dibata alu bulat ukur, alu mberitaken berita si meriah kerna AnakNa, janah teh Dibata maka la erngadi-ngadi kena kutotoken.+
10 Ertoto aku man Dibata, adi banci janah adi sesuai ras peratenNa, banci min aku reh ndahi kena.
11 Merhat kel aku jumpa ras kena gelah banci kubereken pergegeh* arah Dibata nari guna erban kiniteken kena reh paguhna.
12 Maksudku, gelah pegegehi kena aku alu kiniteken kena, janah kupegegehi kena alu kinitekenku.+
13 O turang senina, perlu teh kena maka lalap ateku reh ndahi kena, gelah lit hasil pelayanenku i tengah-tengah kena, bagi pelayanenku i tengah-tengah bangsa si deban. Tapi seh asa gundari lit lalap si ngambatisa.
14 Rutang aku man kerina kalak: man kalak Junani bage pe man kalak si labo Junani,* man kalak si lit sekolahna bage pe man kalak si la lit sekolahna.
15 Emaka, man kena pe si lit i Roma,+ merhat kel aku mpeseh berita si meriah enda.
16 La aku mela kerna berita si meriah e,+ perban berita si meriah e kap bukti kuasa Dibata guna nelamatken kerina kalak si erkiniteken,+ tangtangna man kalak Jahudi,+ kenca si e man kalak Junani.+
17 Alu bage, banci idah kalak si erkiniteken maka kataken Dibata kebenarenNa arah berita si meriah e. Si e mpegegehi kiniteken kalak e,+ bagi si itulisken, “Kalak si ngelakoken kai si benar, nggeluh pagi perban erkiniteken.”+
18 Arah surga nari cidahken Dibata rawaNa+ man kerina kalak si la patuh ras si la benar. Lakoken kalak e perbahanen si salah guna muniken kebenaren.+
19 Enggo jelas teh kalak e kerna Dibata, perban enggo bereken Dibata bukti si jelas man kalak e kerna Ia.+
20 Mulai kin doni iciptaken, sipat-sipatNa si la teridah eme kuasaNa si rasa lalap+ ras kedudukenNa selaku Dibata,+ jelas kap teridah arah ciptanNa.+ Emaka la banci kataken kalak e Dibata e la lit.
21 Amin pe teh kalak e kerna Dibata, tapi la muliakenna Dibata ras la ia ngata bujur man baNa. Perukuren kalak e kerna kai si la erguna saja, janah pusuhna la erpenggejapen.*+
22 Ngaku ia pentar, tapi situhuna ia motu.
23 La muliaken kalak e Dibata si la banci mate, tapi muliakenna patung si bentukna bagi manusia si banci mate, bage pe patung si bentukna bagi perik, binatang si empat nahena, ras bagi binatang si njoler.*+
24 Emaka, pediat Dibata kalak e ngelakoken sura-surana si najis, alu bage permelakenna dagingna.
25 Tukarkenna kebenaren Dibata alu kai si la tuhu. Sembahna ras layanina kai si ciptaken Dibata, padahal si arus ipuji seh rasa lalap eme Si Nciptakenca. Amin.
26 E me sebapna pediat Dibata kalak e ngikutken napsu seksna si mpermelaken.+ Si diberu, la lit bas ukurna erhubungen ras dilaki, atena ngelakoken kai si man kemelanken ras diberu. Padahal la bage ia iciptaken Dibata.+
27 Si dilaki pe, la lit bas ukurna erhubungen ras diberu. Mbelin kel sura-sura pusuhna ngelakoken kai si man kemelanken ras dilaki.+ Lakoken kalak e perbahanen si erban ciga ate, alu bage alokenna hukumen si sesuai ras kesalahenna.+
28 Perban la penting akap kalak e nandai Dibata, pediat Dibata terus ukuri kalak e kai si la erguna. Alu bage lakoken kalak e kai si arusna la lakoken kalak e.+
29 Kalak si bage dem alu kai si la benar,+ kejahaten, rangap,+ dosa, cian,+ munuh,+ rubati, nipu,+ ersura-sura ngelakoken kai si jahat,+ cikurak,
30 pitnahna kalak,+ rate segat man Dibata, kurang ajar, sombong, tual, erban rencana jahat, la patuh man orang tua,+
31 la erpengangka,+ la nepati janji, la rate keleng, ras la rate mekuah.
32 Situhuna teh kalak e maka menurut undang-undang Dibata si adil, kalak si bage perbahanenna arus ihukum mate.+ Tapi tehna pe bage, lalap lakokenna, setuju ka ia man kalak si bage perbahanenna.
Cataten i teruh
^ Ntah “aloken kami.”
^ As. “hadiah.”
^ Ntah “kalak asing.” As. “kalak Barbar.”
^ As. “pusuhna ikuasai kegelapen.”
^ Ntah “merayap.”
