Roma 12:1-21
12 O turang senina, perban perkuah ate Dibata, mindo aku man kena gelah bereken kena daging kena+ jadi korban si nggeluh, badia,+ janah ngena ate Dibata. Gunakenlah kengasupen rukur+ kena bas ngelakoken pelayanen si badia man baNa.
2 Ula nai kena ipengaruhi* doni* enda. Tapi robahlah alu ngubah perukuren kena.+ Alu bage, banci jelas teh kena+ peraten Dibata si mehuli, si sempurna, janah si erban Ia senang.
3 Perban kiniulin Dibata si luar biasa si enggo berekenNa man bangku, kukataken man kena kerina gelah ula akap kena ganjangen diri kena asangken situhuna,+ tapi banlah perukuren kerna diri kena uga litna sesuai ras kiniteken si bereken Dibata man kena masing-masing.+
4 Sebap, sada daging melala anggotana,+ tapi kerina anggota daging e la seri gunana.
5 Kita pe bage ka, amin pe enterem kita, kerina kita sada daging perban ersada ras Kristus. Masing-masing kita anggota daging e merluken sada ras si debanna.+
6 Perban kiniulin Dibata si luar biasa,+ sialoken erbage-bage pemere. Emaka adi sialoken pemere guna ernubuat, ernubuatlah sesuai ras kiniteken si enggo sialoken.
7 Adi sialoken pemere guna ngelayani, teruslah kita ngelayani. Adi sialoken pemere guna ngajar, teruslah kita ngajar.+
8 Adi pemere si alokenna guna mpegegehi, teruslah ia mpegegehi.+ Adi pemere si alokenna guna mere, teruslah ia mere arah ukur nari.+ Adi pemere si alokenna guna minpin, teruslah ia minpin alu tutus.+ Adi pemere si alokenna guna ncidahken perkuah ate, teruslah lakokenna si e alu meriah ukur.+
9 Kekelengen kena ula min munapik.+ Cigalah ate kena kai si jahat,+ janah persadalah diri kena ras kai si mehuli.
10 Sikeleng-kelengenlah kena bagi engkelengi keluarga kena. Silebe-lebenlah kena bas mere kehamaten man si deban.+
11 Rajinlah kena, ula kisat.+ Semangatlah alu kesah si badia.+ Erdahinlah jadi budak man Jahwe.*+
12 Ermeriah ukurlah bas arapen. Megenggenglah bas kiniseran.+ Ertotolah man Dibata la erngadi-ngadi.+
13 Berekenlah penampat man kalak si badia sesuai ras keperlunna.+ Alo-alolah kalak alu meriah ukur.+
14 Pindolah pasu-pasu guna kalak si nyiksa kena.+ Pasu-pasulah kalak e, ula sumpahi.+
15 Ermeriah ukurlah ras kalak si ermeriah ukur. Tangislah ras kalak si tangis.
16 Ukurilah kalak si deban bagi kena ngukuri diri kena. Ula meganjang rukur tapi meteruk ukurlah.+ Ula pentaren akap kena diri kena asangken kalak si deban.+
17 Ula balas kejahaten alu kejahaten man ise pe.+ Banlah si mehuli menurut pengakap kerina kalak.
18 Usahakenlah asa ngasup kena gelah dame ras kerina kalak.+
19 O turang senina si kukelengi, ula kena balas dendam. Pediat saja Dibata si ncidahken rawaNa,+ sebap lit tertulis, “Nina Jahwe,* ‘HakKu kap pembalasen. Kubalas pagi perbahanenna si jahat.’”+
20 Tapi “adi melihe musuh kena, bere ia man; adi muas ia, bere ia minem; alu bage lanai ia merawa.”*+
21 Ula pediat diri kena italuken kai si jahat. Tapi teruslah taluken kai si jahat alu ngelakoken kai si mehuli.+
