Roma 13:1-14
13 Kerina kalak arus patuh man pemerentah,+ sebap labo lit kuasa adi la kin bereken Dibata.+ Pemerentah si lit gundari e pe ndatken kedudukenna masing-masing arah Dibata nari.+
2 Emaka, ise pe si ngelawan pemerentah, ngelawan peraturen Dibata, emaka ihukum pagi kalak si ngelawan peraturen e.
3 Kalak si ngelakoken kai si mehuli la mbiar man pemerentah, tapi kalak si ngelakoken kai si jahat mbiar man pemerentah.+ Labo perlu kena mbiar man pemerentah. Adi mehuli perbahanen kena,+ pujina kena.
4 Pemerentah e pelayan Dibata guna kepentingen kena. Tapi adi lakoken kena si jahat, mbiar kena sebap lit nge tujun pemerentah maba pedang. Pemerentah e pelayan Dibata kap, si mereken hukumen man kalak si lalap ngelakoken perbahanen si jahat.
5 Emaka lit alasen si erban kena arus patuh. Labo saja perban hukumen e, tapi perban pusuh peraten kena.+
6 E me sebapna kena nggalar pajak perban pemerentah e pelayan Dibata, si lalap ngelayani masyarakat.
7 Berekenlah kai si jadi hak kalak enda: Galarilah pajak man si mindo pajak,+ galarilah upeti* man si mindo upeti. Ergailah kalak si mindo iergai,+ hamatilah kalak si mindo ihamati.+
8 Ula kena rutang kai pe man ise pe, tapi sikeleng-kelengenlah kena,+ sebap kalak si engkelengi kalak si deban kap si enggo ndalanken undang-undang.+
9 Undang-undang e bagi, “Ula erlua-lua,+ ula munuh,+ ula nangko,+ ula kena merhat jang kalak,”+ ras kerina perentah si lit ipersada bas kata-kata enda: “Arus kelengindu kalak si deban bagi kam engkelengi dirindu.”+
10 Kalak si lit kekelengenna labo ngelakoken kai si jahat man kalak si deban.+ Alu bage enggo dalankenna undang-undang.+
11 Lakokenlah si e kerina sebap teh kena bas waktu si uga kita nggeluh. Gundari kap waktuna kita medak+ sebap keselamaten enggo deher, deheren asangken tangtangna kita jadi kalak si tek.
12 Gundari enggo tengah berngi, janah ntisik nari terang wari. Emaka sitadingkenlah perbahanen si gelap,+ sipakelah senjata si igunaken sanga terang wari.+
13 Sijagalah perbahanenta+ bagi perbahanen kalak sanga terang wari. La erpesta pora, la mabuk, la ngelakoken perbahanen seks si salah* ntah pe la ngelakoken perbahanen si la meteh mela,*+ janah la rubati ntah pe cian.+
14 Tapi usihlah Tuan Jesus Kristus,+ ula ban rencana guna sura-sura daging si erdosa.+
