Roma 14:1-23
14 Alo-alolah kalak si lemah kinitekenna,+ ula hakimi ia adi la seri pendapat kena.*
2 Lit kalak si kinitekenna erban ia banci man kai pe, tapi lit kalak si lemah kinitekenna si banci man sayur saja.
3 Kalak si banci man kai pe, ula rendah kapna kalak si la banci man kerina pangan, janah kalak si la banci man kerina pangan, ula hakimina kalak si banci man kai pe,+ sebap kalak e enggo aloken Dibata.
4 Ise kin kena maka hakimi kena pelayan kalak si deban?+ Tuanna nge si nentukenca ia benar ntah pe salah.+ Situhuna, alu penampat Jahwe,* ia ikataken benar.
5 Lit si erpengakap maka wari-wari tertentu pentingen asangken wari-wari si deban,+ tapi lit ka si erpengakap maka kerina wari seri saja.+ Tiap kalak tuhu-tuhu tek min man kai si enggo putuskenna.
6 Kalak si erpengakap maka penting wari-wari tertentu, lakokenna si e guna Jahwe.* Kalak si man pe, lakokenna si e guna Jahwe,* sebap ngata bujur ia man Dibata.+ Kalak si man sayur saja pe, lakokenna si e guna Jahwe,* janah ngata bujur ka ia man Dibata.+
7 Situhuna, labo lit sada pe arah kita si nggeluh guna dirina saja+ janah labo lit sada pe arah kita si mate guna dirina saja.
8 Sebap adi kita nggeluh, kita nggeluh guna Jahwe,*+ adi kita mate, kita mate guna Jahwe.* Emaka adi kita nggeluh ntah pe mate, kita jang Jahwe.*+
9 Guna si e kap Kristus mate ras nggeluh mulihi, gelah ia jadi Tuan man kalak mate ras kalak si nggeluh.+
10 Adi bage, engkai maka hakimi kena turang senina kena?+ Engkai maka rendah akap kena turang senina kena? Sebap tedis nge pagi kita kerina i lebe-lebe kursi penghakimen Dibata.+
11 Lit tertulis, “Nina Jahwe,* ‘Aku Dibata si nggeluh ersumpah,+ kerina pagi kalak sujud man bangKu janah kerina kalak ngakui alu terus terang maka Aku kap Dibata.’”+
12 Emaka masing-masing pagi kita ertanggung jawap man Dibata.+
13 Ula nai sihakimi sada ras si debanna.+ Tapi usahakenlah gelah ula ndigan pe lakoken kena kai si erban lemah kiniteken turang senina kena ntah pe si erban ia ndabuh.+
14 Selaku pengikut Tuan Jesus, kuteh janah tek aku maka labo lit si najis.+ Adi lit si najis menurut sekalak jelma, e perban najis akapna.
15 Adi perban pangan kena maka lanai entabeh perasan turang senina kena, lanai kap cidahken kena kekelengen.+ Emaka ula ban kena bene kiniteken turang senina kena perban pangan kena, sebap Kristus enggo mate guna ia.+
16 Emaka ula pediat perbahanen kena si mehuli e erban kalak ngataken si la mehuli kerna kena.
17 Sebap labo pangan ras inemen si nentuken sekalak jelma banci masuk ku bas Kerajan Dibata.+ Tapi arus lakokenna kai si benar, erdame ras kalak si deban, ras ermeriah ukur perban kesah si badia.
18 Ise pe si jadi budak man Kristus alu cara si bage, senangkenna Dibata bage pe manusia.
19 Emaka lakokenlah kai pe si erban kita nggeluh alu dame+ ras si deban janah pegegehi sada ras si debanna.+
20 Ula perban pangan ceda ban kena dahin Dibata.+ Payo, labo lit pangan si najis, tapi la mehuli adi pan sekalak jelma pangan si erban lemah kiniteken kalak.+
21 Padin la padah man daging ntah pe minem anggur ntah pe ngelakoken kai pe si erban lemah kiniteken turang senina kena.+
22 Kai pe si teki kena, e urusen kena ras Dibata. Ermeriah ukurlah kalak si la hakimina dirina perban kai si lakokenna.
23 Tapi adi ragu ia janah tetap panna, ia enggo ersalah adi panna e. Perban kai si lakokenna e la sesuai ras kinitekenna. Kai pe si ilakoken adi la alu kiniteken, dosa kap.
Cataten i teruh
^ Ntah banci saja “adi tersungkun-sungkun denga ia i bas pusuhna.”
