Roma 15:1-33
15 Kita si megegeh arus nampati kalak si lemah.+ Ula gelah meriah ukurta saja ngenca siban.+
2 Marilah kita masing-masing erban kalak si deban ermeriah ukur alu kai si mehuli gelah ia ipegegehi.+
3 Sebap Kristus pe labo gelah meriah ukurna saja ngenca banna,+ bagi si lit tertulis, “Aku si nahanken kata-kata hinan si belasken kalak man baNdu.”+
4 Kerina ayat-ayat si enggo itulis mbarenda itulis guna ngajari kita.+ Ayat-ayat e erban kita megegeh*+ janah apulina kita, alu bage lit arapenta.+
5 Dibata si nampati kena gelah megegeh* ras si ngapuli kena, mbera-mbera bereNa man kena perukuren ras perbahanen si bagi Kristus Jesus.
6 Alu bage banci kena ersada+ janah alu sada sora muliaken kena Dibata, Bapak Tuanta Jesus Kristus.
7 Emaka alo-alolah sada ras si debanna,+ bagi Kristus enggo ngalo-ngalo kena,+ gelah Dibata imuliaken.
8 Kukataken man kena maka Kristus enggo jadi pelayan kalak si isunat.+ Alu bage banci buktikenna kata Dibata lalap benar, janah banci jaminna maka pasti tepati Dibata janji si enggo banNa ras nini bulang kalak e,+
9 bage pe banci banna kalak bas bangsa si deban nari mereken kemulian man Dibata perban perkuah ateNa.+ Bagi lit tertulis, “E me sebapna kupuji Kam i tengah-tengah bangsa-bangsa janah rende aku muji gelarNdu.”+
10 Lit ka tertulis nina, “Ermeriah ukurlah bangsa-bangsa radu ras umat Dibata.”+
11 Ayat si deban ngataken, “O kerina bangsa, pujilah Jahwe,* mbera-mbera kerina bangsa muji Ia.”+
12 Bas ayat si deban nina Jesaya ka, “Lit pagi sekalak arah keturunen* Isai+ nari si merentah bangsa-bangsa,+ man bana pagi bangsa-bangsa erpengarapen.”+
13 Dibata si mereken arapen, mbera-mbera banNa kena dem alu keriahen ukur ras kedamen perban tek kena man baNa. Alu bage banci reh paguhna arapen kena alu gegeh kesah si badia.+
14 O turang senina, tek aku maka mehuli kel kena, mbue pemeteh kena, ngasup kena siajar-ajaren.
15 Tapi terus terang kutulis isi surat enda man kena guna ngingetken kena mulihi, perban enggo buktiken Dibata kiniulinNa si luar biasa man bangku.
16 Alu bage banci aku jadi pelayan Kristus Jesus guna mberitaken berita si meriah kerna Dibata man bangsa-bangsa.+ Kulakoken dahin si badia enda+ gelah kalak e banci jadi persembahen si aloken Dibata, si ipebadia alu kesah si badia.
17 Emaka meriah ukurku perban aku enggo jadi pengikut Kristus Jesus janah kulakoken dahin arah Dibata nari.
18 La aku pang ngerana kerna kai pe selain kerna si lakoken Kristus arah aku guna erban bangsa-bangsa jadi patuh bana. Lakokenna si e arah kata-kata ras perbahanenku.
19 Patuh kalak e perban mukjizat ras tanda-tanda si luar biasa,+ ras perban gegeh kesah si badia. Alu bage enggo dung kuberitaken berita si meriah kerna Kristus,+ mulai kin Jerusalem nari, jenari keliling aku seh ku Propinsi Iliria.
20 La kuterusken pendahin si enggo dahiken kalak si deban,* tapi kuusahaken mberitaken berita si meriah bas ingan si deban si lenga nandai gelar Kristus.
21 Bagi lit tertulis, “Kalak si lenga ngaloken berita kerna ia, itandaina pagi, janah kalak si lenga megi, angkana pagi.”+
22 E me sebapna maka rusur aku la surung reh ndahi kena.
23 Tapi gundari, lanai lit ingan si lenga kudahi bas daerah enda, janah enggo ertahun-tahun* dekahna merhat kel aku ndahi kena.
24 Emaka ngarap aku banci jumpa ras kena sanga bas perdalanenku kari ku Spanyol, janah temani kena min aku ntisik bas perdalanenku e. Tapi sope kita berkat, ngerana-ngerana min ateku kita lebe.
25 Tapi gundari, lawes ateku ku Jerusalem guna ngelayani kalak si badia.+
26 Sebap turang senina si lit i Makedoni ras Akaya meriah ukurna mereken sumbangen man kalak si badia si mesera si lit i Jerusalem.+
27 Payo, meriah akap kalak e ngelakoken si e janah situhuna rutang akapna man kalak si badia e. Sebap enggo bereken kalak si badia e keperlun rohani man kalak e, emaka kalak e pe arus mereken keperlun tiap wari man kalak si badia e.+
28 Jadi, kenca enggo kutaruhken sumbangen enda man kalak e, berkat pagi aku ku Spanyol, janah bas perdalanenku ku jah, singgah pagi aku.
29 Tek aku maka sanga aku reh pagi ndahi kena, melala pagi kubaba pasu-pasu si rehna bas Kristus nari.
30 O turang senina, perban radu ras kita erkiniteken man Tuanta Jesus Kristus janah lit kekelengen bas kita si rehna arah kesah si badia, kupindoken man kena ras-ras min kita ertoto man Dibata alu tutus guna aku.+
31 Totoken gelah iselamatken aku+ arah kalak Judea si la tek man Jesus, gelah kalak si badia i Jerusalem ngaloken pelayanen si kubereken man kalak e.+
32 Emaka adi sesuai ras peraten Dibata, reh pagi aku ndahi kena alu dem keriahen ukur janah radu ras kita ipegegehi.
33 Mbera-mbera terus kena itemani Dibata si mere kedamen.+ Amin.
Cataten i teruh
^ Ntah “megenggeng.”
^ Ntah “megenggeng.”
^ As. “urat.”
^ As. “La aku mbangun i datas pondasi kalak si deban.”
^ Ntah banci saja “piga-piga tahun.”
