Roma 16:1-27
16 Kupetandaken ateku Pebe, eme turang seninata si ngelayani bas runggun Kenkerea.+
2 Alo-alo kena min ia selaku pengikut Tuan bagi ngalo-ngalo kalak si badia. Bereken kena min man bana kai pe si perlukenna,+ perban enggo enterem turang senina si sampatina, termasuk aku.
3 Peseh salamku man Persila* ras Akuila,+ kalak e temanku bas ngelayani Kristus Jesus.
4 Nggit kalak e mereken kesahna guna aku.+ Selain aku, kerina runggun arah bangsa-bangsa si deban pe ngata bujur man kalak e.
5 Kirim salam man runggun si pulung i rumah kalak e.+ Kirim salam man Epenetus si kukelengi, kalak si termasuk tangtangna jadi murid-murid Kristus i Asia.
6 Kirim salam man Maria, si enggo kerja keras guna kena.
7 Kirim salam man keluargaku eme Andronikus ras Junias.+ Kalak enda pernah ipenjaraken radu ras aku. Itandai rasul-rasul kalak e selaku kalak si mehuli, enggo dekahen ia jadi pengikut Kristus asangken aku.
8 Peseh salamku man Ampliatus si kukelengi bas Tuan.
9 Salam man Urbanus, temanta sada dahin bas Kristus bage pe man Stahis si kukelengi.
10 Salam man Apeles, si enggo terbukti setia man Kristus. Salam man kerina kalak si lit i rumah Aristobulus.
11 Salam man Herodian, keluargaku. Salam man kerina kalak si lit i rumah Narkisus, si enggo jadi pengikut Tuan.
12 Salam man Tripena ras Triposa, turang seninata si enggo kerja keras guna Tuan. Salam man Persis, turang senina si keleng ateta, si enggo kerja keras guna Tuan.
13 Salam man Rupus, kalak si ipilih guna ngelayani Tuan, ras man mamakna si enggo kuanggap bagi mamakku.
14 Salam man Asinkritus, Pelegon, Hermes, Petrobas, Hermas, bage pe kerina senina si lit ras kalak e.
15 Salam man Pilologus, Julia, Nerus ras turangna, Olimpas, bage pe kerina kalak si badia si lit ras kalak e.
16 Sikaplah alo-alo kena sada ras si debanna.* Kerina runggun Kristus kirim salam man kena.
17 O turang senina, kupindoken man kena hati-hatilah man kalak si erban perpecahen ras kalak si erban tertuktuk. Sebap si e erlawanen ras kai si enggo pelajari kena. Ula deheri kalak e.+
18 Kalak si bage labo budak Tuanta Kristus, tapi budak sura-sura daging si salah. Tipuna kalak si polos, alu ranan mehuli ras muji-muji.
19 Enggo perdiateken kerina kalak maka kena patuh janah si e erban meriah ukurku. Amin gia bage, ateku gelah pentar min kena bas si mehuli janah la erpengalamen bas perbahanen si jahat .+
20 Ntisik nari, Dibata si mere kedamen, engkernepken Setan+ i teruh nahe kena. Mbera-mbera kiniulin si luar biasa arah Tuanta Jesus lalap ras kena.
21 Timotius temanku sada dahin kirim salam man kena bage pe keluargaku, eme Lusius, Jason, ras Sosipatrus.+
22 (Aku, Tertius si nulisken kai si ikataken Paulus bas surat enda, kirim salam man kena bas gelar Tuan.)
23 Gayus+ si bas rumahna aku tading janah bas rumahna runggun pulung, kirim salam man kena. Erastus bendahara kota bage pe Kuartus seninana kirim salam man kena.
24 * ——
25 Banci kena megegeh ban Dibata perban berita si meriah si kuberitaken eme kerna Jesus Kristus. Berita enda lit hubungenna ras rahasia si badia+ si enggo ibukaken si enggo ndekah kel ibuniken.
26 Gundari, rahasia e enggo ibukaken janah enggo ikataken man kerina bangsa arah ayat-ayat si itulis nabi-nabi, sesuai ras perentah Dibata si rasa lalap, si ateNa gelah kerina bangsa patuh perban erkiniteken.
27 Dibata kap ngenca si pentar.+ Imuliakenlah Dibata seh rasa lalap arah Jesus Kristus. Amin.
