Roma 5:1-21
5 Gundari, kita enggo ikataken benar perban kinitekenta,+ marilah sigejapken keriahen ukur perban erdame* ras Dibata arah Tuanta Jesus Kristus.+
2 Alu erkiniteken man bana, terbuka dalan man banta guna ngaloken kiniulin si luar biasa si gundari enggo sigejapken.+ Emaka marilah kita ermeriah ukur perban lit arapenta guna imuliaken Dibata.
3 Labo e saja, marilah kita ermeriah ukur sanga ngadapi kiniseran+ perban siteh maka kiniseran e erban kita jadi sabar.*+
4 Adi sabar* kita, ngena ate Dibata ngidah kita.+ Adi ngena ateNa kita, lit arapenta.+
5 Arapenta labo erban kita kecewa,+ perban enggo curcurken Dibata kekelengenNa ku bas pusuhta arah kesah si badia si enggo berekenNa man banta.+
6 Sanga kita erdosa* denga pe,+ Kristus enggo mate guna kalak si erdosa bas waktu si enggo itetapken Dibata.
7 Jarang kalak nggit mate guna kalak si benar, tapi banci saja lit kalak si nggit mate guna kalak si bujur.
8 Tapi, Kristus mate guna kita sanga kita erdosa denga. Bage cara Dibata mbuktiken kekelengenNa man banta.+
9 Emaka perban kita enggo ikataken benar alu dareh Kristus,+ reh tekna kita iselamatken pagi kita arah rawa Dibata.+
10 Sanga kita jadi musuh Dibata denga, kita enggo idameken mulihi ras Dibata perban kematen AnakNa.+ Emaka gundari, kenca kita idameken ras Dibata, tek kita maka pasti kita iselamatken perban kegeluhen AnakNa.
11 Labo e saja, meriah ukurta perban banci kita rembak ras Dibata arah Tuanta Jesus Kristus. Arah ia, gundari kita idameken ras Dibata.+
12 Bagi dosa masuk ku doni arah sekalak manusia, dosa e maba kematen.+ Akibatna, kematen enggo ngelangketi kerina manusia sebap kerina manusia enggo erdosa.+
13 Sope lit Undang-Undang Musa, dosa enggo lit i doni enda. Tapi labo lit sekalak pe ituduh erban dosa adi la lit undang-undang.+
14 Amin pe bage, kematen enggo erkuasa jadi raja mulai kin Adam nari seh ku Musa. Kematen e pe nguasai kalak si la ngelakoken dosa si bagi pelanggaren Adam. Adam mirip ras ia si nandangi reh e.+
15 Pemere Dibata la seri ras dosa e. Adi dosa sekalak jelma banci erban enterem jelma mate, tek kita maka kiniulin Dibata si luar biasa ras pemere si berekenNa alu kiniulin si luar biasa arah sekalak jelma,+ eme Jesus Kristus, erguna man enterem jelma!+
16 Manpaat pemere e pe la seri ras akibat dosa sekalak jelma.+ Sekalak jelma si erdosa erban kerina kalak ikataken ersalah.+ Tapi pemere e, si ibereken perban melala dosa, erban enterem kalak ikataken benar.+
17 Adi arah dosa sekalak jelma erban kematen erkuasa jadi raja,+ tek kita maka arah sekalak jelma ka, eme Jesus Kristus,+ banci erban manusia nggeluh janah merentah jadi raja.+ Aloken kalak e kiniulin Dibata si luar biasa bage pe pemereNa si seh kel buena si erban kalak e ikataken benar.+
18 Emaka bagi dosa sekalak jelma si erban erbage jelma ikataken ersalah,+ sada perbahanen si benar pe erban erbage jelma+ ikataken benar gelah ngaloken kegeluhen.+
19 Bagi sekalak jelma si la patuh si erban enterem kalak jadi erdosa,+ bage ka pe sekalak jelma si patuh erban enterem kalak ikataken benar.+
20 Undang-Undang Musa ibereken guna mbuktiken melala dosa.+ Tapi perban reh buena dosa, kiniulin Dibata si luar biasa pe reh buena.
21 Kai tujunna? Bagi dosa ras kematen erkuasa jadi raja,+ kiniulin Dibata si luar biasa pe erkuasa jadi raja, gelah manusia banci ikataken benar janah ngaloken kegeluhen si rasa lalap arah Jesus Kristus Tuanta.+
Cataten i teruh
^ Ntah banci saja “lit kedamenta.”
^ Ntah “megenggeng.”
^ Ntah “megenggeng.”
^ As. “lemah.”
