Roma 8:1-39
-
Kegeluhen ras kebebasen arah kesah si badia (1-11)
-
Kesah si badia ersaksi maka kita anak-anak Dibata (12-17)
-
Kerina ciptan nimai anak-anak Dibata ipebetehken (18-25)
-
“Kesah si badia erban pemindon guna kita” (26, 27)
-
Kalak si tetapken Dibata mulai kin tangtangna nari (28-30)
-
Menang perban kekelengen Dibata (31-39)
8 Emaka, kalak si ersada ras Kristus Jesus labo ihukum.
2 Sebap undang-undang kesah si badia si mereken kegeluhen si ersada ras Kristus Jesus, enggo mbebasken kena+ arah undang-undang dosa bage pe kematen.
3 Si la banci lakoken Undang-Undang Musa+ perban kelemahen manusia+ si la sempurna, lakoken Dibata alu nuruh AnakNa+ ku doni jadi manusia+ guna nasapken dosa. Alu bage, bere Dibata hukumen man dosa manusia.
4 Emaka adi siikutken kesah si badia labo sura-sura daging,+ banci silakoken kai si benar menurut Undang-Undang Musa.+
5 Kalak si ngikutken sura-sura daging, lalap ukurina sura-sura dagingna e,+ tapi kalak si ngikutken kesah si badia, lalap ukurina kai si sesuai ras kesah si badia e.+
6 Adi lalap ngukuri sura-sura daging ertina kematen,+ tapi adi lalap ngukuri kai si sesuai ras kesah si badia, ertina kegeluhen ras kedamen.+
7 Kalak si lalap ngukuri sura-sura daging, jadi musuh Dibata kap,+ sebap kalak enda la matuhi undang-undang Dibata, janah situhuna kalak enda la ngasup matuhisa.
8 Emaka, kalak si ngikutken sura-sura daging, la banci senangkenna Dibata.
9 Adi tuhu-tuhu kin lit kesah si badia bas diri kena, ikutken kena kap kesah si badia e,+ labo sura-sura daging. Tapi adi la lit perukuren Kristus bas diri sekalak jelma, ia labo jang Kristus.
10 Adi ersada kena ras Kristus,+ amin pe kena mate perban dosa, nggeluh kena iban kesah si badia perban kena ikataken benar.
11 Adi lit bas kena kesah si badia si erban Kristus Jesus nggeluh mulihi arah si mate nari,+ emaka Dibata si erban Kristus nggeluh mulihi pasti mereken geluh si mbaru man daging kena si arus mate e,+ arah kesah si badiaNa si lit bas kena.
12 O turang senina, payo rutang kita, tapi labo guna nggeluh ngikutken sura-sura daging.+
13 Sebap adi nggeluh kena menurut sura-sura daging, pasti nge kena mate. Tapi adi bunuh kena perbahanen-perbahanen si la mehuli+ alu penampat kesah si badia, nggeluh me kena.+
14 Kerina kalak si tegu-tegu kesah si badia, tuhu-tuhu anak-anak Dibata kap.+
15 Kesah si badia labo erban kita jadi budak ntah pe lanai erban kita mbiar, tapi arah kesah si badia e, kita iangkat jadi anak-anak Dibata janah tersuruh ukurta ngataken, “Abba,* Bapak!”+
16 Kesah si badia ikut ersaksi ras pusuhta+ maka kita anak-anak Dibata.+
17 Adi kita anak-anak Dibata, sialoken ka warisen bas Dibata nari+ radu ras Kristus. Adi sinanami kiniseran ras Kristus,+ kita pe imuliaken ka ras ia.+
18 Menurutku, kiniseran si inanami kita e labo lit ertina adi bandingken ras kemulian si nandangi icidahken man banta.+
19 Kerina ciptan Dibata tertima-tima kel waktuna anak-anak Dibata ipebetehken.*+
20 Sebap kerina ciptan Dibata e enggo lanai erguna,+ labo perban sura-surana, tapi perban sura-sura Dibata. Amin gia bage, lit arapen
21 maka kerina ciptan Dibata ibebasken+ pagi arah perbudaken dosa ras kematen, janah ngenanami kebebasen si mulia bagi si nanami anak-anak Dibata.
22 Siteh maka seh ngasa gundari, kerina ciptan Dibata ras-ras ndehereng janah rate mesui.
23 Selain si e, kita si enggo ngaloken bagin pertama arah warisen e,* eme kesah si badia, kita pe ikut ndehereng+ sanga sitimai Dibata ngangkat kita jadi anak-anakNa.+ Alu tebusen, kita ibebasken arah dagingta.
24 Alu erpengarapen kap maka kita enggo iselamatken. Tapi arapen si teridah, labo arapen. Adi arapen e enggo teridah, iarapken denga kin e?
25 Adi arapenta+ kerna kai si lenga siidah,+ tetap sitimai kel arapen e alu sabar.*+
26 Kesah si badia pe nampati kita sanga kita lemah.+ Tapi mon-mon la siteh kai si arus sitotoken si sesuai ras keperlunta. Amin gia lanai terbelasken uga beratna si lit bas pusuhta, paksa si e me kesah si badia erban pemindon guna kita.
27 Dibata si mereksa pusuhta+ ngangkai maksud kesah si badia e, perban pemindon e iban guna kalak si badia, janah sesuai ras peraten Dibata.
28 Siteh maka ban Dibata gelah teratur kerina perbahanenNa, alu bage erguna man kalak si engkelengi Ia, eme kalak si ipilih Dibata sesuai ras peratenNa.+
29 Sebap kalak si pertama perdiatekenNa, tetapkenNa ka gelah bali ras AnakNa,+ alu bage AnakNa e jadi anak sintua+ i tengah-tengah enterem turang senina.+
30 Selain si e, kalak si tangtangna tetapkenNa e,+ lebuhNa ka.+ Kalak si lebuhNa e katakenNa ka benar.+ Dungna, kalak si katakenNa benar e, muliakenNa ka.+
31 Uga dage ninta kerna si enda? Adi Dibata ras kita, ise kin si banci ngelawan kita?+
32 Mereken AnakNa pe labo Ia sangsi, tapi korbankenNa guna kita,+ la kin Dibata ras AnakNa pe pasti mereken kerinana man banta alu mehuli?
33 Ise si banci nuduh kalak si pilih Dibata?+ Dibata kap si ngatakenca maka kalak e benar.+
34 Ise si banci ngataken kalak e ersalah? Ise pe la banci. Sebap Kristus Jesus enggo mate janah ipegeluh mulihi arah si mate nari, si gundari enggo kundul i sebelah kanan Dibata+ janah banna pemindon guna kita.+
35 Ise si banci nirangken kita arah kekelengen Kristus nari?+ Banci kin kiniseran nirangkenca, ntah pe kesusahen, penindasen, kelihen, la ruis, bahaya, ntah pe pedang?+
36 Lit tertulis, “Perban Kam nge maka gedang-gedang wari kami iancam kematen. Kami ipeseri ras biri-biri si nandangi igeleh.”+
37 Tapi perban penampat Kristus si engkelengi kita, tuhu-tuhu menang kita ngadapi si e kerina.+
38 Tek aku maka kematen, ntah kegeluhen, ntah malekat-malekat, ntah pemerentah, ntah kai si lit gundari, ntah kai si lit pagi, ntah kuasa,+
39 ntah kai si lit i datas, ntah kai si lit i teruh, ntah kai pe si enggo iciptaken, la lit si banci nirangken kita arah kekelengen Dibata si buktikenNa arah Kristus Jesus Tuanta.
Cataten i teruh
^ Bas bahasa Heber ntah pe bahasa Aram, e ertina “O Bapak!”
^ Ntah “ipetangkas.”
^ As. “ngaloken buah si pertama arah juma nari.”
^ Ntah “megenggeng.”
