Roma 9:1-33
9 Selaku pengikut Kristus, labo aku erbual. Pusuh peratenku si itegu-tegu kesah si badia mereken kesaksin radu ras aku,
2 maka ceda kel ateku janah lalap aku sedih.
3 Nggit aku isirangken arah Kristus selaku kalak si isumpahi guna turang seninaku, eme si sada bangsa ras aku.
4 Kalak e eme kalak Israel si iangkat jadi anak-anak Dibata.+ Ibereken man kalak e kemulian, perjanjin-perjanjin,+ Undang-Undang Musa,+ pelayanen si badia,+ bage pe janji-janji.+
5 Kalak enda keturunen nini bulangta,+ janah Kristus rehna arah keturunen kalak e nari.+ Terpujilah Dibata si erkuasa bas kerinana seh rasa lalap. Amin.
6 Tapi, enda labo ertina kata Dibata e gagal. Sebap labo kerina kalak Israel tuhu-tuhu “kalak Israel.”+
7 Amin pe kalak e kerina keturunen Abraham tapi labo kerina tuhu-tuhu anak Abraham.+ Lit tertulis, “Arah Isak pagi rehna keturunenndu.”+
8 Emaka, labo kerina anak Abraham tuhu-tuhu anak Dibata,+ tapi si lahir arah janji e+ si ikataken keturunen Abraham.
9 Janji e isina, “Bas waktu si bagenda ka, reh pagi Aku janah enggo lit pagi anak Sara dilaki.”+
10 Janji e labo ibereken sanga si e saja, tapi ibereken ka sanga Ribka hamil, anakna kembar janah bapakna eme Isak, nini bulangta.+
11 Sope kalak e lahir, bage pe sope lakoken kalak e si mehuli ntah si jahat, enggo ipilih Dibata kalak e perban bage sura-sura Dibata, labo perban perbahanen kalak e.
12 Enggo kataken Dibata man Ribka, “Sintua pagi si ngelayani si nguda.”+
13 Bagi lit tertulis, “Keleng ateKu Jakup, tapi segat ateKu Esau.”+
14 Adi bage sikataken nge Dibata la adil? Tentu lang!+
15 Nina Dibata man Musa, “Mekuah ateKu man ise pe si ateKu mekuah, Kukelengi ise pe si ateKu Kukelengi.”+
16 Emaka pilihen e labo perban sura-sura manusia ntah pe usahana, tapi perban perkuah ate Dibata.+
17 Lit ayat ngataken kerna raja Mesir,* “Kupediat kam nggeluh gelah banci Kucidahken kuasaKu, gelah tandai kalak gelarKu i belang-belang doni.”+
18 Emaka man ise ate Dibata cidahkenNa perkuah ateNa, man bana kap cidahkenNa. Tapi kalak si deban pediatNa keras kepala.+
19 Gundari, tersungkun-sungkun kena man bangku, “Adi bage, engkai maka salahken Dibata denga manusia? Ise kin si ngasup ngelawan peraten Dibata?”
20 Ise kin kena maka pang kena njawapi Dibata?+ Bagenda nge nina taneh liat si enggo ibentuk man si mbentuk ia, “Engkai maka bagenda aku bentukndu?”+
21 La kin ate-ate sekalak tukang kudin nge mbentuk taneh liat+ jadi sada barang si penting ntah pe jadi barang si biasa?
22 Ban kalak jahat Dibata merawa, seri bagi barang si patut ikernepkenNa. Amin pe merawa ate Dibata janah cidahkenNa ateNa kuasaNa man kalak si bage, tapi sabar Ia.
23 Alu bage cidahkenNa kemulianNa si luar biasa nandangi barang si patut ngaloken perkuah ateNa,+ si enggo sikapkenNa guna imuliaken.
24 Kita kap barang e, si ipilih labo saja arah bangsa Jahudi nari, tapi arah bangsa si deban pe.+
25 Enda bagi si katakenNa bas buku Hosea, “Kalak si labo umatKu,+ Kugelari pagi ‘umatKu,’ diberu si la Kukelengi, Kukataken pagi ‘si Kukelengi.’+
26 Bas ingan si mbarenda Kukataken man kalak e, ‘Kena labo umatKu,’ i je pagi kalak e ikataken ‘anak-anak Dibata si nggeluh.’”+
27 Selain si e, nina Jesaya kerna Israel, “Amin pe bagi kersik i laut teremna kalak Israel, sitik ngenca pagi iselamatken.+
28 Sebap hakimi Jahwe* pagi kalak si lit i doni, janah dungiNa alu meter.”+
29 Selain si e pernah kataken Jesaya, “Adi Jahwe* penguasa malekat la nadingken keturunen man banta, pasti kita bagi Sodom, pasti kita bagi Gomora.”+
30 Adi bage, uga nge ninta? Kalak arah bangsa si deban erikiniteken emaka kalak e ianggap kalak si benar,+ amin gia la usahakenna jadi kalak si benar.+
31 Amin pe usahaken kalak Israel gelah ianggap benar alu ndalanken undang-undang, tapi labo banci tuhu-tuhu dalanken kalak e.
32 Engkai maka bage? Perban usahaken kalak e gelah ianggap benar alu perbahanenna, labo alu kiniteken. Emaka tertuktuk kalak e ku “batu si erban tertuktuk.”+
33 Bagi lit tertulis, “Nenlah! Kutamaken sada batu i Sion+ si erban kalak tertuktuk ras batu si erban kalak ndabuh, tapi ise pe si erkiniteken man bana, labo pernah ikecewaken.”+
