Rut 1:1-22
1 Sanga hakim-hakim+ merentah, terjadi kelihen bas Israel. Lit sekalak dilaki ras diberuna bage pe dua anakna dilaki lawes ku daerah Moap.+ Kalak e arah Betlehem+ si lit i Juda. Tading kalak e i je jadi kalak asing.
2 Gelar dilaki e Elimelek,* gelar diberuna Naomi,* gelar anakna Mahlon* ras Kilyon.* Kalak e kalak Eprata arah Betlehem si lit i Juda. Seh kalak e i daerah Moap, tading kalak e i je.
3 Bas sada wari, mate Elimelek. Emaka tading diberuna eme Naomi ras duana anakna.
4 Duana anakna e ngempoi diberu arah Moap. Gelar diberu e Orpa ras Rut.+ Kalak e tading i Moap kira-kira sepuluh tahun dekahna.
5 Kenca si e, mate ka Mahlon ras Kilyon, emaka sisada nari ngenca Naomi, lanai lit dilakina bage pe anakna.
6 Sanga i Moap, begi Naomi maka enggo perdiateken Jahwe mulihi umatNa alu mereken pangan.* Emaka berkat ia ras duana permenna nadingken Moap.
7 Naomi ras duana permenna nadingken inganna tading e. Sanga kalak e erdalan mulih ku Juda,
8 ngerana Naomi man duana permenna e, nina, “O Nakku, mulihlah kena ku rumah mamak kena. Mbera-mbera buktiken Jahwe kekelengenNa si setia man kena,+ bagi kena enggo mbuktiken kekelengen si setia man dilaki kena si enggo mate bage pe man bangku.
9 Mbera-mbera bere Jahwe kena perbulangen+ gelah aman geluh kena.” Kenca si e, emana kalak e, tangis teriluh kel kalak e.
10 Tapi lalap kataken kalak e, “Lang Bibi, ikut ate kami ras kam mulih ku bangsandu.”
11 Tapi nina Naomi, “Mulihlah kena, Nakku. Man kai nari kin ikutken kena aku? Banci denga kin lit anakku si jadi dilaki kena?+
12 Mulihlah, Nakku. Laweslah kena, sebap enggo metuasa aku adi erjabu. Bicara erjabu pe aku bas berngi enda janah kulahirken anak-anak dilaki,
13 tertimai kena denga kin ngasa ia galang? Nggit kin kena la sereh-sereh nimai kalak e? Ula bage, Nakku. Enggo hukum Jahwe kap aku, adi kuukuri kai si terjadi man kena, sedih kel kuakap.”+
14 Nderkuh ka kalak e mulihi. Kenca si e, ema Orpa simetuana e jenari lawes ia. Tapi Rut tetap ras Naomi.
15 Emaka nina Naomi, “Nenlah! Orpa enggo mulih ku bangsana bage pe ku dibata-dibatana. Mulihlah kam ras ia.”
16 Tapi nina Rut, “Ula min suruhndu aku nadingken kam, ula min suruhndu aku lawes. Sebap ku ja kam lawes ku je aku lawes, i ja kam erberngi i je aku erberngi. Bangsandu jadi bangsaku, Dibatandu jadi Dibataku.+
17 I ja kam mate i je aku mate, janah i je ka aku ikuburken. Jahwe si ngukum aku adi kupediat lit si nirangken aku ras kam, selain isirangken kematen.”
18 Sanga idah Naomi lalap ate Rut ikut ras ia, lanai suruhna ia mulih.
19 Emaka duana kalak e nerusken perdalanenna ku Betlehem.+ Seh kenca i Betlehem, guntar kota e, nina diberu-diberu si lit i je, “Naomi kin enda?”
20 Nina man diberu-diberu e, “Ula lebuh kena aku Naomi.* Lebuh saja aku Mara,* sebap enggo pagit kel geluhku+ ban Dibata Si Madakuasa.
21 Sanga aku lawes, la lit si kurang, tapi sanga aku mulih, kadeku pe lanai lit ban Jahwe. Enggo hukum Jahwe aku, enggo mesera kel geluhku+ ban Dibata Si Madakuasa. Engkai maka lebuh kena denga aku Naomi?”
22 Bage me ceritana Naomi mulih daerah Moap nari ras permenna Rut, kalak Moap.+ Kalak e seh i Betlehem sanga musim rani barli imulai.+
Cataten i teruh
^ Ertina “Dibataku kap Raja.”
^ Ertina “Keriahenku.”
^ Mungkin arah bahasa Heber si ertina “reh lemahna; jadi sakit.”
^ Ertina “Kalak si Reh Lemahna; Kalak si Nandangi Mate.”
^ As. “roti.”
^ Ertina “Keriahenku.”
^ Ertina “Pagit.”
