Rut 2:1-23
2 Lit kade-kade Naomi seh kel bayakna, gelarna Boas.+ Boas e keluarga Elimelek, dilaki Naomi.
2 Nina Rut kalak Moap e man Naomi, “O Bi, banci nge aku lawes ku juma gelah kupepulung sisa-sisa peranin+ arah kalak si rate mekuah man bangku?” Nina Naomi man bana, “Banci, Nakku.”
3 Lawes ia, pepulungina sisa peranin, ikut-ikutna kalak si rani. Rembang ka juma si dahina e juma Boas,+ keluarga Elimelek.+
4 La ndekah kenca si e, reh Boas arah Betlehem nari, nina man kalak si rani, “Mejuah-juah, Jahwe kap ras kena.” Aloi kalak e, “Mejuah-juah, Jahwe si masu-masu kam.”
5 Kenca si e, sungkun Boas anak perana si jadi mandor kalak si rani e, “Ise keluarga diberu si nguda denga ah?”
6 Nina mandor e, “Diberu si nguda denga e kalak Moap.+ Ikut ia mulih ras Naomi arah daerah Moap nari.+
7 Sungkunna ndai aku, ‘Banci nge aku ikut mpepulung sisa peranin,+ si tadingen ban kalak si rani i juma enda?’ Pagi-pagi nari terus ia erdahin, la erngadi-ngadi seh ngasa gundari. E denga kel ia ngadi ntisik bas sapo.”
8 Kenca si e nina Boas man Rut, “Begiken aku, Nakku. Ula kam lawes ku juma si deban mpepulung sisa peranin, ula kam lawes ku japa pe. Tetaplah kam i deher diberu-diberu+ si erdahin man bangku.
9 Perdiateken juma ingan kalak e rani, ikutken kalak e. Enggo kukataken man dilaki-dilaki si lit i jenda gelah ula kam gangguna.* Adi muas kam, buat saja bas ingan lau ah. Inem saja lau si enggo sikapken dilaki si erdahin i je.”
10 Megi si e, sujud Rut, nina, “Engkai maka mehuli kel kam man bangku? Engkai maka perdiatekenndu kel aku padahal aku kalak asing?”+
11 Nina Boas, “Enggo kubegi kerina si kataken kalak kerna kam, eme kerina si enggo lakokenndu man bibindu kenca mate perbulangenndu. Tadingkenndu bapakndu, mamakndu, bage pe kutandu, lawes kam ku bangsa si lenga tandaindu.+
12 Mbera-mbera pasu-pasu Jahwe kerina si enggo lakokenndu.+ Mbera-mbera mbelin kel upah si datndu arah Jahwe nari, Dibata kalak Israel, si teruh kabengNa kam erlindung.”+
13 Nina Rut, “Bujur Tuan, enggo mehuli kam man bangku, enggo apulindu* aku, tenang kel kuakap* megi rananndu e, amin pe aku labo sierdahinndu.”
14 Sanga man, lebuh Boas me Rut, “Mari ku jenda, pan roti enda, celupken rotindu e ku cuka.” Emaka kundul Rut i deher sierdahin Boas. Bereken Boas man bana barli si enggo ipanggang, janah pan Rut ngasa besur, tapi lit denga si tadingkenna.
15 Sanga tedis Rut guna mpepulung sisa peranin,+ perentahken Boas man kerina sierdahinna, “Pediat saja pepulungna sisa peranin, termasuk barli si enggo ipotong, ula ganggu kena ia.+
16 Buat kena ka piga-piga arah peranin si enggo iiket e, jenari tadingken gelah pepulungna. Ula larang kena ia.”
17 Emaka lalap pepulungna sisa peranin i juma seh ngasa ben.+ Sanga pekpek-pekpekkenna* sisa peranin si datna, hasilna lit kira-kira 13 kilo* barli.
18 Kenca si e, babana barli e ku kota, janah idah bibi simetuana si pepulungna e. Bereken Rut ka pangan si tadingkenna+ ndai man bibina.
19 Nungkun bibi Rut bana, “I ja kam ndai mpepulung sisa peranin? Bas juma ise kam ndai erdahin? Mbera-mbera ipasu-pasu+ kalak si mperdiateken kam.” Emaka ceritaken Rut man bibina bas juma ise ia erdahin, nina, “Sendah aku erdahin bas juma sekalak dilaki gelarna Boas.”
20 Emaka nina Naomi man permenna, “Mbera-mbera ipasu-pasu Jahwe ia, Dibata si mbuktiken kekelengenNa si setia man kalak si nggeluh denga bage pe si enggo mate.”+ Nina Naomi ka, “Dilaki e kade-kadeta denga.+ Ia salah sada si ertanggung jawap+ nampati* kita.”
21 Kenca si e, nina Rut kalak Moap e, “Katakenna ka bangku, ‘Tetaplah kam ndeher ras sierdahinku seh ngasa dung kerina iperani.’”+
22 Nina Naomi man Rut permenna, “O Nakku, ulin nge adi ikut kam ras sierdahinna si diberu, perban bas juma si deban, banci kari kam ganggui kalak.”
23 Emaka tetap Rut i deher sierdahin Boas si diberu. Lalap pepulungna sisa peranin+ seh ngasa dung rani barli bage pe gandum. Tetap ia tading ras bibina.+
Cataten i teruh
^ As. “kuitna.”
^ As. “janah kena kel ku pusuhku.”
^ Ntah “pegegehindu.”
^ Ntah “paspaskenna.”
