Rut 3:1-18
3 Ngerana Naomi man Rut, “O Nakku, arus kudarami teman geluhndu,*+ gelah tenang akapndu nggeluh.
2 Boas ah ndai kade-kadeta kap.+ Diberu-diberu si jadi temanndu erdahin e, sierdahin Boas kerina. Berngi enda miari biji barli ia bas ingan ngerik.*
3 Emaka, ridilah kam, pake minak wangindu, pake bajundu si mejilena, jenari lawes kam ku inganna ngerik. Ula sempat tehna lit kam i je seh ngasa dung ia man ras minem.
4 Perdiateken ja ia medem, jenari dahi ia, buka cabin si nutupi nahena. Kenca e, tayang kam deher nahena. Katakenna nge kari kai si arus lakokenndu.”
5 Nina Rut, “Kerina si katakenndu e pasti kulakoken, Bi.”
6 Emaka lawes ia ku ingan ngerik, lakokenna kerina si kataken bibina ndai man bana.
7 Paksa si e, Boas sangana man ras minem, meriah sangana ukurna. Kenca e, medem ia i samping barli si enggo ipepulung. Reh Rut alu manjar-anjar, bukana cabin si nutupi nahe Boas, tayang ia i deher nahena.
8 Bas tengah berngi, bergehen Boas. Medak ia janah idahna lit sekalak diberu tayang deher nahena.
9 Nina, “Ise kam?” Nina, “Aku, Rut. Lindungi min aku,* sebap kam kap si ertanggung jawap nampati* keluargaku.”+
10 Megi si e, nina Boas, “Mbera-mbera ipasu-pasu Jahwe kam, Nakku. Kekelengenndu si setia si buktikenndu gundari, belinen asangken si tangtangna.+ La ayakindu anak perana, la soal ia mesera ntah pe bayak.
11 Ula kam mbiar, Nakku. Pasti kulakoken kai si pindondu,+ sebap kerina kalak si lit bas kota* enda meteh maka kam diberu si seh kel ulina.
12 Memang payo, aku si ertanggung jawap+ nampati* keluargandu, tapi lit denga kade-kadendu si terdeheren si lebih ertanggung jawap nampati keluargandu asangken aku.+
13 Jenda saja kam erberngi. Pagi erpagi-pagi, adi nggit kade-kadendu e, ia me si ertanggung jawap nampati* keluargandu.+ Tapi, adi la ia nggit, ersumpah aku i lebe-lebe Jahwe si nggeluh, aku si ertanggung jawap nampati keluargandu. Gundari, medemlah kam i jenda ngasa erpagi-pagi.”
14 Emaka medem ia deher nahe Boas seh ngasa erpagi-pagi. Sope terang medak ia, gelah ula lit si ngidah ia. Sebap nina Boas man bana, “Ula sempat lit si metehsa maka lit sekalak diberu reh ku ingan ngerik.”
15 Nina Boas ka, “Pebelang cabin si pakendu ena.” Emaka pebelang Rut cabinna e, jenari tamaken Boas ku je 25 kilo* barli, janah berekenna man* Rut. Kenca si e, lawes Boas ku kota.
16 Seh kenca Rut i rumah, sungkun bibina ia, “Uga ndai,* Nakku?” Emaka ceritaken Rut kerina perbahanen Boas man bana.
17 Nina Rut ka, “Kataken Boas man bangku, ‘Ula kam la erluah mulih ku bibindu.’ Emaka, berekenna man bangku barli enda 25 kilo.”*
18 Megi si e, kataken Naomi man Rut, “Timai saja jenda, Nakku. Nenndu saja kai kari si terjadi. Adi la kin dungi Boas masalah enda sendah, labo ia banci tenang.”
Cataten i teruh
^ Ntah “kudarami rumahndu.”
^ Ntah “Cabini aku alu uisndu.”
^ As. “gerbang.”
^ Ntah “janah tamakenna ku das takal.”
^ As. “Ise kam.”
