Rut 4:1-22
4 Lawes Boas ku gerbang kota,+ kundul ia i je. Lewat dilaki si ceritaken Boas ndai,+ eme dilaki si lebih ertanggung jawap nampati* keluarga Rut. Dilo Boas me dilaki e, nina, “O senina,* mari kundulken jenda.” Emaka kundul ia.
2 Kenca si e, dilo Boas sepuluh peminpin kota,+ nina, “Kundulken kena jenda.” Emaka kundul kalak e i je.
3 Nina Boas man dilaki e,+ “Naomi enggo mulih arah daerah Moap+ nari, terpaksa dayakenna taneh seninata Elimelek.+
4 Emaka perlu kuakap kukataken enda man bandu, ‘Tukurlah taneh e i lebe-lebe kalak si lit i jenda bage pe i lebe-lebe peminpin-peminpin bangsata.+ Adi nggit kam nukursa, tukurndulah. Tapi adi la kam nggit, kataken man bangku gelah kuteh, sebap kam kap si lebih ertanggung jawap nampati ia. Kenca kam, emaka aku.’” Nina dilaki e, “Nggit aku nukursa.”+
5 Nina Boas ka, “Perlu ingetndu maka taneh e labo jang Naomi saja, tapi e pe jang Rut kalak Moap, eme ndehara anak Naomi si enggo mate. Emaka adi tukurndu atendu taneh e, arus tukurndu arah kalak e duana. Alu bage, taneh e tetap atas nama kalak si enggo mate e.”+
6 Nina dilaki e, “Adi bage kin, aku la banci nukursa, rugi kari aku.* Kam saja yah, pakendu saja hakku e guna nukursa. Adi aku labo tertukurku.”
7 Adi lit sekalak jelma si ertanggung jawap atena nampati keluargana,* bage pe adi lit kalak si mindahken hakna atena man kalak si deban, arus sahkenna alu sada perjanjin. Guna ngesahkenca, arus lepaskenna selopna+ janah berekenna man kalak si nukursa. E me kebiasan kalak Israel paksa si e.
8 Emaka sanga kataken dilaki e man Boas, “Kam saja si nukursa,” lepasken dilaki e selopna.
9 Ngerana Boas man peminpin-peminpin e bage pe man kerina kalak si lit i je, “Bas wari enda kena si jadi saksina,+ kutukur arah Naomi kerina si jadi jang Elimelek, Kilyon, bage pe Mahlon.
10 Kuempoi ka pagi Rut, kalak Moap e, diberu Mahlon mbarenda, gelah warisenna+ tetap atas nama Mahlon. Alu bage, gelar dilaki si mate e la masap arah tengah-tengah seninana bage pe arah kalak si lit i kutana.* Kena jadi saksina bas wari enda.”+
11 Kerina kalak si lit bas gerbang kuta e bage pe peminpin-peminpin ngataken, “Kami saksina! Mbera-mbera pasu-pasu Jahwe diberu si empoindu e, gelah bali ia bagi Rahel ras Lea, si jadi nini kalak Israel.+ Mbera-mbera berhasil kam i Eprata,+ jadi kalak terpandang kam* i Betlehem.+
12 Mbera-mbera bereken Jahwe man bandu keturunen arah diberu si nguda e,+ alu bage keluargandu bagi keluarga Peres,+ eme anak Juda si lahirken Tamar.”
13 Emaka empoi Boas me Rut janah erhubungen seks kalak e. Perban pasu-pasu Jahwe, hamil Rut, lahirkenna sekalak anak dilaki.
14 Kenca si e, enterem diberu si ngataken man Naomi, “Terpujilah Jahwe, sebap gundari enggo berekenNa kalak si ertanggung jawap nampati keluargandu. Mbera-mbera terberita gelar anak e bas Israel!
15 Ia* si erban kam megegeh mulihi. Sanga metua kam pagi, ia si ngurus kam, sebap ia lahir arah permenndu si engkelengi kam,+ si ergan asangken pitu anak dilaki.”
16 Buat Naomi anak e, angkipna, janah urusna.
17 Kenca si e, ban tetangga-tetanggana si diberu gelar anak e. Nina kalak e, “Sekalak anak dilaki enggo ilahirken man Naomi,” ban kalak e gelarna Obet.+ Obet kap bapak Isai,+ Isai kap bapak Daud.
18 Enda keturunen Peres:+ Peres eme kap bapak Hesron;+
19 Hesron kap bapak Ram; Ram kap bapak Aminadap;+
20 Aminadap+ kap bapak Nahesson; Nahesson kap bapak Salmon;
21 Salmon kap bapak Boas; Boas kap bapak Obet;
22 Obet kap bapak Isai;+ janah Isai kap bapak Daud.+
Cataten i teruh
^ Gelar dilaki e sengaja la ikataken.
^ As. “sebap banci kari ceda warisenku.”
^ As. “si pekena-kenana atena keluargana.”
^ As. “i gerbang kutana.”
^ As. “janah terberita gelarndu.”
^ Maksudna, kempu Naomi.
