Sakaria 1:1-21
1 Bas bulan pewaluhken bas tahun si peduaken pemerentahen Darius,+ reh kata Jahwe man Nabi Sakaria*+ anak Berehia kempu Iddo, nina,
2 “Merawa kel Jahwe man nini bulang kena.+
3 “Kataken man kalak e, ‘Bagenda nina Jahwe penguasa malekat, “‘Mulihlah kena man bangKu,’ nina Jahwe penguasa malekat, ‘janah Aku pe mulih pagi ku kena,’+ nina Jahwe penguasa malekat.”’
4 “‘Ula kena seri ras nini bulang kena. Mbarenda kataken nabi-nabi man kalak e, “Bagenda nina Jahwe penguasa malekat, ‘Robahlah kena arah dalan geluh kena ras perbahanen kena si jahat.’”’+
“‘Tapi la begiken kalak e, la perdiatekenna Aku,’+ nina Jahwe.
5 “‘Nini bulang kena enggo mate, nabi-nabi e pe enggo lanai lit.
6 Tapi kata-kataKu ras ketetapenKu si Kupeseh arah nabi-nabiKu tuhu-tuhu terjadi man nini bulang kena.’+ Emaka mulih kalak e man bangKu, nina, ‘Jahwe penguasa malekat enggo ngelakoken kai si tetapkenNa. Si lakokenNa e sebanding ras perbahanen kami bage pe lagu langkah kami.’”+
7 Bas wari pe-24-ken bas bulan pe-11-ken, eme bulan Sebat,* bas tahun si peduaken pemerentahen Darius,+ Nabi Sakaria anak Berehia kempu Iddo ndatken pengenehenen* arah Jahwe:
8 “Bas sada berngi kudat sada pengenehenen. Bas pengenehenen e kuidah sekalak dilaki si nangkih kuda megara. Kenca si e, ngadi ia i tengah batang-batang mirtel* bas lembah si mbages. I pudi kuda e lit kuda si megara, kuda coklat si agak megara, ras kuda mbentar.”
9 Emaka ningku, “Ise kalak e, Tuanku?”
Nina malekat si ngerana ras aku e ngaloi, “Kucidahken kari man bandu ise kin kalak e.”
10 Kenca si e, ngerana dilaki si lit i tengah batang-batang mirtel e, nina, “Kalak e kap si utus Jahwe guna niar-niari doni.”
11 Ning kalak e man malekat Jahwe si lit i tengah batang-batang mirtel e, “Enggo siar-siari kami doni, janah belang-belang doni tenang ras dame.”+
12 Emaka nina malekat Jahwe e, “O Jahwe penguasa malekat, ngasa ndigan la mekuah ateNdu man Jerusalem ras kota-kota Juda?+ Enggo 70 tahun Kam merawa man kalak e.”+
13 Aloi Jahwe me malekat si ngerana man bangku e alu kata-kata si mehuli ras erban tenang.
14 Kenca si e nina malekat e man bangku, “Umumkenlah enda, ‘Bagenda nina Jahwe penguasa malekat, “Semangat kel Aku ngelindungi Jerusalem ras Sion, tuhu-tuhu semangat kel Aku.+
15 Labo Aku merawa kel man umatKu,+ tapi susah kel umatKu iban bangsa-bangsa si deban.+ Emaka merawa kel Aku man bangsa-bangsa si deban si tenang kapna e.”’+
16 “E me sebapna bagenda nina Jahwe, ‘“Mulih pagi aku ku Jerusalem, mekuah pagi ateKu ia.+ Ibangun pagi rumahKu i je,+ iukur pagi Jerusalem gelah banci ibangun mulihi,”+ nina Jahwe penguasa malekat.’
17 “Kenca si e, umumkenlah enda, ‘Bagenda nina Jahwe penguasa malekat, “Mulihi pagi kota-kotaKu dem alu kai si mehuli. Apuli Jahwe pagi Sion mulihi,+ pilihNa pagi Jerusalem mulihi.”’”+
18 Dung e kuidah empat tanduk.+
19 Emaka kusungkun malekat si ngerana ras aku e, “Kai ah?” Nina ngaloi, “Ah tanduk-tanduk si erban Juda,+ Israel,+ ras Jerusalem merap.”+
20 Kenca si e, cidahken Jahwe man bangku empat tukang si beluh.
21 Ningku, “Erkai ate kalak e reh?”
Nina, “Tanduk-tanduk e eme tanduk si erban Juda merap seh ngasa lanai lit si banci erban tegak takalna. Tukang-tukang e reh guna erban tanduk-tanduk e mbiar, guna ngancurken tanduk bangsa-bangsa, eme bangsa-bangsa si ngangkat tandukna nyerang Juda gelah merap pendudukna.”
Cataten i teruh
^ Ertina “Enggo Inget Jahwe.”
^ Eme kerna kai pe si cidahken Dibata ku bas pikiren sekalak jelma.
^ Batang-batang si erndilap bulungna janah mbentar bungana ras merim.
