Sakaria 14:1-21
14 “Wari Jahwe nandangi reh, barang-barangndu* si enggo ijarah ibagi-bagiken pagi i lebe-lebendu.
2 Kupepulung pagi kerina bangsa guna erperang ngelawan Jerusalem. Irebut pagi kota e, ijarah pagi rumah-rumahna, iperkosa pagi diberu-diberuna, itaban pagi setengah penduduk kota e. Tapi kalak si tading denga la pagi ikernepken arah kota e.
3 “Maju pagi Jahwe erperang ngelawan bangsa-bangsa e,+ bagi sanga erperang Ia bas wari peperangen.+
4 Bas wari e, tedis pagi naheNa i Gunung Saitun,+ si lit i sebelah timur Jerusalem. Terbelah dua pagi Gunung Saitun e, timur* nari seh ku barat.* Emaka lit pagi lembah si galang. Kenca si e miser pagi gunung si setengah e ku utara, setengahna nari ku selatan.
5 Kiam pagi kena ku lembah gunung-gunungKu, perban seh pagi lembah e ku Asel. Kiam pagi kena bagi sanga kena kiam perban gempa bas jaman Ussia raja Juda.+ Reh pagi Dibata Jahwe radu ras kerina kalak si badia.+
6 “Bas wari e, lanai pagi lit cahaya si ersinar,+ kerinana enggo beku.*
7 Wari e arus itandai jadi wari Jahwe.+ La pagi lit si meteh bedana suari ras berngi. Paksa berngi pe lit pagi terang.
8 Bas wari e, maler pagi lau kegeluhen+ arah Jerusalem nari.+ Setengah maler ku laut sebelah timur,*+ setengah nari maler ku laut sebelah barat.*+ Maler pagi lau e bas musim perlego ras musim perudan.
9 Jahwe pagi jadi Raja i belang-belang doni.+ Bas wari e Jahwe ngenca Dibata,+ sada ngenca gelarNa.+
10 “Belang-belang negri e bali pagi bagi Araba,+ mulai Geba nari+ seh ku Rimon+ si lit i selatan Jerusalem. Ipeganjang pagi Jerusalem bas inganna si mbarenda janah iingani pagi ia,+ mulai Gerbang Benyamin nari+ seh ku Gerbang si Pertama, seh ku Gerbang Suki, bage pe mulai Menara Hananel nari+ seh ku ingan meras anggur raja.
11 Ringan pagi kalak i Jerusalem. Lanai pagi isumpahi kota e guna ihancurken,+ aman pagi akap kalak si ringan i Jerusalem.+
12 “Ban Jahwe pagi bangsa si erperang ngelawan Jerusalem kena penakit enda:+ Macik pagi daging kalak e, amin pe nggeluh denga. Macik pagi mata kalak e bas lubang matana, macik pagi dilah kalak e bas babahna.
13 “Bas wari e, ban Jahwe pagi kerina kalak e panik. Tiap kalak pagi ngelawan temanna janah siserang-serangen kalak e.+
14 Juda pe ikut pagi erperang i Jerusalem. Ipepulung pagi kerina kebayaken bangsa si lit i sekelilingna, eme emas, pirak, ras paken si seh kel buena.+
15 “Penakit si bage pe engkenai kuda, bagal,* kelede, ras kerina asuh-asuhen bas perkemahen musuh.
16 “Tiap tahun, kalak si nggeluh denga arah kerina bangsa si ngelawan Jerusalem,+ arus lawes ku Jerusalem guna nembah Raja eme Jahwe penguasa malekat,+ guna ngerayaken Perayan Sapo-Sapo.+
17 Tapi ise pe ia, arah bangsa si apai pe ia, adi la ia reh ku Jerusalem guna nembah Raja eme Jahwe penguasa malekat, labo pagi nusur udan ku bangsana.+
18 Adi bangsa Mesir la reh janah la masuk ku kota e, la pagi dat kalak e udan. Susah pagi kalak e iban Jahwe perban penakit, bagi penakit si banNa terjadi man bangsa si la reh ngerayaken Perayan Sapo-Sapo.
19 Enda ndai me hukumen man dosa Mesir ras dosa kerina bangsa si la reh guna ngerayaken Perayan Sapo-Sapo.
20 “Bas wari e, i lonceng-lonceng si lit bas kuda lit pagi tulisen, ‘Badia kap Jahwe!’+ Kudin-kudin+ bas rumah Jahwe bali pagi bagi mangkok-mangkok+ si lit i lebe-lebe ingan nutung* persembahen.
21 Kerina kudin si lit i Jerusalem ras i Juda jadi badia pagi janah jadi jang Jahwe penguasa malekat. Kerina kalak si nggit mpersembahken korban reh pagi, pakena kudin-kudin e guna mbelgang daging. Bas wari e, lanai pagi lit kalak Kanaan* i rumah Jahwe penguasa malekat.”+
Cataten i teruh
^ Maksudna, barang-barang i kota si ikataken bas ayat 2.
^ Ntah “matawari terbit.”
^ As. “laut.”
^ Ntah “la banci muit,” kaku perban mbergeh kel.
^ Maksudna, Laut Tengah.
^ Maksudna, Laut Mati.
^ Keturunen kelede jantan ras kuda beruna.
^ Ntah banci saja “lit pedagang.”
