Sakaria 4:1-14
4 Malekat si ngerana ras aku ndai reh mulihi, ingetina aku bagi ngingeti kalak si sangana medem.
2 Kenca si e nina man bangku, “Kai si idahndu?”
Ningku ngaloi, “Lit kuidah sada ingan lampu si iban arah emas nari.+ I datasna lit sada mangkok. Bas bagin si arah datas ingan lampu e, lit pitu lampu.+ Tiap lampu e lit sada pipana.
3 I samping ingan lampu e lit dua batang saitun,+ sada i kanan mangkok e ras sada nari i kirina.”
4 Kenca si e kusungkun malekat si ngerana ras aku e, “O Tuanku, kai nge ertina kerina e?”
5 Dung e sungkun malekat e ka aku, “Tehndu nge ertina e?”
Ningku ngaloi, “Lang, Tuanku.”
6 Kenca si e nina man bangku, “Bagenda nina Jahwe man Serubabel, ‘“Si e kerina terjadi labo alu gegeh pasuken perang ntah pe alu gegeh manusia,+ tapi alu kesah si badiaKu,”+ nina Jahwe penguasa malekat.
7 Amin pe si ngambati bagi gunung galangna, rata pagi e ras taneh+ adi itamaken i lebe-lebe Serubabel.+ Babana pagi ndarat batu guna bagin si arah datasna bas rumah pertoton, ersurak pagi kalak, nina, “Mejile kel! La tanggung jilena!”’”
8 Nina Jahwe ka man bangku,
9 “Enggo ban Serubabel pondasi rumah pertoton enda,+ dungina pagi alu tanna.”+ Alu bage teh kena pagi maka Jahwe penguasa malekat kap si ngutus aku man kena.
10 “Ula kena anggap remeh ngidah permulan si kitik e.+ Sebap ermeriah ukur pagi kalak e, idah kalak e pagi Serubabel njemak alat pengukur tegak lurus.* Si pitu e eme mata Jahwe, pituna mata e niar-niari doni janah idahna kerina si e.”+
11 Kenca si e, kusungkun ia, “Kai erti dua batang saitun si lit i sebelah kanan ras kiri ingan lampu e?”+
12 Kusungkun ka ia, “Kai erti dua iket cabang* saitun si erban maler minak si warnana bagi emas arah dua tabung emas e?”
13 Sungkunna ka aku, “Tehndu nge ertina e?”
Ningku ngaloi, “Lang, Tuanku.”
14 Nina man bangku, “Enda duana ngertiken dua kalak si ipilih si tedis i deher Tuhan si erkuasa i belang-belang doni.”+
