Sakaria 5:1-11
5 Dung e, kuidah sada gulungen si kabang.
2 Sungkun malekat e aku, “Kai si idahndu e?”
Ningku ngaloi, “Gulungen si kabang, gedangna kira-kira siwah meter, belangna kira-kira empat setengah meter.”*
3 Kenca si e nina man bangku, “Kena sumpah pagi belang-belang doni bagi si tertulis bas gulungen e. Bas sada bagin gulungen e tertulis sumpah man kerina pinangko,+ sebap sedekah enda kalak e la ihukum. Bas balikna tertulis sumpah man kerina kalak si ersumpah palsu,+ sebap sedekah enda kalak e la ihukum.
4 Nina Jahwe penguasa malekat, ‘Enggo Kukirim sumpah e, masuk pagi sumpah e ku rumah pinangko ras rumah kalak si ngataken sumpah palsu bas gelarKu. Tetap pagi i je sumpah e, kernepkenna rumah e, kayu-kayuna, bage pe batu-batuna.’”
5 Jenari malekat si ngerana ras aku e ndeheri aku, nina, “Nenlah. Lit ka si deban si teridah.”
6 Emaka kusungkun ia, “Kai e?”
Nina ngaloi, “Si ndarat e keranjang epa.”* Nina ka, “Bage kap kalak jahat si lit i doni teridah.”
7 Kuidah tutupna si kibul, iban arah timah hitam. Terangkat tutup keranjang e, lit diberu si sangana kundul bas keranjang e.
8 Nina malekat e, “Diberu e gelarna Kejahaten.” Kenca si e dehkenna mulihi diberu e ku bas keranjang e. Jenari tutupna keranjang ndai alu tutup si iban arah timah hitam e.
9 Kenca si e kuidah dua diberu si kabang ndeheri aku. Kabeng kalak e bagi kabeng bangau, kabang kalak e ngikutken angin. Angkat kalak e keranjang ndai ku langit.
10 Emaka nungkun aku man malekat si ngerana ras aku e, “Ku ja atena babana keranjang ah?”
11 Nina man bangku, “Ku negri Babilon.*+ I je, iban pagi rumah man diberu e. Kenca si e, itamaken ia i je, bas ingan si cocok man bana.”
Cataten i teruh
^ Maksudna, sada ingan ntah pe keranjang guna nukati bas ukuren epa. 1 epa = 22 liter. Nen Ket. B14.
^ As. “Sinar.”
