Sakaria 6:1-15
6 Kenca si e, kuidah empat gereta kuda si reh arah antara dua gunung tembaga.
2 Si narik gereta si pertama, kuda-kuda si megara. Si narik gereta si peduaken, kuda-kuda si mbiring.+
3 Si narik gereta si peteluken, kuda-kuda si mbentar. Si narik gereta si peempatken, kuda-kuda si erbintik ras belang-belang.+
4 Kusungkun malekat si ngerana ras aku e, “Kai ertina e, Tuanku?”
5 Nina malekat e ngaloi, “E empat mahluk roh+ si ndarat surga nari kenca kalak e ngadap man Tuhan si erkuasa i belang-belang doni.+
6 Gereta si itarik kuda si mbiring lawes ku negri utara.+ Si itarik kuda mbentar lawes ku negri barat. Si itarik kuda si erbintik lawes ku negri selatan.
7 Kuda-kuda si belang-belang e semangat kel lawes guna niar-niari doni.” Jenari nina malekat e, “Laweslah, siari doni.” Emaka lawes kuda-kuda e niari doni.
8 Kenca si e lebuhna aku, nina, “Nenlah, lanai merawa Jahwe man negri utara perban kuda-kuda e enggo lawes ku je.”
9 Ngerana ka Jahwe man bangku, nina,
10 “Buatlah sumbangen si baba Heldai, Tobiya, ras Jedaya arah kalak si itaban nari. Bas wari si enggo itentuken, laweslah kam ku rumah Josia anak Sepanya radu ras kalak e, eme si enggo mulih arah Babilon.
11 Banlah mahkota arah pirak ras emas nari, kenca si e tamaken ku takal Imam si Mbelin Josua+ anak Jehosadak.
12 Kataken man bana,“‘Bagenda nina Jahwe penguasa malekat, “Enda kap kalak si gelarna Tunas.+ Ertunas pagi ia arah inganna nari, bangunna pagi rumah pertoton Jahwe.+
13 Ia pagi si mbangun rumah pertoton Jahwe, alokenna pagi kemulian. Kundul pagi ia i tahtana jadi raja ras imam.+ Ia pagi si ndalanken duana jabaten e* guna erban dame.
14 Mahkota e arus itamaken i rumah pertoton Jahwe guna jadi peringet-ingeten man Helem, Tobiya, Jedaya,+ ras Hen anak Sepanya.
15 Rehen pagi kalak arah ingan si ndauh nari guna mbangun rumah pertoton Jahwe.” Adi patuhi kena kata-kata Jahwe Dibata kena, teh kena pagi maka si ngutus aku man kena eme kap Jahwe penguasa malekat.’”
Cataten i teruh
^ Maksudna, antara dua jabatenna selaku peminpin ras imam.
