Sakaria 8:1-23
8 Bagenda ka nina Jahwe penguasa malekat man bangku,
2 “Bagenda nina Jahwe penguasa malekat, ‘Semangat kel Aku ngelindungi Sion, tuhu-tuhu semangat kel Aku.+ Merawa pagi Aku janah semangat Aku ngelindungisa.’”
3 “Bagenda nina Jahwe, ‘Mulih pagi Aku ku Sion,+ tading pagi Aku i Jerusalem.+ Jerusalem igelari pagi kota kebenaren,*+ gunung Jahwe penguasa malekat igelari pagi gunung si badia.’”+
4 “Bagenda nina Jahwe penguasa malekat, ‘Kalak si enggo metua kundul pagi bas lapangen kota Jerusalem bagi si mbarenda, tiap kalak pagi njemak tongkat perban gedang umurna.+
5 Enterem pagi anak-anak si main-main bas lapangen kota e.’”+
6 “Bagenda nina Jahwe penguasa malekat, ‘Amin pe kalak si nggeluh paksa si e erpengakap maka si e la mungkin terjadi, tuhu kin si e la mungkin bas Aku?’ nina Jahwe penguasa malekat.”
7 “Nina Jahwe penguasa malekat, ‘Kuselamatken umatKu arah negri timur bage pe arah negri barat.*+
8 Kubaba pagi kalak e mulih, tading pagi kalak e i Jerusalem.+ Jadi umatKu pagi kalak e, Aku jadi Dibata+ si setia* ras adil man kalak e.’”
9 “Bagenda nina Jahwe penguasa malekat, ‘Kena arus perpang.+ Gundari enggo begi kena kata-kata arah nabi-nabi.+ Kata-kata e mbarenda pernah ikataken sanga pondasi rumah Jahwe penguasa malekat enggo dung iban, gelah rumah pertoton banci ibangun.
10 Sope si e, la lit manusia ntah pe binatang si ndatken upah.+ Perban lit musuh, la kalak banci reh ntah pe lawes alu aman. Kuban kerina kalak simusuhen.’
11 “‘Tapi gundari, perbahanenKu man kalak si nggeluh denga arah bangsa enda lanai bagi si mbarenda,’+ nina Jahwe penguasa malekat.
12 ‘Sebap isuan kalak e pagi benih si ngasilken kedamen, erbuah pagi batang anggur, ibereken doni pagi hasilna,+ ibereken langit pagi remangna. Kuban pagi kalak si nggeluh denga arah bangsa enda ndatken kerina e.+
13 O kalak Juda ras kalak Israel, amin gia ipake bangsa-bangsa si deban gelar kena sanga numpahi,+ Kuselamatken pagi kena, Kuban pagi kena jadi pasu-pasu man kalak si deban.+ Ula kena mbiar!+ Arus kena pang.’+
14 “Bagenda nina Jahwe penguasa malekat, ‘“Sanga merawa Aku iban nini bulang kena, Kutetapken bas ukurKu guna erban bencana janah la Aku menyesal,”+ nina Jahwe penguasa malekat.
15 “Emaka gundari Kutetapken bas ukurKu erban si mehuli man Jerusalem bage pe man kalak Juda.+ Ula kena mbiar!”’+
16 “‘Enda si arus lakoken kena: Katakenlah si tuhu sanga kena ngerana ras kalak si deban.+ Keputusen kena arus benar ras maba dame sanga kena ngakimi i gerbang kena.+
17 Ula ban kena rencana si jahat man kalak si deban bas pusuh kena.+ Ula kena ersumpah kerna kai si la tuhu,+ perban si e kerina segat ateKu,’+ nina Jahwe.”
18 Bagenda ka nina Jahwe penguasa malekat man bangku,
19 “Bagenda nina Jahwe penguasa malekat, ‘Puasa si ilakoken bas bulan peempatken,+ pelimaken,+ pepituken,+ ras pe-10-ken,+ jadi perayan si erban meriah ukur pagi, si erban kalak Juda ermeriah ukur ras senang.+ Emaka kelengilah kebenaren ras kedamen.’
20 “Bagenda nina Jahwe penguasa malekat, ‘Bas wari si pepagi, pasti reh bangsa-bangsa ras penduduk arah melala kota.
21 Penduduk sada kota lawes pagi njumpai penduduk kota si debanna, nina, “Ota situtusi mindo perkuah ate Jahwe, sidarami Jahwe penguasa malekat. Aku pe ikut lawes.”+
22 Enterem kalak bage pe bangsa si megegeh reh pagi ku Jerusalem guna ndarami Jahwe penguasa malekat+ bage pe mindo perkuah ate Jahwe.’
23 “Bagenda nina Jahwe penguasa malekat, ‘Bas masa e, sepuluh dilaki arah kerina bangsa ras bahasa+ pasti nteguh pagi tagangina jubah* sekalak Jahudi. Nina kalak e, “Ikut ate kami ras kena,+ sebap begi kami Dibata kap ras kena.”’”+
Cataten i teruh
^ Ntah “kesetian.”
^ Ntah “arah negri matawari terbit ras negri matawari terbenam.”
^ Ntah “benar.”
^ Ntah “ujung baju.”
