Titus 1:1-16
1 Surat arah Paulus nari, budak Dibata bage pe rasul Jesus Kristus si kinitekenna sesuai ras kalak si pilih Dibata bage pe ras pemeteh si tepat kerna kebenaren si sesuai ras kesetian man Dibata.
2 Enda sesuai ras arapen kegeluhen si rasa lalap+ si mbarenda nari enggo ijanjiken Dibata si la banci erbual.+
3 Bas waktu si enggo tetapkenNa, banNa kataNa iteh arah dahin erberita. Aku ipilih guna mberitakenca+ sesuai ras perentah Dibata Si Nelamatken kita.
4 Surat enda man Titus, teman sada kiniteken si enggo kuanggap bagi anakku:
Mbera-mbera datndu kiniulin si luar biasa ras kedamen arah Bapakta eme Dibata, bage pe arah Kristus Jesus, Juru Selamatta.
5 Kutadingken kam i Pulau Kreta gelah pesikapndu kai si perlu ipesikap, janah lantikndu pertua-pertua bas tiap kota menurut petunjuk enda:
6 Sekalak dilaki bebas min ia arah tuduhen, sada ngenca diberuna, anakna pe erkiniteken janah la icap kalak si gutul ntah pe si nggit ngelawani.+
7 Sekalak pengawas* si ipilih Dibata arus bebas arah tuduhen, la perate-ate,+ la nukah merawa,+ la pemabuk, la kasar, la rangap ndatken untung si la jujur,
8 nggit ngalo-ngalo kalak si deban,+ ngena tena si mehuli, beluh rukur,+ nggit ngelakoken kai si benar, setia,+ banci nguasai diri.+
9 Sanga ia ngajar,* nteguh tagangina kata si setia,*+ alu bage banci pegegehina kalak si deban alu ajaren si benar+ janah banci persingetina+ kalak si ngelawan ajaren e.
10 Sebap enterem kalak si nggit ngelawan, nggit ncakapken si la erguna, nggit nipu, janah teremen arah kalak e nari ngataken maka sunat e perlu.+
11 Kalak si bage ula pediat ngerana sebap ajarkenna kai si la patut janah banna kerina keluarga lanai erkiniteken guna ndatken untung si la jujur.
12 Salah sada arah kalak e nari eme nabina, ngataken, “Kalak Kreta e perbual, kalak e bagi binatang buas, man medem saja ngenca dahinna.”
13 Kesaksin e benar. Emaka teruslah persingeti kalak e gelah paguh kinitekenna,
14 gelah lanai begikenna dongeng* kalak Jahudi ntah pe perentah kalak si lanai sesuai ras kebenaren.
15 Kerina bersih man kalak si bersih,+ tapi man kalak si najis ras si la erkiniteken, la lit si bersih, perban perukuren ras pusuh peratenna enggo najis.+
16 I lebe-lebe jelma si enterem ngaku ia nandai Dibata, tapi arah perbahanenna teridah maka tulakna Dibata,+ perban perbahanenna e erban ciga ate, la patuh, janah la cocok lakokenna kai pe si mehuli.
Cataten i teruh
^ Ntah “si ngepkep.”
^ Ntah “Bas carana ngajar.”
^ Ntah “kata si banci iteki.”
^ Ntah “turi-turin.”
