Ulangen 1:1-46
1 Enda kata-kata si peseh Musa man kerina kalak Israel i daerah Lau Jordan i taneh mesawang,* i gurun pasir si lit i lebe-lebe Sup, antara Paran, Topel, Laban, Haserot, ras Disahab.
2 Lit 11 wari dekahna perdalanen arah Horep* ku Kades-Barnea,+ ngelewati dalan ku Gunung Seir.
3 Bas wari si pertama bas bulan si pe-11-ken bas tahun pe-40-ken,+ peseh Musa kerina si perentahken Jahwe guna ipeseh man kalak Israel,
4 kenca talukenna Sihon+ raja kalak Amori si tading i Hesbon ras Og+ raja Basan si tading i Astera si lit i Edrei.+
5 Bas daerah Lau Jordan i negri Moap, jelasken Musa Undang-Undang Dibata,+ nina,
6 “Sanga bas Horep,* nina Jahwe Dibatata man banta, ‘Enggo ndekah kena tading i daerah pegunungen enda.+
7 Ersikaplah kena, laweslah ku daerah pegunungen kalak Amori+ bage pe ku kerina daerah si lit i sekelilingna, ku Araba,+ ku daerah pegunungen, ku Sepela, ku Negep,* ras ku daerah pantai,+ eme daerah kalak Kanaan. Laweslah kena ku Libanon*+ ras ku lau si galang eme Lau Eprat.+
8 Enggo Kubereken negri e man kena. Laweslah, rebutlah negri si enggo bereken Jahwe alu sumpah man nini bulang kena Abraham, Isak,+ ras Jakup+ guna ibereken man kalak e bage pe man keturunenna.’+
9 “Paksa si e kukataken man kena, ‘La aku ngasup sisada minpin kena.+
10 Jahwe Dibata kena enggo erban kena seh kel teremna, gundari kena bagi bintang i langit buena.+
11 Mbera-mbera Jahwe Dibata nini bulang kena erban kena reh teremna+ seh seribu kali lipat teremen asa jumlah kena si gundari. Mbera-mbera pasu-pasuNa kena bagi si janjikenNa.+
12 Tapi ngasup kin aku sisada maba baban kena bage pe ndungi masalah ras perubaten kena?+
13 Pilihlah dilaki-dilaki si pentar, beluh, ras erpengalamen arah tiap suku kena, gelah kulantik ia jadi peminpin kena.’+
14 Jenari kataken kena maka mejile petunjuk si kubereken e.
15 Emaka kulantik peminpin-peminpin arah suku kena, eme dilaki-dilaki si pentar, si beluh ras erpengalamen guna jadi peminpin man seribu kalak, peminpin man seratus kalak, peminpin man lima puluh kalak, bage pe peminpin man sepuluh kalak, janah jadi pengawas suku-suku kena.+
16 “Paksa si e kubereken perentah enda man hakim-hakim kena, ‘Sanga lit kalak si ermasalah ndahi kena, arus dungi kena masalahna e alu adil,+ la soal si ermasalah e antara kalak Israel ras kalak Israel ntah pe antara kalak Israel ras kalak asing si tading ras kena.+
17 Sanga kena ngadili, ula kena erpilihen.+ Arus begiken kena masalah kalak mesera bage pe masalah kalak bayak.+ Ula kena mbiar man ise pe,+ perban kena ngakimi guna Dibata.+ Adi mberatsa akap kena masalahna e, bereken man bangku, aku kari si ndungisa.’+
18 Paksa si e kukataken kerina si arus lakoken kena.
19 “Kenca si e bagi si perentahken Jahwe Dibatata, berkat kita arah Horep* nari janah lawes ku daerah pegunungen kalak Amori.+ Enggo sidalani taneh mesawang* si mbelang si erban mbiar.+ Kenca si e dungna seh kita i Kades-Barnea.+
20 Jenari ningku man kena, ‘Enggo seh kita bas daerah pegunungen kalak Amori, daerah si bereken Jahwe Dibatata man banta.
21 Jahwe Dibata kena enggo mereken negri e man kena. Laweslah, rebutlah negri e bagi si kataken Jahwe Dibata nini bulang kena man kena.+ Ula kena mbiar ntah pe gentar.’
22 “Tapi kerina kena reh ndahi aku, ning kena, ‘Uga adi sisuruh piga-piga kalak jadi mata-mata ku negri e gelah katakenna man banta dalan si apai pagi si man dalanenta ras gelah siteh uga keadan kota-kota si lit i jah.’+
23 Menurutku mejile si kataken kena e, emaka kupilih 12 dilaki, sada arah tiap suku.+
24 Lawes kalak e ku daerah pegunungen+ janah seh i Lembah* Eskol, kenca si e mata-matai kalak e negri e.
25 Baba kalak e deba buah arah negri e, nina, ‘Mejile kap negri si bereken Jahwe Dibatata e man banta.’+
26 Tapi la kena nggit lawes ku jah, lawan kena perentah Jahwe Dibata kena.+
27 Lalap kena jungut-jungut i kemah kena, ning kena, ‘Segat ate Jahwe kita emaka babaNa kita ndarat arah Mesir nari gelah serahkenNa kita ku tan kalak Amori, gelah bunuh kalak e kita.
28 Ku ingan si uga kin kita lawes e? Enggo mbiar kita ban senina-seninata.+ Nina, “Penduduk si lit i je galangen ras gedangen asangken kita. Kota-kotana galang, meganjang ka kel benteng-bentengna seh ku langit.+ Lit ka i je kalak Enak.”’+
29 “Emaka ningku man kena, ‘Ula mbiar ntah pe gentar man kalak e.+
30 Jahwe Dibata kena lit i lebe-lebe kena. Ia kari si erperang guna kena,+ bagi si idah kena ilakokenNa i Mesir.+
31 Bas taneh mesawang,* enggo idah kena uga Jahwe Dibata kena enggo njaga kena bagi sekalak bapak njaga anakna. Enggo jagaNa kena ku japa pe kena lawes seh ku ingan enda.’
32 Aminna pe bage la kena erkiniteken man Jahwe Dibata kena,+
33 si erdalan i lebe-lebe kena guna ndarami ingan erkemah man kena. BanNa tiang api sanga berngi ras tiang embun sanga ciger guna ncidahken dalan si arus idalani kena.+
34 “Sanga si e begi Jahwe kata-kata kena, merawa kel Ia, jenari ersumpah Ia,+
35 ‘La lit sekalak pe arah kalak si jahat enda banci ngidah negri si mejile si Kujanjiken alu sumpah guna ibereken man nini bulang kalak e,+
36 selain Kalep anak Jepune. Idahna pagi negri e janah Kubereken negri e man bana bage pe man keturunenna perban ikutkenna Jahwe alu bulat ukur.+
37 (Gara-gara kena Jahwe pe merawa man bangku, nina, “Kam pe la banci masuk ku negri e.+
38 Pelayanndu+ Josua anak Nun, masuk pagi ku negri e.+ Pegegehi ia,*+ perban ia pagi si minpin kalak Israel ngerebut negri e.”)
39 Kerna anak-anak kena si kataken kena pagi jadi tabanen,+ anak-anak si gundari si la itehna kai si mehuli ras si jahat, kalak e pagi si masuk ku negri e. Kubereken pagi negri e man kalak e.+
40 Tapi kena, arus kena mulihken ku taneh mesawang* arah dalan ku Laut Merah.’+
41 “Emaka ning kena man bangku, ‘Enggo erdosa kami man Jahwe. Gundari lawes kami erperang bagi si perentahken Jahwe Dibata kami!’ Emaka baba kena senjata perang kena masing-masing janah akap kena menukah lawes ku gunung e.+
42 Tapi nina Jahwe man bangku, ‘Kataken man kalak e, “Ula kena lawes erperang perban Aku labo ras kena.+ Adi tetap denga kena lawes, pasti kena taluken musuh.”’
43 Emaka kukataken man kena, tapi la begiken kena. Lawan kena Jahwe, tetap kena nangkih ku gunung e perban meganjang ukur kena.
44 Kenca si e ndarat kalak Amori si tading bas gunung e guna nyerang kena bagi wani.* Ayak-ayakna kena janah banna kena merap i Seir seh ngasa Horma.
45 Emaka mulih kena, tangis kena i lebe-lebe Jahwe tapi la begiken Jahwe janah la perdiatekenNa kena.
46 E me sebapna maka ndekah kel kena tading bas Kades-Barnea.
Cataten i teruh
^ Taneh si mbelang si jarang iingani.
^ Ntah “Gunung Sinai.”
^ Ntah “Gunung Sinai.”
^ Ntah “Selatan.”
^ Mungkin Pegunungen Libanon.
^ Taneh si mbelang si jarang iingani.
^ Ntah “Gunung Sinai.”
^ Taneh si mbelang si jarang iingani.
^ Ntah banci saja “Dibata si erban ia megegeh.”
^ Taneh si mbelang si jarang iingani.
^ Ntah “lebah.”
