Ulangen 10:1-22
10 “Kenca si e nina Jahwe man Musa, ‘Banlah dua lembar batu si mbaru bagi si pertama sange,+ nangkihlah kam ku datas gunung ndahi Aku. Ban ka sada peti arah kayu nari.
2 Kutulis pagi mulihi kata-kata si pernah Kutulis bas batu si pertama si enggo hancurkenndu. Tamakenlah batu e ku bas peti.’
3 Emaka kuban sada peti arah kayu akasia* nari ras dua lembar batu bagi sebelumna, jenari nangkih aku ku gunung e janah kubaba dua lembar batu ndai bas tanku.+
4 Kenca si e, tulisNa mulihi bas batu e bagi si tulisNa sebelumna,+ eme Sepuluh Perentah+ si kataken Jahwe man kena arah api nari+ sanga kena pulung i teruh gunung,+ jenari bereken Jahwe man bangku.
5 Dung e nusur aku arah gunung nari,+ kutamaken batu e ku bas peti si kuban ndai. I je pagi lalap inganna, bagi si perentahken Jahwe man bangku.
6 “Kenca si e berkat kalak Israel arah Bene-Jaakan ku Mosera. Bas ingan e Harun mate janah i je ia ikuburken.+ Anakna Eleasar si nggantiken ia ngelayani jadi imam.+
7 Arah je nari berkat kalak e ku Gudgot janah arah Gudgot ku Jotbata,+ bas ingan e mbue lau maler.*
8 “Paksa si e pisahken Jahwe suku Lewi+ guna maba Peti Perjanjin* Jahwe,+ guna ngelayani i lebe-lebe Jahwe, bage pe guna masu-masu bangsa enda alu gelarNa,+ bagi si lakoken kalak e seh wari enda.
9 Enda me sebapna maka kalak Lewi la dat bagin ntah pe warisen bagi si idat senina-seninana. Jahwe si mereken keperlun* kalak e, bagi si kataken Jahwe Dibata kena man kalak e.+
10 Tading aku i gunung 40 wari 40 berngi bagi si enggo pernah kulakoken.+ Paksa si e, nggit denga Jahwe megiken aku sekali nari+ janah la surung kernepken Jahwe kena.
11 Kenca si e nina Jahwe man bangku, ‘Pinpinlah bangsa enda janah ersikaplah kena guna berkat, gelah banci kalak e masuk ras ngerebut negri si nandangi Kubereken man kalak e, bagi janjiKu man nini bulangna.’+
12 “Gundari o Israel, kai kin si pindo Jahwe Dibata kena arah kena nari?+ Enda ngenca: mbiarlah kena man Jahwe Dibata kena,+ erdalanlah bas dalan-dalanNa,+ kelengilah Ia, layanilah Jahwe alu bulat ukur ras asa gegeh kena.+
13 Patuhilah perentah-perentah ras peraturen-peraturen Jahwe si kupeseh man kena wari enda guna kiniulin kena.+
14 Jahwe Dibata kena kap si mpuna langit ras langit si meganjangna, bage pe doni ras kerina isina.+
15 Ras nini bulang kena ngenca Jahwe ndeher janah buktikenNa kekelengenNa man kalak e. Enggo pilihNa kena eme keturunen nini bulang kena+ i antara kerina bangsa, bagi si gundari.
16 Emaka bersihkenlah pusuh kena,+ ula nai kena mekeng.+
17 Jahwe Dibata kena eme Dibata arah kerina dibata+ ras Tuhan arah kerina tuhan, Dibata si mulia, si megegeh, ras luar biasa, si adil perbahanenNa man kerina jelma+ janah la alokenNa sogok.
18 Adil perbahanenNa man anak si la erbapa* bage pe janda.+ Keleng ateNa penduduk asing+ janah bereNa pangan ras baju kalak e.
19 Kena pe arus keleng ate kena man penduduk asing, sebap kena pe mbarenda penduduk asing nge bas negri Mesir.+
20 “Arus kena mbiar man Jahwe Dibata kena, arus layani kena Ia,+ setialah kena man baNa ras ersumpahlah kena bas gelarNa.
21 Ia kap si arus puji kena,+ sebap Ia kap Dibata kena. Ia kap Dibata kena si ngelakoken kerina perbahanen si luar biasa ras hebat si enggo idah kena.+
22 Mbarenda 70 kalak ngenca nini bulang kena sanga lawes ku Mesir,+ tapi gundari Jahwe Dibata kena enggo erban kena seh kel teremna bagi bintang i langit buena.+
Cataten i teruh
^ Jenis batang kayu enda turah bas gurun pasir ntah pe taneh mesawang.
^ Ntah “Peti Perpadanen.”
^ As. “si jadi warisen.”
^ Ntah “anak melumang.”
