Ulangen 11:1-32
11 “Arus keleng ate kena Jahwe Dibata kena,+ arus terus lakoken kena tanggung jawap kena, patuhi peraturen-peraturenNa, undang-undangNa, bage pe perentah-perentahNa.
2 Bas wari enda, teh kena maka man kena kap aku ngerana, labo man anak-anak kena si lenga nandai ntah pe lenga meteh kerna disiplin Jahwe Dibata kena,+ kemulianNa,+ tanNa si megegeh,+ ras kuasaNa.
3 La idah kalak e mukjizat ras perbahanenNa man raja Mesir bage pe man kerina negrina.+
4 La idah kalak e kai si lakoken Dibata man pasuken Mesir, kuda-kuda raja Mesir ras gereta-gereta perangna si gedap bas Laut Merah sanga ayaki kalak Mesir kena. Paksa si e, kernepken Jahwe kalak e seh rasa lalap.+
5 La idah kalak e kai si lakoken Dibata man kena sanga bas taneh mesawang* ngasa seh kena bas ingan enda.
6 La ka idah kalak e kai si lakoken Dibata man Datan ras Abiram eme anak-anak Eliap arah suku Ruben sanga terbelah taneh janah bendut taneh kalak e radu ras keluargana, kemah-kemahna, bage pe kerina si nggeluh si ngikutken kalak e, i lebe-lebe kerina kalak Israel.+
7 Tapi kena, enggo idah kena kerina perbahanen Jahwe si luar biasa e.
8 “Arus patuhi kena kerina perentah si kupeseh bas wari enda, gelah kena reh gegehna janah banci kena masuk ras ngerebut negri e.
9 Selain si e, gelah gedang umur kena+ bas negri si janjiken Jahwe Dibata kena alu sumpah man nini bulang kena bage pe man keturunenna,+ eme negri si melala kel i je susu ras madu.+
10 “Negri si nandangi rebut kena e la seri ras Mesir. I Mesir biasana kena nuan benih jenari arus palerken kena lau ku juma e,* bagi kebun gule-gulen.
11 Tapi negri si nandangi masuki kena ras rebut kena e eme kap negri si lit i je pegunungen ras lembah-lembah,+ melala lau perban rusur udan.+
12 Jahwe Dibata kena kap si ngurus negri e. Jahwe Dibata kena terus mperdiateken negri e gedang-gedang tahun.
13 “Adi tuhu-tuhu patuhi kena perentah si kubereken wari enda, janah kelengi kena Jahwe Dibata kena ras layani kena Ia alu bulat ukur ras asa gegeh kena,+
14 berekenNa ka pagi udan bas waktuna ku negri kena bas musim gugur bage pe bas musim bunga. Pepulung kena ka pagi biji-bijin,* anggur si mbaru, ras minak saitun kena.+
15 PeturahNa ka dukut bas taneh man pangan asuh-asuhen kena, janah kena pe man seh asa besur.+
16 Tapi hati-hatilah kena gelah ula kena tergoda nadingken Dibata jenari sujud kena nembah dibata-dibata si deban.+
17 Adi bage ban kena, pasti merawa kel Jahwe man kena janah tutupNa langit, alu bage lanai nusur udan,+ janah taneh pe la mereken hasilna. Selain si e, mis pagi kena ikernepken arah negri si mejile si bereken Jahwe man kena.+
18 “Tamakenlah kata-kata si kupeseh enda ku pusuh ras perukuren kena. Iketken kerina e bas tan kena guna jadi penginget man kena janah arus ka iketken kena i perdempaken* kena.+
19 Ajarken kerina e man anak-anak kena janah cakapken sanga kena kundul i rumah, sanga bas perdalanen, sanga nandangi medem, ras sanga kena medak.+
20 Tulisken kerina e i kusen pintu rumah kena ras i gerbang kena.
21 Alu bage, banci ndekah kena nggeluh ras keturunen kena+ bas negri si janjiken Jahwe alu sumpah man nini bulang kena.+ Tading pagi kena i je sedekah lit denga langit i datas doni.
22 “Adi tutus ate kena matuhi ras ndalanken kerina perentah si kupeseh enda, janah keleng ate kena Jahwe Dibata kena,+ ikutken kena dalan-dalanNa, ras setia kena man baNa,+
23 pelawes Jahwe bangsa-bangsa e arah lebe-lebe kena,+ rebut kena pagi daerah bangsa-bangsa si gegehen ras buen pendudukna asangken kena.+
24 Tiap ingan si iperjak kena jadi jang kena pagi.+ Taneh mesawang* nari seh ku Libanon, Lau Eprat nari seh ku laut sebelah barat.* E pagi si jadi perbatasen daerah kena.+
25 Ise pe labo pagi ngasup naluken kena.+ Mbiar ras gentar pagi kerina kalak si lit bas negri e man kena. Jahwe Dibata kena pagi si erban si e kerina terjadi,+ bagi si enggo janjikenNa man kena.
26 “Gundari kubereken pilihen man kena, ipasu-pasu ntah isumpahi.+
27 Ipasu-pasu pagi kena adi patuhi kena perentah Jahwe Dibata kena si kupeseh wari enda,+
28 isumpahi pagi kena adi la patuhi kena perentah Jahwe Dibata kena,+ adi nilah kena arah dalan si arus ikutken kena si kupeseh bas wari enda, janah adi ikutken kena dibata-dibata si la itandai kena.
29 “Sanga Jahwe Dibata kena mabai kena ku negri si jadi jang kena, pasu-pasulah Gunung Gerisim janah sumpahilah Gunung Ebal.+
30 Duana gunung e lit i sebelah barat Lau Jordan i daerah kalak Kanaan si tading i Araba, i lebe-lebe Gilgal, i deher batang-batang kayu si galang i More.+
31 Sebrangi kena pagi Lau Jordan guna masuk janah ngerebut negri si bereken Jahwe Dibata kena man kena.+ Sanga enggo rebut kena negri e janah tading kena i je,
32 arus patuhi kena kerina peraturen-peraturen ras undang-undang si kupeseh man kena wari enda.+
Cataten i teruh
^ Taneh si mbelang si jarang iingani.
^ Maksudna, alu nggunaken nahe sanga erban parik ntah pe kincir lau.
^ As. “i antara mata.”
^ Taneh si mbelang si jarang iingani.
^ Maksudna, Laut Besar ntah pe Laut Tengah.