Ulangen 12:1-32
12 “Enda peraturen-peraturen ras undang-undang si arus tuhu-tuhu patuhi kena sedekah kena tading bas negri si nandangi bereken Jahwe Dibata nini bulang kena man kena.
2 Bas negri si nandangi rebut kena, arus kernepken kena kerina ingan si ipake bangsa-bangsa guna nembah dibata-dibatana,+ la soal ingan e i datas gunung si meganjang, i datas bukit, ntah pe i teruh batang kayu si melala bulungna.
3 Runtuhken ingan-ingan nutung* persembahenna, perperken tugu-tuguna si badia,+ tutung tiang-tiangna si badia,* hancurken patung ukiren dibata-dibatana,+ gelah lanai lit gelar dibata-dibatana bas ingan e.+
4 “Ula sembah kena Jahwe Dibata kena bagi cara kalak e nembah dibatana.+
5 Tapi laweslah kena ku ingan si pilih Jahwe Dibata kena guna inganNa tading bage pe guna gelarNa i antara kerina suku kena, janah sembahlah Ia bas ingan e.+
6 Arus baba kena ku je persembahen tutungen kena,+ korban-korban kena, persepuluhen kena, sumbangen kena,+ persembahen+ guna nepati janji, persembahen sukarela,+ ras anak si pertama arah asuh-asuhen kena.+
7 Kena ras keluarga kena arus man i je, i lebe-lebe Jahwe Dibata kena,+ janah ermeriah ukurlah kena perban kerina si lakoken kena+ sebap kena enggo ipasu-pasu Jahwe Dibata kena.
8 “Ula silakoken bagi si gundari, eme ngelakoken kai si bagi ukurta,*
9 perban kena lenga seh bas ingan+ si nandangi bereken Jahwe Dibata kena jadi jang kena.
10 Sanga sebrangi kena pagi Lau Jordan+ janah tading kena i negri si nandangi bereken Jahwe Dibata kena man kena, pasti banNa kena lanai iganggu musuh-musuh kena si tading i sekeliling kena janah aman pagi kena tading i je.+
11 Baba kerina si kuperentahken man kena ku ingan si pilih Jahwe Dibata kena guna gelarNa,+ eme persembahen tutungen kena, korban-korban kena, persepuluhen kena,+ sumbangen kena, ras persembahen guna nepati janji si enggo ban kena man Jahwe.
12 Ermeriah ukurlah kena i lebe-lebe Jahwe Dibata+ kena radu ras anak-anak kena, budak-budak kena, bage pe kalak Lewi si lit bas kota-kota* kena, perban kalak Lewi la dat bagin ntah pe warisen bagi kena.+
13 Ula sempat persembahken kena persembahen tutungen bas ingan si pilih kena.+
14 Bas ingan si pilih Jahwe saja ngenca banci persembahken kena persembahen tutungen, eme bas salah sada daerah suku-suku kena. I je me arus lakoken kena kerina si enggo kuperentahken man kena.+
15 “Katawari pe kena merhat man daging, banci geleh kena binatang ras pan kena dagingna+ menurut pasu-pasu si bereken Jahwe man kena bas kerina kota* kena. Kalak najis ras si la najis banci man daging e bagi man daging kijang ntah pe rusa.
16 Tapi ula pan kena darehna,+ arus amburken kena darehna e ku taneh bagi ngamburken lau.+
17 La banci pan kena sepersepuluh arah persembahen-persembahen enda bas kota-kota* kena, eme arah persembahen biji-bijin* kena, anggur kena si mbaru, minak saitun kena, anak si pertama lahir arah lembu kena, arah kambing ras biri-biri kena,+ persembahen guna nepati janji, persembahen sukarela, ntah pe sumbangen si baba kena.
18 Tapi kerina e arus pan kena i lebe-lebe Jahwe bas ingan si pilih Jahwe Dibata kena+ radu ras anak-anak kena, budak kena si dilaki ras si diberu, ras kalak Lewi si lit bas kota-kota* kena. Ermeriah ukurlah i lebe-lebe Jahwe Dibata kena perban kai si enggo lakoken kena.
19 Arus perdiateken kena kalak Lewi+ sedekah kena nggeluh bas negri kena.
20 “Sanga Jahwe Dibata kena mpebelang daerah kena+ bagi si janjikenNa man kena,+ janah ning kena ‘man daging ateku,’ perban merhat kel kena manca, banci pan kena daging katawari pe ate kena.+
21 Adi ndauh ingan si pilih Jahwe Dibata kena e,+ banci geleh kena piga-piga asuh-asuhen si bereken Jahwe man kena, bagi si enggo kuperentahken man kena. Daging e arus pan kena bas kota-kota* kena, katawari pe ate kena pan kena.
22 Banci pan kena daging e bagi sanga kena man daging kijang ras rusa.+ Kalak si najis ntah pe si la najis banci manca.
23 Tapi ula pan kena darehna,+ sebap kegeluhen lit bas dareh e.+ Ula pan kena daging ras kegeluhenna.
24 Ula pan kena dareh. Arus amburken kena dareh e ku taneh bagi ngamburken lau.+
25 Ula pan kena dareh, gelah sikap kegeluhen kena ras anak-anak kena, perban enggo lakoken kena kai si benar menurut Jahwe.
26 Sanga lawes kena ku ingan si pilih Jahwe, si banci baba kena eme pemere-pemere si badia bage pe persembahen guna nepati janji.
27 I je, arus persembahken kena persembahen tutungen kena, termasuk dagingna ras darehna+ i datas ingan nutung persembahen Jahwe Dibata kena, janah dareh arah korban-korban si persembahken kena e arus amburken kena ku ingan nutung persembahen+ Jahwe Dibata kena, tapi dagingna banci pan kena.
28 “Patuhilah kerina si enggo kuperentahken man kena, gelah sikap kegeluhen kena bage pe keturunen kena, perban enggo lakoken kena kai si mehuli ras si benar menurut Jahwe Dibata kena.
29 “Jahwe Dibata kena pasti engkernepken bangsa-bangsa si lit i negri si nandangi irebut kena+ janah i je pagi kena tading.
30 Sanga si e, arus kena hati-hati gelah ula sempat ikutken kena kebiasan kalak e, sebap e banci jadi siding man kena. Ula kena tersungkun-sungkun kerna dibata-dibata kalak e, ning kena, ‘Uga nge cara kalak e nembah dibatana? Kuikutken ateku cara kalak e.’+
31 Ula usih kena cara kalak e bas nembah Jahwe Dibata kena, sebap lakoken kalak e erbage perbahanen si ciga ate Jahwe sanga sembahna dibatana. Anak-anakna si dilaki ras si diberu pe tutungna alu api man dibata-dibatana.+
32 Tutuslah ate kena matuhi kerina si kuperentahken man kena.+ Ula tambahi kena ntah pe kurangi kena.+
Cataten i teruh
^ Ntah “kai si siakap benar.”
^ As. “gerbang-gerbang.”
^ As. “gerbang.”
^ As. “gerbang-gerbang.”
^ As. “gerbang-gerbang.”
^ As. “gerbang-gerbang.”
