Ulangen 13:1-18
-
Perbahanen man kalak si murtad (1-18)
13 “Banci saja lit sekalak nabi ntah pe kalak si ndatken ramalen arah nipi i tengah-tengah kena janah pesehna ramalen ntah pe tanda man kena.
2 Adi terjadi ramalen ntah tanda e janah nina, ‘Eta siikutken ras sisembah dibata-dibata si deban,’ si lenga sitandai,
3 ula begiken kena kai nina nabi e ntah pe kalak si ndatken ramalen arah nipi e.+ Perban Jahwe Dibata kena sangana nguji kena+ guna meteh keleng ntah lang ate kena Jahwe Dibata kena alu bulat ukur ras asa gegeh kena.+
4 Jahwe Dibata kena si arus ikutken kena, mbiarlah kena man baNa. Arus begiken kena kataNa janah patuhi kena perentah-perentahNa. Ia ngenca si arus layani kena janah arus kena tetap setia man baNa.+
5 Tapi nabi ntah pe kalak si dat ramalen arah nipi e arus ibunuh,+ perban enggo babaina kena mberontak ngelawan Jahwe Dibata kena, si enggo maba kena ndarat arah Mesir nari ras enggo nebus kena arah ingan kena iperbudak. Banna atena kena nilah arah dalan si perentahken Jahwe Dibata kena man kena. Arus ambekken kena kai si jahat arah tengah-tengah kena nari.+
6 “Adi senina kena eme anak mamak kena, ntah anak kena, ntah ndehara kena si keleng ate kena, ntah pe teman kompak kena ngajak kena alu erbuni-buni, janah nina, ‘Eta sisembah dibata si deban,’+ dibata si la tandai kena ras nini bulang kena,
7 dibata bangsa-bangsa si lit i sekeliling kena, la soal arah ingan si ndeher ntah pe si ndauh, ntah arah ujung ku ujung negri enda,
8 ula ikutken kena ia ntah pe begiken kena ia.+ Ula mekuah ate kena ia janah ula lindungi kena ia.
9 Tapi arus bunuh kena ia.+ Kena si pertama mbenteri ia alu batu seh asa ia mate, jenari kerina kalak si deban ikut mbenterisa.+
10 Arus benteri kena ia seh asa mate,+ sebap usahakenna mpedauh kena arah Jahwe Dibata kena, si enggo maba kena ndarat arah negri Mesir nari, ingan kena iperbudak.
11 Kenca si e, begi kerina kalak Israel kerna si e janah mbiar kalak e. Alu bage, lanai lakoken kalak e kejahaten si bage.+
12 “Adi enggo tading kena bas kota-kota si bereken Jahwe Dibata kena, mungkin begi kena berita si ngataken,
13 ‘Lit piga-piga kalak si la terpake arah tengah-tengah kena enggo mabai penduduk kotana nembah dibata-dibata si deban si la tandai kena.’
14 Adi begi kena berita si bage, arus pastiken kena masalahna janah selidikilah alu tutus ras sungkuni.+ Adi tuhu kin kai si erban ciga ate e enggo ilakoken,
15 arus bunuh kena penduduk kota e alu pedang.+ Kernepken kota e ras kerina si lit bas kota e alu pedang, termasuk asuh-asuhenna.+
16 Kenca si e arus pepulung kena kerina barang jarahen i lapangen kota e jenari tutung kota e. Kerina hasil jarahen e jadi seri ras persembahen tutungen man Jahwe Dibata kena. Jadi puing-puing pagi kota e seh rasa lalap. Ndigan pe lanai ibangun mulihi.
17 Ula buat kai pe arah barang si ipisahken guna ikernepken,+ gelah ula nai Jahwe merawa. Alu bage mekuah ateNa kena janah banNa kena jadi enterem bagi si janjikenNa man nini bulang kena.+
18 Patuhlah man Jahwe Dibata kena alu ndalanken kerina perentahNa si kupeseh wari enda. Alu bage lakoken kena kai si benar menurut Jahwe Dibata kena.+
