Ulangen 14:1-29
14 “Kena kap anak-anak Jahwe Dibata kena. Ula sayati daging kena+ janah ula cukur alis kena* guna kalak mate.+
2 Sebap kena kap bangsa si badia+ man Jahwe Dibata kena. Kena jadi umatNa si istimewa,* si pilih Jahwe arah kerina bangsa si lit i doni.+
3 “Ula pan kena kai pe si erban ciga ate.+
4 Enda binatang-binatang si banci pan kena:+ lembu, biri-biri, kambing,
5 rusa, kijang, antelop, kambing kerangen, biri-biri kerangen, kijang gunung, ras jenis rusa si deban.
6 Kerina binatang si erbelah silu-siluna janah memamah biak* banci pan kena.
7 Tapi binatang si memamah biak ngenca ntah pe si silu-siluna ngenca erbelah ula pan kena, contohna unta, kelinci, ras menci gunung, perban kerina binatang e ndai memamah biak tapi silu-siluna la erbelah. Kerina e pantang man kena.+
8 Babi pe pantang pan kena, perban amin pe silu-siluna erbelah tapi la memamah biak. Kerina binatang e ndai la banci pan kena janah ula kuit kena bangkena.
9 “Arah kerina binatang si nggeluh bas lau, si ersisik ras ersirip ngenca si banci pan kena.+
10 Tapi si la ersisik ras la ersirip ula pan kena. Kerina e pantang man kena.
11 “Kerina perik si la ipantangken banci pan kena.
12 Tapi perik-perik enda la banci pan kena: kuliki, kuliki laut, kuliki mbiring si man bangke,+
13 kuliki si megara, kuliki si mbiring, ras kerina jenis kuliki,
14 kerina jenis burung gagak,
15 burung unta, burung hantu, perik laut,* kerina jenis kuliki falkon,
16 burung hantu si kitik, burung hantu si gedang cuping, angsa,
17 burung pelikan, burung bangke, perik lau,*
18 bangau, kerina jenis perik kuntul, perik hupo, ras kelelawar.*
19 Kerina serangga si erkabeng arus ipantangken kena janah la banci pan kena.
20 Kerina binatang si kabang si la ipantangken banci pan kena.
21 “Adi dat kena binatang si enggo mate, ula pan kena.+ Banci bereken kena binatang e man kalak asing si tading bas kota-kota* kena, sebap kalak e banci manca, ntah pe dayaken e man kalak asing. Sebap kena kalak si badia man Jahwe Dibata kena.
“Ula belgang kena anak kambing bas susu indungna.+
22 “Tiap tahun arus bereken kena sepersepuluh arah kerina hasil juma kena.+
23 Arus pan kena sepersepuluh arah biji-bijin* kena, anggur kena si mbaru, minak saitun kena, anak si pertama lahir arah lembu kena, arah kambing kena, ras arah biri-biri kena. Panlah si e ndai kerina i lebe-lebe Jahwe Dibata kena eme bas ingan si pilihNa guna gelarNa.+ Alu bage banci kena erlajar gelah terus mbiar man Jahwe Dibata kena.+
24 “Adi ingan si ipilih Jahwe Dibata kena guna gelarNa+ e ndauhsa arah ingan kena tading, janah la banci baba kena sepersepuluhen kena e perban enggo mbelin kel pasu-pasu Jahwe man kena,
25 banci dayaken kena sepersepuluhen kena e jenari baba kena senna ku ingan si pilih Jahwe Dibata kena.
26 Banci tukur kena kai pe kena merhat, bagi lembu, biri-biri, kambing, anggur, inemen si lit alkoholna, ras kai pe ate kena. Pan kenalah i je, i lebe-lebe Jahwe Dibata kena janah ermeriah ukurlah ras keluarga kena.+
27 Arus perdiateken kena kalak Lewi si tading bas kota-kota kena,+ sebap kalak e la dat bagin ntah pe warisen bagi kena.+
28 “Bas tiap akhir tahun peteluken, arus baba kena kerina sepersepuluhen arah hasil juma kena bas tahun e, janah arus simpan kena bas kota-kota kena.+
29 Kenca si e, kalak Lewi si la dat bagin ntah la dat warisen si bagi kena, bage pe kalak asing, anak si la erbapa,* ras janda si tading bas kota-kota kena, reh pagi kalak e janah man seh asa besur.+ Alu bage Jahwe Dibata kena masu-masu kena bas kerina si lakoken kena.+
Cataten i teruh
^ Ntah “ula cukur bagin takal kena si arah lebe.”
^ Ntah “umatNa si keleng ateNa.”
^ Binatang si ingat-ngatina mulihi pangan si enggo ibendutna.
^ Bas bahasa Indonesia enda perik camar.
^ Nahe perik lau enda bagi nahe bebek, nyelam ia nangkap ikan.
^ Ntah “bengkik.”
^ As. “gerbang-gerbang.”
^ Ntah “anak melumang.”
