Ulangen 15:1-23
15 “Tiap akhir tahun pepituken, arus masapken kena utang kalak.+
2 Bagenda carana: Ise pe si mereken pinjamen man kalak si deban, arus masapkenna utang kalak si minjam e. La banci pindona utang seninana ntah pe utang kalak si sada bangsa ras ia. Sebap utang e arus imasapken guna mereken kehamaten man Jahwe.+
3 Utang kalak asing banci pindo kena+ tapi utang kalak si sada bangsa ras kena arus masapken kena.
4 Amin pe bage, labo pagi jadi mesera pergeluh kena perban pasu-pasu Jahwe kena+ bas negri si enggo bereken Jahwe Dibata kena man kena jadi warisen kena.
5 Tapi arus tuhu-tuhu patuhi kena kata-kata Jahwe Dibata kena janah dalanken kena kerina perentah si enggo kupeseh bas wari enda.+
6 Jahwe Dibata kena pasti masu-masu kena bagi si janjikenNa man kena. Bereken kena pagi pinjamen* man melala bangsa, tapi kena sendiri la minjam.+ Kuasai kena pagi melala bangsa tapi kena la banci kuasai kalak e.+
7 “Adi lit kalak si sada bangsa ras kena jadi mesera pergeluhna bas salah sada kota i negri si bereken Jahwe Dibata kena man kena, arus kena nggit nampati ia janah ula kena pelit man bana.+
8 Arus kena nggit mere man bana+ janah berelah ia minjam* asa si perlukenna.
9 Ula sempat ning kena bas pusuh kena, ‘Tahun pepituken eme tahun pembebasen enggo ndeher,’+ perban si e la kena nggit mere man kalak si sada bangsa ras kena si mesera pergeluhna e. Ula pediat perukuren si jahat si bage lit bas pusuh kena. Adi la kena nggit nampatisa, adukenna pagi man Jahwe, janah erdosa kena.+
10 Arus kena nggit mere man bana+ janah ula alu terpaksa. Alu bage kerina si lakoken kena ipasu-pasu Jahwe Dibata kena.+
11 Sebap lit nge pagi lalap kalak si mesera bas negri kena.+ E me sebapna kuperentahken man kena, ‘Arus kena nggit mere man kalak si sada bangsa ras kena si susah ras mesera pergeluhna bas negri kena.’+
12 “Adi lit kalak Heber la soal dilaki ntah pe diberu si idayaken man kena janah enggo layanina kena enem tahun dekahna, arus bebasken kena ia bas tahun pepituken.+
13 Adi bebasken kena ia, ula pediat ia lawes alu la maba kai pe.
14 Arus bereken kena man bana piga-piga asuh-asuhen, biji-bijin,* minak saitun, ras anggur. Enggo pasu-pasu Jahwe kena, emaka arus kena nggit mere man bana.
15 Ingetlah, mbarenda kena pe budak i negri Mesir janah Jahwe Dibata kena enggo nebus kena. E me sebapna maka bas wari enda kusuruh ban kena bage.
16 “Tapi adi katakenna maka tetap atena ras kena perban keleng atena kena ras keluarga kena janah meriah ukurna sanga tading ras kena,+
17 babalah ia ku pintu rumah kena janah tindiklah cupingna. Alu bage, jadi budak kena ia seh rasa lalap. Man budak kena si diberu pe arus bage ban kena.
18 Sanga bebasken kena ia janah lawes ia nadingken kena, ula akap kena rugi adi lawes ia, perban pendahinna sedekah enem tahun e seri ras dua kali lipat pendahin sekalak buruh upahen, janah Jahwe Dibata kena enggo masu-masu kerina si lakoken kena.
19 “Arus pebadia kena man Jahwe Dibata kena kerina anak lembu jantan kena, biri-biri jantan kena, bage pe kambing jantan kena si pertama lahir.+ Ula pake kena erdahin lembu kena si pertama lahir janah ula pangkas kena bulu biri-biri kena si pertama lahir.
20 Tiap tahun arus pan kena ras keluarga kena daging binatang e i lebe-lebe Jahwe Dibata kena bas ingan si pilih Jahwe.+
21 Tapi adi binatang e lit cacatna, ntah pincang, pentang, ntah cacat parah si debanna, ula persembahken kena man Jahwe Dibata kena.+
22 Tiap kalak arus man daging e bas kota-kota* kena, la soal ia kalak si najis ntah pe si la najis. Pan kenalah daging e bagi man daging kijang ntah daging rusa.+
23 Tapi darehna ula pan kena,+ darehna arus iamburken kena ku taneh bagi ngamburken lau.+
Cataten i teruh
^ Ntah “pinjamen alu jaminen.”
^ Ntah “minjam alu jaminen.”
^ As. “gerbang-gerbang.”
