Ulangen 16:1-22
16 “Peringetilah bulan Abip* janah rayakenlah Paskah man Jahwe Dibata kena.+ Sebap paksa berngi bas bulan Abip, Jahwe Dibata kena enggo maba kena ndarat arah Mesir nari.+
2 Arus buat kena kambing, biri-biri, ntah pe lembu kena jadi persembahen.+ Persembahkenlah korban Paskah man Jahwe Dibata kena+ bas ingan si pilih Jahwe guna gelarNa.+
3 Ula pan kena kai pe si lit ragina.+ Pitu wari dekahna arus pan kena roti si la itama ragi bagi sanga kena merudu-rudu ndarat arah Mesir,+ alu bage inget kena pagi kesusahen si enggo pernah nanami kena. Lakokenlah bage gelah segedang geluh kena inget kena wari sanga kena ndarat arah negri Mesir.+
4 Sedekah pitu wari e, la banci lit ragi bas daerah kena.+ Daging binatang si ikorbanken paksa berngi wari la banci isisaken seh ngasa paginna.+
5 La banci persembahken kena korban Paskah bas kota si apai pe si bereken Jahwe Dibata kena.
6 Tapi kerina e arus ipersembahken kena bas ingan si pilih Jahwe Dibata kena guna gelarNa. Korban Paskah e arus persembahken kena paksa berngi kenca terbenam matawari,+ bagi sanga kena ndarat arah Mesir nari.
7 Arus tanggerken kena korban e ras pan kena+ bas ingan si pilih Jahwe Dibata kena,+ janah sanga erpagi-pagi banci kena mulih ku kemah kena.
8 Enem wari dekahna kena man roti si la itama ragi, janah bas wari pepituken eme perpulungen si istimewa man Jahwe Dibata kena. Ula kena erdahin bas wari e.+
9 “Arus kira kena pitu minggu mulai wari pertama perani kena biji-bijin* i juma kena.+
10 Kenca si e rayakenlah Perayan Peranin man Jahwe Dibata kena+ alu maba persembahen sukarela menurut pasu-pasu si aloken kena arah Jahwe Dibata kena.+
11 Arus kena ermeriah ukur i lebe-lebe Jahwe Dibata kena bas ingan si pilih Jahwe Dibata kena guna gelarNa radu ras anak-anak kena, budak-budak kena, kalak Lewi si tading bas kota-kota* kena, kalak asing, anak si la erbapa,* ras janda si lit i tengah-tengah kena.+
12 Ingetlah maka kena pe mbarenda budak i Mesir.+ Patuhi peraturen-peraturen enda janah dalankenlah.
13 “Arus rayaken kena Perayan Sapo-Sapo+ pitu wari dekahna, eme sanga pepulung kena hasil arah ingan ngerik* bage pe arah ingan meras anggur ras minak kena.
14 Sanga perayan e, ermeriah ukurlah+ radu ras anak-anak kena, budak-budak kena, kalak Lewi, kalak asing, anak si la erbapa, ras janda si lit i kota-kota kena.
15 Rayakenlah e pitu wari dekahna+ man Jahwe Dibata kena bas ingan si pilih Jahwe, sebap Jahwe Dibata kena pasti masu-masu kerina hasil rani kena bage pe kerina si lakoken kena.+ Pasti kena ermeriah ukur.+
16 “Telu kali setahun, kerina dilaki arus reh ku lebe-lebe Jahwe Dibata kena bas ingan si pilihNa eme paksa Perayan Roti si La Itama Ragi,+ Perayan Peranin,+ ras Perayan Sapo-Sapo.+ Ise pe la banci reh ku lebe-lebe Jahwe adi la maba kai pe.
17 Kerina kalak e arus mereken persembahen menurut pasu-pasu si bereken Jahwe Dibata kena man kena.+
18 “Lantiklah hakim-hakim+ ras peminpin-peminpin man tiap suku si lit bas kerina kota* si bereken Jahwe Dibata kena. Kalak e arus jadi hakim si adil bas bangsa kena.
19 Sanga hakimi kena kalak si deban, adil min perbahanen kena,+ ula kena erpilihen.+ Ula aloken kena sogok, sebap sogok banci erban lanai diate kalak kai si benar+ janah erban kalak si benar ngubah kata-katana.
20 Tetaplah kena adil,+ gelah banci kena tetap nggeluh janah banci rebut kena negri si bereken Jahwe Dibata kena man kena.
21 “Ula suan kena batang kayu kai pe guna jadi tiang si badia*+ i deher ingan nutung* persembahen man Jahwe Dibata kena.
22 “Janah ula ban kena tugu si badia*+ si segat ate Jahwe Dibata kena.
