Ulangen 17:1-20
17 “Ula persembahken kena lembu ntah pe biri-biri si lit cacatna man Jahwe Dibata kena, sebap ciga ate Jahwe Dibata kena korban si bage.+
2 “Bas salah sada kota si bereken Jahwe Dibata kena, banci saja lit sekalak dilaki ntah pe diberu si lakokenna kai si jahat menurut Jahwe Dibata kena janah langgarna perjanjinna,+
3 nilah ia janah sujud ia nembah dibata-dibata si deban ntah pe nembah matawari, bulan, ntah kai pe si lit i langit,+ aminna pe kerina e enggo kularang.+
4 Adi lit si ngelaporken kerna si e ntah begi kena kerna si e, arus tuhu-tuhu selidiki kena. Adi tuhu kin+ perbahanen si erban ciga ate e enggo ilakoken bas Israel,
5 arus baba kena dilaki ntah pe diberu si ngelakoken kejahaten e ku gerbang kota. Kenca si e dilaki ntah pe diberu e arus ibenteri ngayak mate.+
6 Banci ia ihukum mate adi lit dua ntah telu kalak si jadi saksi.+ Adi sada ngenca saksina, ia la banci ihukum mate.+
7 Saksi-saksi e si leben mbenteri ia alu batu guna munuh ia, kenca si e maka kerina kalak arus ikut mbenteri ia. Arus masapken kena kai si jahat arah tengah-tengah kena nari.+
8 “Adi lit masalah si mesera kel ndungisa bas salah sada kota kena, la soal e masalah pembunuhen,+ masalah situntut-tuntuten, masalah kekerasen, ntah pe masalah si debanna, arus kena lawes ku ingan si pilih Jahwe Dibata kena.+
9 Jumpailah imam-imam Lewi ras hakim+ si ngelayani paksa si e janah pindolah petunjuk man kalak e. Kalak e pagi si erban keputusen kerna masalah e man kena.+
10 Kenca si e lakokenlah keputusen si bereken kalak e arah ingan si pilih Jahwe. Pastikenlah maka lakoken kena kerina petunjuk si bereken kalak e.
11 Arus lakoken kena bagi undang-undang si cidahken kalak e ras keputusen si iban kalak e.+ Ikutkenlah keputusen si bereken kalak e, ula kena nilah ku kanan ntah pe ku kiri.+
12 Adi lit kalak si meganjang rukur janah la begikenna hakim bage pe imam si ngelayani Jahwe Dibata kena, ia arus ihukum mate.+ Arus masapken kena kai si jahat arah Israel.+
13 Dung e begi bangsa e pagi kerna si e janah mbiar kalak e. Alu bage lanai kalak e meganjang rukur.+
14 “Adi enggo masuk kena ku negri si bereken Jahwe Dibata kena man kena janah rebut kena negri e ras tading kena i je, jenari ning kena, ‘Eta silantik rajata bagi bangsa-bangsa si lit i sekelilingta,’+
15 arus lantik kena raja si pilih Jahwe Dibata kena.+ Raja si lantik kena arus kalak Israel. La banci lantik kena kalak asing si labo sada bangsa ras kena.
16 Tapi raja e la banci melala kudana+ janah la banci suruhna kalak mulih ku Mesir guna ndatken terbuen kuda,+ sebap pernah kataken Jahwe, ‘Ula nai mulih ku Mesir.’
17 Raja e pe la banci mbue diberuna gelah ula tadingkenna Aku+ ras la banci mbue pirak ras emasna.+
18 Sanga ia jadi raja, arus tulisna mulihi Undang-Undang Musa ku sada buku,* eme Undang-Undang Musa si isimpan imam-imam Lewi.+
19 “Buku e arus tetap bas ia janah arus bacana segedang geluhna+ gelah pelajarina uga carana mbiar man Jahwe Dibatana, gelah patuhina Undang-Undang Musa e, ras dalankenna kerina peraturen-peraturen e.+
20 Alu bage la akapna ulin ia asangken kalak Israel si debanna janah la ia nilah arah perentah-perentah Dibata. Gelah ia ras anak-anakna si dilaki banci ndekah jadi raja bas Israel.
Cataten i teruh
^ Ntah “gulungen.”