Ulangen 18:1-22
18 “Imam-imam ras kerina suku Lewi la pagi dat bagin ntah pe warisen, kalak e la dat bagin bagi kalak Israel. Pangan kalak e ibuat arah persembahen si itutung alu api man Jahwe, e me si jadi bagin kalak e.+
2 Emaka i antara senina-seninana, kalak e la dat warisen. Jahwe kap si jadi warisen kalak e, bagi si enggo katakenNa man kalak e.
3 “Arah persembahen bangsa e, enda si jadi bagin imam: Ise pe si mereken korban, la soal korban e lembu ntah pe biri-biri, arus berekenna bagin pahana si arah lebe, rahangna, ras beltekna man imam.
4 Arus ka bereken kena hasil si pertama arah biji-bijin* kena, arah anggur kena si mbaru, arah minak saitun kena, ras arah mbulu biri-biri kena si ipangkas.+
5 Arah kerina suku-suku kena, kalak e ras keturunenna me si pilih Jahwe Dibata kena guna ngelayani bas gelar Jahwe seh rasa lalap.+
6 “Tapi adi lit kalak Lewi si nadingken inganna tading si lit bas salah sada kota Israel+ janah lawes atena ku ingan si ipilih Jahwe,*+
7 banci ia ngelayani i je guna gelar Jahwe Dibatana radu ras kerina seninana si kalak Lewi, si enggo ngelayani bas ingan e eme i lebe-lebe Jahwe.+
8 Selain hasil arah ndayaken erta nini bulangna, datna ka pangan si seri buena ras kalak Lewi si debanna.+
9 “Sanga masuk kena ku negri si bereken Jahwe Dibata kena man kena, ula cubaken kena ngusih kebiasan-kebiasan si erban ciga ate arah bangsa-bangsa si lit i je.+
10 Ula lit arah kena si nutung anakna si dilaki ntah pe si diberu jadi persembahen,+ si ngeramal,+ si make ilmu gaib,+ si mbaca tanda-tanda,+ tukang sihir,+
11 ngguna-nggunai kalak, mindo petunjuk man kalak si beluh ngelebuh begu kalak mate+ ntah pe peramal,+ ntah pe nungkun man kalak mate.+
12 Ise pe si ngelakoken si e ndai kerina, ciga ate Jahwe, janah perban kebiasan si erban ciga ate e maka bangsa-bangsa si lit i lebe-lebe kena ipelawes Jahwe Dibata kena.
13 Arus buktiken kena maka kena la ersalah i lebe-lebe Jahwe Dibata kena.+
14 “Bangsa-bangsa si nandangi pelawes kena e lalap ngikutken kata-kata kalak si make ilmu gaib+ bage pe peramal,+ tapi Jahwe Dibata kena ngelarang kena ngelakoken si e kerina.
15 Lantik Dibata Jahwe pagi man kena sekalak nabi arah bangsata si bagi aku guna kena. Arus begiken kena ia.+
16 Enda jawapen arah kai si pindo kena man Jahwe Dibata kena sanga kena pulung i Horep,*+ ning kena, ‘Ula sempat begi kami sora Jahwe Dibatata ras idah kami api si galang e, gelah ula kami mate.’+
17 Kenca si e nina Jahwe man bangku, ‘Payo si kataken kalak e.
18 Kulantik pagi sekalak nabi si bagi kam arah tengah-tengah kalak e.+ Kupeseh pagi kata-kataKu man bana+ janah ia pagi si mpeseh kerina si Kuperentahken e man kalak e.+
19 Kupindo pagi pertanggung jawapen arah kalak si la nggit megiken kata-kataKu si Kupeseh arah nabi e.+
20 “‘Adi lit sekalak nabi si pang ngerana bas gelarKu padahal labo lit Kusuruh, ntah ngerana ia bas gelar dibata-dibata si deban, nabi e arus ibunuh.+
21 Banci jadi tersungkun-sungkun kena bas pusuh kena, “Ja nari teh kami maka si pesehna e labo arah Jahwe?”
22 Adi nabi e ngerana bas gelar Jahwe tapi la terjadi kai si katakenna e, e ertina kai si pesehna e labo arah Jahwe nari. Nabi e enggo melebesa. Ula kena mbiar man bana.’
