Ulangen 19:1-21
19 “Kenca Jahwe Dibata kena engkernepken bangsa-bangsa si tading i negri si nandangi bereken Jahwe Dibata kena man kena, janah kenca taluken kena kota-kota kalak e ras tading kena bas rumah-rumah si lit i je,+
2 arus pilih kena telu kota i negri si bereken Jahwe Dibata kena.+
3 Negri si bere Jahwe Dibata kena e arus bagi kena jadi telu bagin. Teluna kota si ipilih ndai arus lit bas telu bagin e janah arus ban kena dalan ku kota-kota e gelah kalak si munuh banci kiam ku je.
4 “Adi lit kalak si la sengaja munuh kalak si deban janah labo tena segat man kalak si bunuhna e jenari kiam ia ku kota e, enda si arus ilakoken man bana gelah ula ia ibunuh.+
5 Contohna, sanga lawes ia ku kerangen muat kayu ras temanna janah sanga awatkenna kapakna guna nabah batang kayu, lepas kapak e arah tangkena nari janah kena ku temanna e. Kenca si e mate temanna e. Arus ia kiam ku salah sada kota ndai gelah ula ia ibunuh.+
6 Tapi adi ndauhsa perdalanen ku kota e, kalak si nuntut balas+ si sangana merawa banci kari ngayaki ia, datna ia janah bunuhna kalak si la ersalah e, padahal ia labo arus mate perban labo atena segat temanna ndai.+
7 E me sebapna kusuruh kena milih telu kota.
8 “Adi Jahwe Dibata kena mpebelang daerah kena bagi janjiNa man nini bulang kena+ janah enggo bereNa kerina negri si janjikenNa man nini bulang kena,+
9 arus tambahi kena telu kota nari.+ (LakokenNa kerina e adi tutus ate kena matuhi kerina perentah si kupeseh man kena bas wari enda, eme engkelengi Jahwe Dibata kena janah terus ngikutken dalanNa.)+
10 Alu bage, kalak si la ersalah la ibunuh+ janah kena pe la rutang dareh bas negri si bereken Jahwe Dibata kena guna jadi warisen.+
11 “Adi lit kalak si rate segat man kalak si deban+ janah daramina kesempaten guna nyerang ia jenari lukaina ia seh asa mate, kenca si e kiam ia ku salah sada kota e,
12 arus lebuh peminpin-peminpin kota e ia, jenari bereken kalak e ia man kalak si nuntut balas janah arus ia ihukum mate.+
13 Ula ate kena mekuah man bana janah arus masapken kena kalak si munuh kalak si la ersalah arah Israel nari,+ gelah sikap pergeluh kena.
14 “Sanga aloken kena warisen kena bas negri si bereken Jahwe Dibata kena man kena, ula pindahken kena batas taneh kalak si deban+ si enggo itentuken nini bulang kena.
15 “La bias sada saksi saja guna mbuktiken kesalahen ntah pe dosa sekalak jelma.+ Arus lit dua saksi ntah pe telu saksi gelah sada keterangen ianggap benar.+
16 Adi sekalak jelma ersaksi guna ncilakai kalak si deban janah tuduhna ia ersalah,+
17 duana kalak e arus ibaba ku lebe-lebe Jahwe, ku lebe-lebe imam-imam ras hakim si sangana ertugas paksa si e.+
18 Arus manjar-anjar selidiki hakim-hakim persoalen e.+ Adi tuhu kin kalak si ersaksi e ngataken si la tuhu janah banna tuduhen palsu,
19 arus ia ihukum bagi rencana si banna man kalak si tuduhna ndai.+ Alu bage, imasapken kena si jahat arah tengah-tengah kena nari.+
20 Mbiar pagi kalak si megi kerna si e, janah ndigan pe lanai lakoken kalak e perbahanen jahat si bage.+
21 Ula ate kena mekuah man kalak si bage.+ Kesah ganti kesah, mata ganti mata, ipen ganti ipen, tan ganti tan, nahe ganti nahe.+
