Ulangen 2:1-37
2 “Kenca si e mulih kita ku taneh mesawang* ngelewati dalan ku Laut Merah, bagi si perentahken Jahwe man bangku.+ Ndekah kel kita erdalan engkelilingi Gunung Seir.
2 Dungna nina Jahwe man bangku,
3 ‘Enggo ndekah kel kena engkelilingi gunung enda. Gundari beloklah kena ku sebelah utara.
4 Peseh perentah enda man kalak Israel, “Lewati kena pagi perbatasen daerah senina kena, keturunen Esau,+ si tading i Seir.+ Mbiar kalak e man kena,+ emaka arus hati-hati kel kena.
5 Ula ban kena masalah* ras kalak e, perban sada tapak nahe pe arah negri e labo Kubereken man kena. Enggo kap Kubereken Gunung Seir jadi jang Esau.+
6 Arus galari kena pangan si pan kena ras lau si inem kena.+
7 Enggo pasu-pasu Dibata Jahwe kena bas kerina si lakoken kena. TehNa perdalanen kena bas taneh mesawang* si mbelang enda. Lit 40 tahun dekahna temani Jahwe kena janah la kena kurang kai pe.”’+
8 Emaka silewati daerah turang seninata, keturunen Esau+ si tading i Seir gelah la silewati daerah Araba, Elat, ras Esion-geber.+
“Kenca si e mulihken kita janah erdalan arah dalan ku Taneh Mesawang* Moap.+
9 Dung e nina Jahwe man bangku, ‘Ula ban kena masalah ras Moap ntah pe erperang ras ia, labo lit sitik pe Kubere man kena taneh kalak e. Perban enggo Kubereken Ar man keturunen Lut.+
10 (Mbarenda kalak Emim+ si tading i je, kalak e megegeh janah enterem pendudukna. Kalak e gedang bagi kalak Enak.
11 Kalak Repaim+ pe ianggap bagi kalak Enak+ janah gelari kalak Moap kalak e kalak Emim.
12 Mbarenda kalak Hori+ si tading i Seir, tapi irebut keturunen Esau daerah e janah kernepkenna kalak e jenari tading kalak e i je.+ Bage ka pagi si lakoken kalak Israel man negri si nandangi jadi jang kalak e, negri si nandangi bereken Jahwe man kalak e.)
13 Gundari laweslah nyebrangi Lembah* Seret.’ Emaka sisebrangi Lembah Seret.+
14 Lit 38 tahun dekahna kita bas perdalanen arah Kades-Barnea seh ku Lembah* Seret, seh asa mate kerina kalak si ngasup erperang, bagi si kataken Jahwe.+
15 Angkat Jahwe tanNa ngelawan kalak e guna engkernepken kalak e seh asa keri.+
16 “Kenca mate kerina prajurit-prajurit e,+
17 nina Jahwe ka man bangku,
18 ‘Bas wari enda lewati kena me daerah Moap eme Ar.
19 Sanga kena nandangi ndeher ku daerah kalak Ammon, ula tindas kena kalak e ntah pe ganggu kena, perban la Kubereken sitik pe taneh kalak Ammon man kena. Enggo kap Kubereken taneh e man keturunen Lut.+
20 Mbarenda taneh e ianggap taneh kalak Repaim.+ (Kalak Repaim pernah tading i je, janah gelari kalak Ammon kalak e Samsumim.
21 Kalak e bangsa si megegeh janah enterem pendudukna. Kalak e gedang-gedang bagi kalak Enak.+ Tapi sampati Jahwe kalak Ammon engkernepken kalak e, rebut kalak e daerah e, jenari tading kalak e i je.
22 Bage si lakoken Dibata man keturunen Esau si gundari tading i Seir.+ KernepkenNa kalak Hori+ i lebe-lebe keturunen Esau, gelah banci rebut kalak e daerah e janah tading i je seh asa gundari.
23 Kerna kalak Awim, tading kalak e i Gasa.+ Tapi kalak Kaptur+ si reh arah Kaptur* nari enggo engkernepken kalak e jenari tading i daerah e.)
24 “‘Berkatlah janah sebrangi Lembah* Arnon.+ Enggo Kuserahken Sihon+ raja Hesbon kalak Amori e ku bas tan kena. Emaka seranglah kalak e janah rebut negrina.
25 Mulai wari enda, Kuban pagi kerina bangsa i doni mbiar sanga megi kerna kena. Mbiar janah nggirgir kalak e* perban kena.’+
26 “Kenca si e, sanga i Taneh Mesawang* Kedemot+ kusuruh piga-piga kalak ndahi Sihon raja Hesbon guna mpeseh pesan perdamen enda,+
27 ‘Pediatlah aku lewat arah negrindu, Tuan. Arah pasar si galang ngenca pagi aku lewat. Labo aku belok ku kanan ntah ku kiri.+
28 Pangan ras inemen si dayakenndu ngenca pagi si kupan ras kuinem. Lewat saja ngenca ateku.
29 Bage ka si lakoken keturunen Esau si tading i Seir ras kalak Moap si tading i Ar man bangku. Pediatlah aku lewat seh asa kusebrangi Lau Jordan ku negri si bereken Jahwe Dibata kami man kami.’
30 Tapi la pediat Sihon raja Hesbon kita lewat, sebap pediat Jahwe Dibatata ia jadi keras kepala janah mekeng,+ gelah iserahken ia ku tan kena bagi si terjadi gundari.+
31 “Kenca si e nina Jahwe man bangku, ‘Nenlah, enggo mulai Kuserahken Sihon ras negrina man bandu. Gundari rebutlah negrina e.’+
32 Sanga Sihon ras pasukenna njumpai kita guna erperang i Jahas,+
33 serahken Jahwe Dibatata ia man banta, emaka sitaluken ia ras anak-anakna si dilaki bage pe kerina pasukenna.
34 Paksa si e, sirebut kerina kota kalak e janah tiap kota sikernepken, termasuk dilaki, diberu, ras anak-anak. La lit sada pe sipediat nggeluh.+
35 Asuh-asuhenna ngenca sibuati janah sijarah barang-barangna arah kota-kota si enggo sirebut e.
36 Mulai Aroer+ nari si lit i tepi Lembah* Arnon (termasuk kota si lit i lembah e), seh ku kota Gileat, la lit kota si la banci sitaluken. Enggo serahken Jahwe Dibatata kerina kota e man banta.+
37 Tapi la banci sideheri negri kalak Ammon,+ kerina tepi Lembah* Jabok,+ ras kota-kota si lit i daerah pegunungen ntah pe kerina ingan si larang Jahwe Dibatata.
Cataten i teruh
^ Taneh si mbelang si jarang iingani.
^ Ntah “Ula erjengil.”
^ Taneh si mbelang si jarang iingani.
^ Taneh si mbelang si jarang iingani.
^ Eme Kreta.
^ Ntah “janah mesui akap kalak e bagi kalak melahirken.”
^ Taneh si mbelang si jarang iingani.
